Rom 7 - Nobonob Baibel

Kobol bauppa oiyak

¹ O lailad, ag ɗo nai dootteb amunu, ag ɗo nug danab bau daatte, haen amuppa aakkuib nug danab amu tonatte ele dootteb.

² Ag amu anidkkunignu amu da nai imu madippi dooglag. Ah laa nug danab awom amu, gamu nug bau daatte haenppa, ah nug aakku ɗo atte bia, nug gamu eleib ewau daaglahnu daatte. Amge gamu mauheb amu, ɗo amu ah amu geha ii toneb, nug aakku ɗo amu waappa ii daatte.

³ Amu gamu nug bau dayebeb, wau nug uuitta, danab laa aweb amu, ag ah amunu, “Ewau pakkua gappai hak ah,” aon akkulag. Amge gamu mauhom dayeb, ɗo amu nug baula ii tonatte amunu, nug danab baula aweb, nug aakku ewau pakkua gappai hak ah ii daama.

⁴ Amunu O lailad, gemu ag laa, Nug mauhe, Kayak he, Nug eɗua hibaittom ele amu, nuhig daaglagnu, ag ig ele oh ig Kayaknu kobol ena hekkunignu, ag Kristusnu mauhakppa, danab laa mauha ɗo waappa ii daatte, amubia ag ɗo waappa ii daatteb.

⁵ Amu ig oonig alag dim lamidmut haenppa amu, ɗo nug beɗunignu dabmak nau maɗette ahe, ig hipunin hemut. Kobol amu beɗunig laih naunau ohppa heehe, amuppa mauhak aakku beum.

⁶ Amge gemu ig danab laa nug mauha, ɗo waappa baula ii daatte, amubia ig ɗo, nug ig tonikke daamut ele amu, nug waappa ii daattem. Gemu ig ɗo nai yaak daatte ele, amu waappa daata, amuib dim lamidkkunignu uɗat ii hettem. Iitta. Ig am kobol bau, Kayak Ouɗi ihinigppa maɗette ahom ele amu, ig amu hettem.

Hipunin amu ɗo ele dilah nai

⁷ Amunu ig aɗi akkunig? Ig, “Ɗo amu hipunin ele aa am keeke laippu,” akkunigte? Iittanab! Amge genab, ɗo nug da hipunin ii ippuniɗlo amu, da aɗi kobol am hipunin ele, da ii doolom. Amu inam bia. Ɗo atte, “Na aib danab laanu keeke amen qeeb aolomnab dabmak eheɗ aome.” Ɗo anam ii alo amu, da danab laanu keeke ameg qeeb aolonab dabmak eheɗ awak kobol am nau amu, da ii doolom.

⁸ Amge hipunin nug ɗo amuppa ameg qeeb aolonab dabmak eheɗ awak kobol oh da oolppa he beum. Amu ɗo ii daatte dayeb amu, hipunin am bodoettak daatte.

⁹ Anukka dahilppa ɗo ii dayeye, haen amuppa da bau daami. Amge dimppa Kayaknu ɗo dahilppa uɗie, hipunin dahilppa ele uɗie, da mauhmi.

¹⁰ Ɗo da bauklel meɗakkunu dayom amu, da ɗo amuppa bauklel ii aomi; ɗo nug ⌊hipunin ib mette he,⌋ da mauhmi.

¹¹ Aɗinu? Ɗo uɗiom amuppa hipunin nug ib ele dayaya, nug da hipunin hekkulnu da buppuiɗa, ɗo he, da aakku hipunin hei amu, ɗo Nug dahilnu, “Na mauhkkut,” aum.

¹² Amunu ig doottem, ɗo nukka am enanag, oppiaawak ele. Amu ɗonu haknunab anak oh ele am oppiaawak, tutukku, amu ena ele.

¹³ Aria, gemu amu attemu? Keeke ena, amuam ɗo, keeke amute da iwe mauhmi? Iittanab iitta! Hipunin da iwe mauhmi. Amuppa amu, hipunin miag atie, ig nug keeke naunab daatte doottem. Hipunin nug keeke ena amu awa, amuppa haaha, oiɗe mauhmi amunu, hipuninnu diig miag atitte; nug am keeke naunab.

¹⁴ Ig doottem, Kayak Nug nuhig ɗo am Kayaknu dabmak ippunigtte, amge da ool alag ele amunu, da Kayaknu dabmak ii dim lamidttem. Hipunin da hippaliɗom amunu, da nuhig begbeg maɗi nid daattem.

¹⁵ Amu kobol da hettem ele, diig amuam da ii doottem. Kobol da amunu ool hette ele amu, da ii hettem. Amge kobol da amunu oolppa nau ninig ele doottem amu, da amu hettem.

¹⁶ Aria, da kobol oh, da hekkulnu ool ii hette ele, da kobol amu hettem dayeb, da dahil kobol amuppa da, “Ɗo am ena,” awe attem

¹⁷ amunu, da gemu doottem, da dakka kobol amu ii hettem. Iitta! Hipunin da oolppa niitte ele amu, nug kobol anam hette.

¹⁸ Amu da doottem, da oolppa am keeke ena laa iinab daatte. Amuam da ool alagnu attem. Amu genab, da kobol ena hekkulnu ool hette, amge da hekkulnu elele iitta.

¹⁹ Amu kobol ena, da hekkulnu ool hette amu, da ii hettem. Kobol nau, da hekkulnu ool ii hette ele amu, da amu aakku hettem

²⁰ amunu, da kobol da ool ii hette ele, da amu hettem dayeb, da dakka kobol amu ii hettem. Iitta! Hipunin, da oolppa niitte ele amu, nug aakku hette.

²¹ Anam amunu, kobol inam da oolppa daatte amu anidttem. Da kobol ena hekkulnu ool hette, amge kobol nau nug ele dahilppa daatte.

²² Aɗinu? Da dahil dabmak unuqagppa amu, da Kayaknu ɗonu enanagnab doottem,

²³ amge da ɗo laa ele da beɗul laih laih oh daatte anidttem. Ɗo laa amu, amuam ɗo dabmak dahilppa daatte iitta; ɗo laa amuam hipuninnu ɗo, dahilppa uɗat haaha daatte ele. Anam amu, hipuninnu ɗo am ɗo dabmak dahilppa daatte eɗidkkunu ban hette. Hipuninnu ɗo nug anam haaha, da hippaliɗe, da danab nug maniguittakppa dayaya, nuhig dabmak dim lamidkkunu elele iitta, amubia da kobol ena dim lamidkkulnu, am elele iitta.

^24-25 Gadonnab! Da qagaiettaknab daattem! Da dakka dabmak dahilppa Kayaknu ɗo waappa daattem, amge ool alagppa amu, da hipuninnu ɗo waappa daattem. Aun nug da ehaniɗeb, da baula hipuninnu ɗo, nug he da mauhttem ele amu, da nug waappa ii daapa? Amu da Kayak amegppa, “Ena heme,” awe attem. Aɗinu? Jesus Kristus, ihinig Naɗi, nuhigppa da uhuqak ena aomi daattem.