Rom 9 - Nobonob Baibel

Kayak Nug tatam Israel tituanattom

¹ Da Kristusnu dayeye, da nai imu genabib madittem. Da ham-ii-bubuttem. Kayak Ouɗi Nug da oolppan oiyak ippunittaknu ulum gumeme, amuppa ele da ham-ii-bubuttem doottem.

² Nai amuam inam. Israel danab ag Jesus dimedappig amu, da amunu oolppa uug okkai doyeye, haen oh da oolppa guittak nau doottem.

³ Kayak Nug da lailad, ag am da ele tiinig laippu, Nug ag eɗua diikkunu ool okkai daatte amunu, ib laa elele daalo, ib amuam da eheɗ laa awaknu anak waappa daalom, Kristus da geɗileb, da laih wain padal melom, ib amuppa da Israel danab ah ag Kayak noobppa ena daaglagnu ehanadkkulnu elele daalom amu, da anam helom. Amge ib anam bia laa iitta.

⁴ Israel ag am Kayaknu danab, ag Nug bekkod maattom daatteb. Ag Nug binag amahlak oppiaawak ele amu anidppig daatteb. Nug he, Nug ag ele nug tituanna nai qakkaladppig, nuhig ɗo ele aoppig. Ag Nug nuhig mettid lag, appa Nug noobppa dup noa binag maknu kobol aon dootteb, amu Nug ag ehanadkkunu nai qakka mattialatta maattom.

⁵ Kayaknu danab anukkanu amu, ag am Israel danab memetalkadnab. Amu Kristus ele amu, Nug danab daakkunu, Nug Israel buɗulagppa doum. Nug am Nug Kayak, keeke oh dilag ikki daatte. Ig Nug binag hanhan metu! Genab.

⁶ Israel ag amu oh aoppig, Kayak Nug ele ag nuhikkudnab daaglagnu aum amunu, ig aɗi akkunig? Ig, “Kayaknu nai nug gai-iitta meum,” akkunigte? Iittanab! Aɗinu? Danab oh ag Israel buɗub beppig ele, ag oh am genab Israel danab ii daatteb.

⁷ Ele amu laa oh ag Abraham tiigppan doppig ele amu, Kayak Nug ag ahilag ohnu nai ii qakkom amunu danab oh ag Abraham tiigppan doppig, ag oh am nug bekkodnab ii daatteb. Aɗinu? Anukka Kayak Abraham amegppa inam aum. “Na buɗunadnab am Aisak, nuhigppa bekkulag,” awa aum.

⁸ Nai amuam inam ippunigtte. Aun aɗi ag wan imuppan kobolppa, ag am Abraham buɗub beppig daatteb ele, ag amunu Kayak bekkod ii daatteb. Iitta. Laa ag Kayak Nug nuhig nai qakka aum, ag amunu oolagppa genab dootteb ele, ag am Kayak bekkod, Abraham buɗubnab daatteb.

⁹ Kayak Nug nuhig nai qakka aum am inam. “Haen da memippa, haen amuppa da geha eɗue uɗippi, amu haen gamag amuppa Sarah nug nid danab aweb daakku.”

¹⁰ Amuib iitta. Rebeka bekoɗ aɗit, aa mamelah laippu Aisak, ig mamenig, nugnab ooppanu,

¹¹ amge Kayak Nug danab tituanadtte, Nug nug tituana nai qakkak amu danabnu uɗat dabmedatta ii hette, Nug nukka nuhig doyak dim lamitta hette ele amu, Nug amu miag atiak daakkunu, haen aa anilah nid aɗit amu ii menuatom amunu, aa kobol ena, kobol eheɗ laa ii hepiɗ ele,

¹² haen amuppa Kayak Rebeka amegppa aum. “Nid tatamnu am nid gehanu waappa daya nuhig uɗat hekku,” awa aum.

¹³ Kayak naippa yaak amunu inam daatte. “Da Jakopnu ool mauhom, amge da Esau geɗidmi.”

¹⁴ Amunu ig aɗi akkunig? Ig, “Kayak Nug kobol tutukku ii heum,” akkunigte? Iittanab!

¹⁵ Aɗinu? Nug Moses amegppa aum. “Da danab laanu oo gai-iitta doye ool metten ehanidkkulnu ool daatte dayeb amu, da aakku hekkul, o da danab laanu oo bodoetta le maknu kobol dim lamittaknu ool daatte dayeb amu, da anam hekkul,” awa aum.

¹⁶ Anam amunu, Kayak Nug anam hette, amunu diig am danab laa nuhig dabmakppanu keeke iitta, uɗat ena hette amuppa ele iitta. Amuam Kayak Nug oo gai-iitta doya oo metta ehanittak kobol nuhig, Nug amuppa hette.

¹⁷ Amu Kayak nug Paro amegppa aɗi aum amu, nai amuam Kayak naippa inam daatte. “Da dahil ɠagattag nahip-ppa danab oh ippunadkkulnu, danab ah wan atu ohppa da onil dooglagnu amu, da na king meitti, na okkai aakku daattem.”

