Rom 5 - Nobonob Baibel

Ooppa genab doyaknu diig am Kristus

¹ Aria, ig oonigppa genab doout, Kayak Nug ihinignu, “Genab tutukku hak danab,” awa aum amunu, ihinig Naɗi Jesus Kristus, nuhigppa amu ig Kayak ele maɗoɗ daattem.

² Ig oonigppa genab doout, Naɗi Jesus, nuhig uɗat okkaippa, ig Kayaknu ehanittak okkai hamu megatte ele amu aot, ɠagattag daattem. Amu ig Nug ele hab aabppa enanagnab daagnignu ameg meta, ig maɗoɗppan gamag ahak doottem.

³ Ig amunuib maɗoɗppan gamag ahak ii doottem. Iitta. Uug laa beɗunigppa uɗitte, amuppa ele ig maɗoɗppan gamag ahak doottem. Aɗinu? Ig doottem, ig uug doopput, uug amu ag ig oonig ɠagattag qedappeg, ig uug doyaya eɗittaknuib dabmak awak danab bekkunig.

⁴ Amu ig anam beta hebupput ukkeb amu, ig danab diig ena ele bekkunig. Aria, ig amubia ele beta hebupput ukkeb amu, ig keeke ena bekkunu dabmak aɗa dayak danab bekkunig.

⁵ Amu keeke ena bekkunu dabmak aɗa dayak amu heeb, meu okku; ig meu amu genab anidkkunig. Aɗinu? Kayak Nug nuhig Ouɗi ig mekka, nuhigppa amu Kayak Nug nuhig oo mauhak ig oonigppa me ambette.

⁶ Antteg! Anukka ig ɠagattag iitta daamut, haen amuppaib Kristus Nug ig danab, ig Kayak dimettamut ele amu, ig eɗua awigkkunu mauhom.

⁷ Amu danab laippu laa nug genab tutukku hak danab ehanitta, nuhignu mauhkku amu iitta bia, amge deɗ laippu laippu danab laa nug oo ɠagattag qetta, danab ena laa ehanitta, nuhignu mauhkkutai,

⁸ amge ig am hipunin danab daautut, Kristus Nug ihinignu mauhom, amuppa Kayak Nug ihinignu oo mauhtte amu, Nug ig ippunigtte.

⁹ Kristus ig ounig mauha, Nug tiig gokkaɗom amunu, ig ib amuppa genab tutukku hak danab bemut daattem. Aria, ig nau daautut, Kristus ehanikkom dayeb amu, gemu Nug Kayaknu oppoɗi bak, Nug ig amuppanu genabnab genab iite eɗua awigkku? Yo, Nug eɗua awigkku.

¹⁰ Aɗinu? Anukka ig Kayaknu kekeɗ daautut, Nug Bekka ihinignu mauha amu, mauhak nuhig amuppa Nug kekeɗ kobol he iitta me, gemu ig Kayak ele oonig laippu daattem. Kayak he, ig Nug ele oonig laippu daattem, Nug Bekka ele bau daatte, diig amunu genabnab genab Kayak Bekka ⌊Nug Kayaknu oppoɗi bak,⌋ Nug amuppanu eɗua awigkku.

¹¹ Amuib iitta, ihinig Naɗi Jesus Kristus Nug he, ig Kayak ele oonig laippu ele daattem amunu, uɗat nuhig amuppa gemu ig Kayaknu maɗoɗppan gamag ahak doottem.

Adam Jesus ele dilah nai

¹² Aria, danab laippu laa hipunin heum, amuppa hipunin kobol oh wanppa daatte. Hipuninnu nob am mauhak amunu, mauhak am danab ah oh tonattom daatte. Aɗinu? Danab ah oh ag hipunin aakku heppig.

¹³ Amuam genab daattenu diig am, Mosesnu ɗo ii beum haenppa, ⌊danab ah mauhadppig amunu, ɗo laa daye,⌋ danab ah hipunin hena, ⌊mauhadppig⌋. Ɗo ii daatte haenppa, hipuninnu nob mak ele ii daatte.

¹⁴ Anam amu, mauhak am Adamnu haenppanu daye ukke, Mosesnu haenppa ele dayom. Mauhak am danab oh tonattom. Ao, danab laala ag Adam nug ɗo tappe neum bia ii heppig, amge mauhak am danab amu ele tonattom. Adamnu hak, amu laa uɗikkunu dayom, am Kristus, nuhig hak ele, hak aɗit amu oh aa danab ah oh tonadpiɗ, amge Adamnu hakppa uug beum, Kristusnu hakppa ehanittak okkainab beum.

¹⁵ Amge Kayaknu ɗo hamu mettak am Adamnu hipunin bia iitta. Danab laippu, Adam, nug hipunin heum amunu, mauhak am danab kuɗum tonattom daatte, amge Kayaknu ehanittak okkai hamu mettak am, amu eɗitta aut autanab awom. Anam amunu Kayak Nug danab laippu, amuam Jesus Kristus, Nug nuhig uɗat okkaippa Nug ehanittak okkai hamu mettak kobol nuhig dim lamitta, danab kuɗum nuhig ɗo hamu mettak, amuam bauklel hanhannu, Nug ag matte aoppig.

¹⁶ Baula amu, Kayaknu ɗo hamu mettaknu gogppa tak am ɗo tippalak Adam heumnu gogppa tak bia iitta. Adam nug hipunin laippu he, hettoɗia epeɗiakppa nug hipuninnu bu aokkun dayom. Anam amge Kayaknu ɗo hamu mettak am hipunin kuɗum hak dimppa he, danab kuɗum ag Kayak noobppa hipunin iitta daappig.

¹⁷ Amunu, danab laippunu hipuninppa mauhak aakku danab tonatta, king bia dayomnu nai, nai amuam genab daatte dayeb, am genabnab genab aun aɗi ag Kayaknu ehanittak okkai hamu mettak okkainab, nuhig ɗo hamu mettak, amuam genab tutukku hak danab dayak amu, ag amu ele aona, ag bauklel, king bia daaglag; amu oh am Jesus Kristus, nuhig uɗat okkaippa bette.

¹⁸ Amunu danab laippu nug ɗo laippu tippalom, amuppa danab oh ag hipuninnu nob nau aoglagnu daatteb, amubia danab laippu laa Nug kobol genab tutukku ele laippu he, amuppa Nug danab oh ag genab tutukku hak danab, bauklel ele daaglagnu ib ooɗom.

¹⁹ Danab laippu nug nai tappe neum, kobol nau nuhig amuppa ⌊nug ib ooɗe,⌋ danab kuɗum ag hipunin danab daatteb. Amubia danab laippu laa Nug nai dim lamittom, kobol ena nuhig amuppa ⌊nug ib ooɗe,⌋ danab kuɗum ag geha ag genab tutukku hak danab daaglag.

²⁰ Aria, Kayak Nug danab ɗo matte, danab ag hipunin tuɗidna, kuɗum heppig, amge hipunin okkai meeme, Kayaknu ehanittak okkai hamu mettak am okkainab meum

²¹ amunu, hipunin nug he, mauhak danab tonattom daatte, amubia Kayaknu ehanittak okkai hamu mettak, amuam he, ihinig Naɗi Jesus Kristus, nuhigppa danab ag genab tutukku hak danab bena, bauklel hanhannu aotteb.