Rom 8 - Nobonob Baibel

Oiyak laa Kayak Ouɗi nug gumatte

¹ Amunu danab ah ag Kristus Jesusnu daatteb, ag hipuninnu nob nau aoglagnu ii daatteb.

² Aɗinu? Kristus Jesusnu uɗat okkaippa Kayak Ouɗinu ɗo, ig bauklel megatte ele, ɗo amu da, ⌊laa oh Jesusnu oolagppa genab dootteb ele⌋ am hipuninnu ɗo, mauhak he bette ele amu, ɗo amu eleppanu eɗua awikke, gemu da, ⌊laa oh ag Jesusnu oolagppa genab dootteb ele⌋ baula keeke aɗit amu waappa ii daattem.

³ Amu inam. Ig oonig alag nug he, ɗonu ɠagattag am gai-iitta dayom amunu, ɗo nug heeb, ig ena bekkunignu elele iittanab, amge keeke ɗo nug hekkunu elele iitta amu, keeke amu Kayak nukka heum. Kayak Nug nukka Nug Bekka me uɗia, danab beum. Nug beɗu am, ig hipunin danab, ig beɗunig bia tagittom, amge Nug am hipunin laa iitta. Amu Jesus Nug ib etta hipunin haknu ofa dayeb, amuppa Kayak Nug ihinig hipunin uhuqa megakkunu, Nug Jesus me uɗiom. Ib amuppa amu, Kayak Nug danab ah ag hipunin waappa ii daamnanu heum.

⁴ Nug anam heeb, ɗo nug tutukku oiyak kobol ippunigtte amu, ig laa, ig oonig alagnu kobolppa ii oittem, ig Kayak Ouɗinu kobolppa oittem ele amu, tutukku oiyak kobol amu ihinigppa bekkunu heum.

⁵ Danab ag oo alagnu kobolppa oitteb, ag oo alagnu keekenu dabmak anuqak aotteb, amge danab ag Kayak Ouɗinu kobolppa oitteb, ag am Kayak Ouɗinu kobol, ag amunu dabmak anuqak aotteb.

⁶ Danab nug oo alagnu keekenu dabmak anuqak awawa oitte, danab amu nug mauhkku. Danab nug Kayak Ouɗinu keekenu dabmak anuqak awawa oitte, danab amu nug bauklel awa, maɗoɗ daakku.

⁷ Anam daattenu diig am, danab nug oo alagnu keekenu dabmak anuqak aotte ele, nug aakku Kayaknu kekeɗ daatte. Aɗinu? Nug Kayaknu ɗo waappa ii daatte, amu nug anam hekkunu ele, elele iitta

⁸ amunu, danab ag oolag alagppa oitteb ele, danab amu ag Kayak oo daatte ele, kobol amu ag hekkulagnu elele iitta.

⁹ Amge ag Rom danab, ahilagnu amu, Kayak Ouɗi Nug ahilagppa daatte dayeb, ag oo alag waappa ii daatteb. Iitta. Ag Kayak Ouɗi waappa daatteb. Amu danab laa nug ooppa Kristusnu Ouɗi iitta, nug am Kristusnu danab iitta.

¹⁰ Ag hipunin heppig amunu, ag beɗulag mauhtte, amge Kristus ag oolagppa daatte dayeb, ag ouɗilag bauklel daatte. Aɗinu? Kayak Nug ahilagnu, “Genab tutukku hak danab,” aum.

¹¹ Kayak Nug he, Jesus eɗua hibaittom ele, Nug nuhig Ouɗi ag oolagppa daatte dayeb, Kayak he, Kristus eɗua hibaittom ele, Nug geha ag beɗulag mauhtteb ele am bauklel, Ouɗi nuhig, ag oolagppa daatte ele, nuhigppa ag madakku.

¹² Amunu O lailad, ig Jesus dim lamidkkunignunab dootu! Ig oonig alag aɗi hekkunignu atte, ig nug oɗe doot dim lamidkkunignu aib dabmemut.

¹³ Aɗinu? Ag oolag alag dim lamidkkulag amu, ag mauhkkulag, amge ag Kayak Ouɗinu ɠagattagppa beɗunu kobol dimettan, ii dim lamidkkulag dayeb, ag bau daaglag.

¹⁴ Aɗinu? Danab aun aɗi ag Kayak Ouɗi Nug ib ippuanatte, ag ib amu dim lamidtteb ele, ag am Kayak bekkod.

