Rom 6 - Nobonob Baibel

Hipunin nug Kristen aib tonom

¹ Amunu ig aɗi nai akkunig? “Kayaknu ehanittak okkai hamu mettak am okkai ba daakkunu, ig hipunin kuɗum hetata daatu!” aot akkunigte?

² Iittanab iitta! Aɗinu? Ig am danab mauhom, hipunin laa ii hette, amubia ig hipunin haknu matu uumut amunu, ig attem heta, gemu ig kobol uumut ele eɗut baula hetat oignig?

³ Ig Kristus Jesus ele tamanit, layattak aomut amu, kobol amuppa ig ele Jesus, nuhig mauhakppa laippu mauhmut bia daamut, ag amu iite dootteb?

⁴ Ig layattak aomut amunu, amuppa ig aakku Kristusnu mauhakppa, ig ele laippu mauhmut. Ig anam mauhut, Kayak Nug ig Kristus ele laippu boumikkom daamut. Ig anam daamutnu diig am, Mama Nug nuhig ɠagattag okkai amuppa he, Kristus eɗua hibaittom, amubia Nug heeb, ig ele oiyak bau aot oignignu elele daagnig.

⁵ Ig genab Nug ele laippu tamanit, Nug ele oh mauhta daamut dayeb amu, genabnab ig Nug ele laippu tamanit, Nug eɗua hibaittom bia, ig ele eɗut hippaidkkunig.

⁶ Amu ig doottem, ig oonig alag, ihinig oiyak alag amuppa beum ele, nuhig ɠagattag ig duttunigmanu, ig ele hipuninnu begbeg maɗi nid ii daamtanu, Kristus ad emaitakppa mauhom, haen amuppa ihinig oiyak alag am ele appa Nug ele mauhom.

⁷ Amunu diig am, danab auntai laa nug mauhtte amu, nug baula hipuninnu ɠagattag waappa ii daatte.

⁸ Amu ig Kristus ele mauhmut dayeb, ig geha Nug ele bauklel daagnignu oonigppa genab doottem.

⁹ Am ig doottem, Kristus Nug eɗua hibaittom amunu, Nug baula ii mauhma. Mauhak nug Kristus aɗeb, Nug mauhak waappa daakkunu elele iitta.

¹⁰ Jesus Nug haen laippuib ihinig hipunin uhuqa megakkunu mauhom. Nug baula ii mauhma, amge gemu Nug bau daatte amu, Nug Kayak ele ouqak daattep.

¹¹ Amubia ag Kristus Jesusnu uɗatppa, ag hipuninnu ɠagattag waappa ii daatteb, amge ag Kayak oo niitte amuib dim lamidkkulagnu daatteb, ag amu oh dabmenan oiyeg!

¹² Ag anam oiglagnu daatte amunu, ag heppeg, hipunin nug ag beɗulkad mauhtteb ele dilag okkai aib dayom. Hipunin nug ag beɗulkad dilag okkai daakku dayeb, ag beɗulkadnu eeɗak nau dim lamidna, eheɗ hekkulag, amge ag anam aib heppig.

¹³ Ag anen anen ag kobol nau hekkulagnu, ag beɗulkadnu laih laih oh hipunin eppegppa aib meppig. Iitta! Ag danab mauhppig eɗun hippaidppig bia daatteb amunu, ag beɗulkad laih ohppa genab tutukku hak kobol hekkulagnu, ag meulkad oh Kayak metteg!

¹⁴ Hipunin am ahilag okkai baula aib dayom. Aɗinu? Gemu ag ɗo waappa ii daatteb. Ag am Kayaknu ehanittak okkai hamu megatte, amu waappa daatteb.

Kristen nug genab tutukku hak kobol waappa daakku

¹⁵ Amunu ig attem hekkunig? Ig ɗo waappa ii daattem, ig Kayaknu ehanittak okkai hamu megatte waappa daattem amunu, ig hipunin hekkunig am iittate? Iittanab iitta!

¹⁶ Am ag imu iite dootteb? Haen ag beɗulag danab laa mettona, nuhig nai dim lamidna amu, ag aakku nuhig begbeg maɗi nid daatteb. Am ag eheɗ hak kobolnu begbeg maɗi nid daatteb dayeb, ag mauhak amuppa aoglag, o iitta ag Kayak oɗe dim lamittaknu kobolnu begbeg maɗi nid daatteb dayeb, ag genab tutukku hak danab daaglag.

¹⁷ Ib aɗit amu oh daattep, amge ig ahilagnu Kayak amegppa, “Ena heme,” aot attem. Aɗinu? Anukka ag hipuninnu begbeg maɗi nid daappig, amge dimppa Kayaknu nai aon, ag nai amu dim lamidna autna aotteb.

¹⁸ Amu Kayak Nug ag eheɗ hak kobol ooppanu uhuqatte, ag aakku genab tutukku hak kobolnu begbeg maɗi nid beppig daatteb.

¹⁹ Amu dabmak ahilag ɠagattagnab ii qeum amunu, da danab ihinig kobol laappa imu ippunadkkulnu heinne attem. Anukka ag genab tutukku hak kobol uuna, ag beɗulkad laih oh ag kobol dubuttid ele, ɗo tappe naknu kobol ele, ag amunu begbeg maɗi nid maadna, ag ɗo tappe nak kuɗum digdig, nau ahilag tuɗitta naunab gotte amu, ag kobol amu ele tuɗidna hekkulagnu heppig. Gemunu amu, ag oppiaawak danab bekkulagnu ag ag beɗulkad laih oh kobol tutukkunu begbeg maɗi nid maatteg!

²⁰ Anukka ag hipuninnu begbeg maɗi nid daappig amu, haen amuppa ag genab tutukku hak kobolnu begbeg maɗi nid iinab daappig.

²¹ Amu ag kobol nau heppig, ag gemu kobol amunu uɗalag nette ele amu, kobol amuppanu ag aɗi keeke ena aoppig? Kobol amuam mauhakib he bette.

²² Amge Kayak Nug ag hipuninnu kobolppanu uhuqatta, Nug ag nuhig begbeg maɗi nid maattom amunu, ag nuhig keeke ena aonna, oppiaawak danab betteb. Ag anam bettebnu gogtak amu ag bauklel hanhannu aoglag.

²³ Hipuninnu nob am mauhak, amge Kayak Nug ig ihinig Naɗi, Kristus Jesusnu uɗatppa bauklel hanhannu ihinig daakkunu hamu megatte.