¹⁸ Amunu ig doottem, Kayak Nug danab laippu laa nuhignu oo gai-iitta doya oo metta ehanidkkunu oo hette amu, Nug aakku anamib hette, o iitta Nug heeb, danab laanu dabmak ɠagattag ebakkunu oo hette amu Nug aakku hette.

¹⁹ Amunu laa nug da amelppa inam akku. “Anam dayeb amu aɗinu Kayak Nug danab laa, nug beɗuppa nai yaatte? Aun nug Kayaknu dabmaknab awak qeeb nekkunu elele?”

²⁰ Amge o danab, na am aɗi danab amunu na Kayak amegppa a ona a doak nai madittem? Wan hinai nug danab nug hette ele amu, nug amegppa, “Na aɗinu inam heiɗttem?” oɗ medattete?

²¹ Waa keeke hak danab nug wan lekkoh iɗu laippuppa hinai aɗit, laa bala enanagnab, uɗat ena haknu, amu laa bala iitta, uɗat mauhnoak haknu haatkkunu dabmaama, nuhig dabmak dim lamitta hekkunu elele iittate?

²² Kayak Nug danab ah ag hipunin tuɗidib hena, padal mekkulagnu daappig, padal mak amu tonadkkunu, Nug heeb, nuhig oppoɗi bak am miag atiak bekkunu, Nug nuhig ɠagattag ele miag atiak daakkunu dabmak nakok okkaiib awom, amge Nug amu haknu uua ii heum. Iitta. Nug oo maɗoɗ kobol dim lamitta, dabmak amu aɗe ukke daye, paha ii heum.

²³ Nug amu heumnu diig am, amuppa Nug laa Nug ahilagnu oo gai-iita doya oo metta ehanittak kobol dim lamittom, Nug ag anukka Nug ele daaglagnu tituanattom amu, Nug nuhig binag amahlak oppiaawak okkainab ele ippuanattom.

²⁴ Amuam ig danab ig Jesusnu oonigppa genab doottem. Nug ig Juda danab amu iitta aɗi danab ele ig anam hekkunignu oninigppa eum.

²⁵ Amuam Kayak naippa, nai laa Hosea yom, nai amu daatte amubia. Nai amuam inam. “Da laa ag danab ah dahilad iitta, da ahilagnu ‘Dahilad danab ah,’ akkul. Da laa ag danab da ahilagnu ool ii mauhom ele, da ahilagnu ‘Laa da ahilagnu ool mauhtte,’ akkul.”

²⁶ Amu Hoseanu nai laa am, “Aben da ag amelagppa, ‘Ag amu dahil danab ah iitta,’ ami, aben amuppa geha da ahilagnu, ‘Ag amu da Kayak bauklel ele, ag da bekkalad,’ akkul.” Hosia nug Kayak oɗe anam awa yom.

²⁷ Aria, Aisaia nug Israel dilagnu Kayak naippa inam yom daatte. “Israel danab ag yu ihippa, abuɗ niitte bia, ebqak ahilag anam daaglagtai, amge Kayak Nug geha ebqak honapib, oɗo yaak daaglag, Nug agib eɗua diikku.

²⁸ Aɗinu? Geha Naɗi Nug epeɗiak ha maleb, wanppanu danab paha, eɗuak eɗuak iitta ele nob madakku,” awa aum.

²⁹ Haen matu laa Aisaia amunu inam aum. “Naɗi Nukka Ɠagattag Oh Ele, Nug ig buɗunkad laib laib he daatteb. Nug anam ii helo amu, geha ig oh Sodom danab nauhppig bia nauhlom. Ao, Nug anam ii helo amu, ig Gomora danab padal meppig bia padal melom.” Nug anam yom.

Israel ag oolagppa genab ii dooppig

³⁰ Amunu ig inam aot akkunig. Iitta aɗi danab ag Kayaknu genab tutukku hak kobol aoglagnu uɗat ii heppig, amge ag genab tutukku hak kobol amu aoppig. Kayaknu genab tutukku hak kobol, amu awaknu ib am ooppa genab doyak.

³¹ Amu Israel ag am ɗo tutukkuib dim lamidna, genab tutukku hak kobol aoglagnu heppig, amge ag ɗo kobol elelenab ii heppig amunu ag genab tutukku oiyak ii aoppig.

³² Aɗinu ag ii aoppig? Ag oolagppa genab doyak uuppig amunu ag ii aoppig. Ag am uɗatib henana aoglagnu dabmeppig. Amu men baelag yaaladtte ele amu, men amu ag baelag yaalatte, ag nena qeppig.

³³ Kayak naippa, nai amunu inam daatte. “Antteg! Sion appa da men laa eppami daatte. Men amuam men laa danab ippulagppa dayeye, danab ag men amuppa baelag qena, nena qetteb bia daatte. Ao, men amuam, men laa he, danab ag nena qetteb bia daatte. Amge aun laa nug nuhignu ooppa genab dookku, nug geha uɗa nak iinab aoma,” awa atte.