¹⁵ Anam amunu, haen ag Kayak Ouɗi aoppig, ag ouɗi laa, ouɗi amu nug he, nuhikkud ag begbeg maɗi nid ahilkad okkai baɗadna oitteb bia oitteb, ag ouɗi laa amubia ii aoppig. Iitta. Ag Kayak Ouɗi aoppig amu, Nug he, ag Kayak bekkod daatteb. Kayak Ouɗi Nug he, ig “Mame, Mame,” aot attem.

¹⁶ Kayak Ouɗi Nug ig am Kayak bekkod daattem amu, Nug amu ippunigtte.

¹⁷ Amu ig Kayak bekkod daattem dayeb, ig geha keeke Nug megakkunu dabmette ele aognig. Laa ele amu, Kayak Nug keeke Kristus medakkunu dabmette amu, ig Nug ele oh amu aognig. Yo, ig Kristus uug mawom, uug amu genab tuɗidta maognig dayeb, dimppa ig Nug hab aabppa dayak enanag awom ele, ig amu ele aognig.

Hab aabppa dayak enanu nai

¹⁸ Dahil dabmak okkainab, amuppa amu, da uug guittak ele ig gemu doottem dabmein, dimppa ig keeke ena ena aognig ele dabmein, dimppanu keeke ena ena ele ⌊amuam ig Jesus ele Kayak bekkod daat, nuhig keeke enanag aognig,⌋ da keeke amunu am keeke okkainab doyen, uug ig gemu doottem am keeke nakoknab bia doottem

¹⁹ Amunu keeke oh Kayak hattom ele, keeke amu oh am, ig Kayak bekkod, ig geha miag atiak bekkunignu haen ameg mena, ikkilag human neegna daatteb.

²⁰ Gemu keeke oh eheɗ daanna nauhtteb. Keeke amu ag akka ahilag dabmak dim lamidna anam ii daatteb. Iitta. Kayak Nug nukka nuhig dabmaknab awak dim lamitta, hippalattom daatteb. Amge ag gog taknu keeke ena, Kayak madakkunu aum amu, ag amu aoglagnu dabmak aɗan daatteb.

²¹ Aɗinu? Kayak Nug geha keeke oh gemu ag nauhaknu hippalakppa daatteb ele, Nug ag amuppanu uhuqatteb, keeke amu oh ag ig Kayak bekkod, ag ig ele oh enanag beta daagnig.

²² Amu ig doottem, keeke ohnab Kayak hattom ele, ag daanna, ah nid menukkunu guittak doyaya aeqagatte, ag amubia henan daaegeg uɗie, gemu ele anamib henana daatteb,

²³ amge Kayak keeke oh hattom, keeke amu aakkuib ag anam ii hetteb. Iitta. Ig Kayak Ouɗi aomut, Nug am hanhan ena dayak awaknu hapin pania mekkom daatte amu, ig ele Kayak Nug heeb, ig beɗunig bau aot, ig Nug bekkodnab daagnignu aeqakkata, ameg meta daattem.

²⁴ Kayak Nug ig eɗua awikkom, amu gemu ig amu gogppa tekkunu dabmak aɗat daattem. Amge ig amu gogppa taknu dabmak aɗat daattem ele, ig amu anidta malalom, gogppa taknu dabmak aɗa dayaknu uɗat laa tuɗitta ii daalo. Danab nug gogppa tak anttom ele, nug aɗinu tuɗitta gog taknu dabmak aɗa daakku?

²⁵ Amge ig keeke ena amu aognignu genab dabmettem dayeb amu, ig oonig maɗoɗ ele ameg meta daattem.

²⁶ Kayak Ouɗi Nug ele ig danab ig ɠagattag iitta ehanigtte. Ig aɗi keekenu unuqidkkunig amu, ig ii doottem, ig oonigppaib gaattem, ig miag matulta ii attem, amge Kayak Ouɗi Nug ig ehanikka, ihinignu Kayak unuqidtte.

²⁷ Amu Kayak, Nug danab oo unuqagnab anidtte ele, Nug nuhig Ouɗinu unuqittak amu dootte. Aɗinu? Kayak Ouɗi Nug Kayaknu danab ah oppiaawak ele dilag unuqittak awa, Nug Kayak oo niitte bia amunu unuqidtte.

²⁸ Amu ig doottem, Kayak Nug danab aun aɗi ag nuhignu oolag mauhtte, Nug kobol ena bekkunu ag ele uɗat hetteb. Nug aɗi bekkunu matu dabmeum amu, nug amu dabmaama, ag onilagppa eum.

²⁹ Aɗinu? Danab aun aɗi ag Kayaknu oolag mauhkku amu, Nug ag anukka doyattom. Nug doyattom amunu, Nug ag kuɗum Nug Bekka ele oh daan, Bekka Nug ag oolagppa ag awalag nid naanaeg daakkunu, ag Bekka daatte bia daaglagnu, Kayak Nug maittaknab amu awom.

³⁰ Amu Nug danab anukka Nug Bekka bia daaglagnu maittak awom ele, Nug ag ele onilagppa eum. Nug danab onilagppa eum ele, Nug ahilagnu ele, “Genab tutukku hak danab,” awa aum. Nug danab laala, Nug ahilagnu, “Genab tutukku hak danab,” aum ele amu, Nug he, ag Nug Bekka bianab betteb.

Kayaknu oo mauhak

³¹ Amunu ig Kayak keeke heum ele, amu ohnu ig aɗi aot akkunig? Ig inam aot akkunig. “Kayak Nug ig ehanigtte dayeb amu, laa nug ig kekeɗ mekka eɗigkku? Iitta!” aot akkunig.

³² Nug Bekka ig megakkunu amu Nug amunu oo ii qe, Nug ig oh ehanigkkunu me uɗiom. Nug anam heum amunu geha, keeke laa oh ele amu, Nug ig iite megakku? Yo, Nug megakku.

³³ Kayak nug danab ah tituanattom amu, aun laa nug ag hettoɗiakppa maadkku? Auntai, laa iitta. Aɗinu? Ag Jesusnu oolagppa genab dootteb amunu Kayak ahilagnu, “Genab tutukku hak danab,” aum.

³⁴ Aun nug danab ah amu hipuninnu nob nau aoglagnu akku? Auntai, laa iitta. Aɗinu? Jesus Kristus Nug nukka aakkuib mauhowa, Nug eɗua hibaitta, gemu Nug hab aabppa Kayak eppeg naɗiap-ppa dayaya, ihinignu Kayak unuqidtte.

³⁵ Ig Kristusnu oo mauhak ooppa daattem, amu aun nug amuppanu matakkikka aokku? Uug laate; o iitta oiyak ihinigppa keeke ig mawaknu uug doottem, amute; o iitta eheɗ heikkak, amute; o iitta enug haen, amute; o iitta keekenu tutu mak, amute; o iitta qagaiettak haen, amute; o iitta mauhak, amute, o amu oolagppan laa am Kristusnu oo mauhak ooppanu matakkikka aokkute? Iittanab!

³⁶ Uug amu oh, amuam Kayak naippa, nai laa daatte bia. Nai amuam inam. “O Kayak, danab ah ag ihinignu nau ninig ele doottebnu diig am, ig na dim lamidttem amunu, ag ig deɗ oh amun tuqan ele iqaglagnu hetteb. Ao, danab ag sipsip lanaknu baalag otaɗadtteb, amubia danab ah ag ig iqaglagnu dabmak aotteb.”

³⁷ Amge keeke amu oh ig eɗigkkulagnu am elele iitta. Iitta. Kristus Nug haen oh ihinignu oo mauhtte amunu, ig kobol nau amu oh eɗadta autta aotta aottem.

³⁸ Amu da imu oolppa genab doottem. Ig Kristusnu oo mauhakppa daattem amunu, aɗitai keeke laa iinab amuppanu matakkigma. Ge, mauhak, o iitta bau dayak, o iitta engel ena ag, o ouɗi nau ag, o iitta gemu haen imu aɗi keeke bette, o iitta butti keeke aɗi aɗi bekku, o iitta aɗi keeke ɠagattag ele ag,

³⁹ o iitta aɗi keeke wan imu attannu, o iitta aɗi keeke wan imu honapnu, amu oh oolagppanu laippu laa nug ig Kayaknu oo mauhakppa daattem imuppanu iinab matakkigkkunu elele iinab daama. Genab, aɗi ohnab Kayak heum daatteb ele, amu oh oolagppa aɗi laippu laa nug Kayaknu oo mauhak, Nug Kristus Jesus, ihinig Naɗi, Nug nuhig mauhakppa amu ippunikkom ele amu, keeke laa oo mauhak nuhig amu ooppanu matakkigkkunu elele iinab daama!