Rom 4 - Nobonob Baibel

Abraham ooppa genab doyomnu nai

¹ Aria, Abraham nug am danab ig bia, nug amu ig mamenig amunu, ig nuhignu aɗi akkunig? Nug Kayak noobppa genab tutukku hak danab daakkunu aɗi anttom?

² Abraham nug ɗo dim lamittom, amuppa nug genab tutukku hak danab beum daakku amu, nug nukka nug onig humakkunu ib daakku; amge Kayaknu neekkakppa am anam ii daatte.

³ Kayak nai amunu aɗi atte? Inam atte. Abraham nug Kayak nai aum, nug amunu ooppa genab doyom amunu, Kayak Nug ooppa genab doyak amu antta, Nug Abrahamnu, “Nug am genab tutukku hak danab daatte,” awa aum.

⁴ Ig doottem, haen danab nug uɗat ha, daden nob aotte amu, nob amunu ig ɗo hamu mettak ii attem. Iitta. Keeke amuam ig uɗat haknu nob aakku aotte attem.

⁵ Amge danab nug nukka, nuhig uɗatnu, nug ib amuppa genab tutukku hak danab bekkunu ii dabmette, iitta, nug Kayaknu ooppa genab dootte, Kayak Nug he eheɗ hak danab ag genab tutukku hak danab daatteb amu, Nug danab amu nuhig ooppa genab doyak antta, “Nug am genab tutukku hak danab,” awa atte.

⁶ Dawit ele nug danab laa, Kayak danab amunu uɗat ii dabmette, amge danab amunu Nug, “Genab tutukku hak danab,” atte, Dawit nug danab amu nug itittak ena awom daattenu ana, nug ele danab nug ooppa genab doyak ib amuppa genab tutukku hak danab daakkunu aum.

⁷ Nug inam aum. “Danab oh Yawe Nug ahilag hipunin uhuqa mattom ele, ag itittak ena aoppig daatteb. Ao, danab ag Yawe Nug ahilag hipunin oppia mattom ele amu, ag itittak ena aoppig daatteb.

⁸ Danab laa Naɗi Nug nuhig hipunin uhuqa mettom daatte, bu laa aokkunu ii daatte amu, danab amu nug itittak ena awom daatte.”

⁹ Amu danab gaɗalag otaɗak ele amu, agib itittak ena amu aoglagte? Iitta. Danab gaɗalag ii otaɗak ele ag ele itittak ena amu aoglag; ig matu amut amubia. Nai amuam inam. “Kayak Nug Abrahamnu ooppa genab doyak antta, Nug nuhignu, ‘Nug am genab tutukku hak danab daatte,’ ” awa aum.

¹⁰ Amu Abraham nug attemnab dayeye Kayak nuhignu, “Genab tutukku hak danab,” aum. Nug gaɗa otaɗom dimppatai o iitta gaɗa ii otaɗomppatai? Nug gaɗa ii otaɗom dayeye, Kayak nuhignu, “Genab tutukku hak danab,” aum.

¹¹ Nug gaɗa ii otaɗom, haen amuppa nug ooppa genab doye, Kayak Nug nuhignu, “Genab tutukku hak danab,” awa ana, Nug amunu epponak keeke daakkunu Nug Abraham gaɗa otaɗkkunu aum amunu, Abraham nug am danab oh, ag gaɗalag ii otaɗppig daanna, Kayaknu oolagppa genab dootteb, Kayak ahilagnu, “Genab tutukku hak danab,” atte ele amu, nug ag mamelag anuqak daatte.

¹² Ele amu, Abraham nug am danab gaɗalag otaɗak ele, nug ag mamelag ele daatte. Amu gaɗa otaɗaknuib iitta. Iitta. Ag gaɗalag otaɗna, ag Abraham baeg dim lamidna, ag oolagppa genab dootteb amunu, Abraham nug anukka gaɗa ii otaɗom dayaya heum bia hetteb.

Kayak nai qakkom, amuam ooppa genab doyaknu nai

¹³ Anukka Kayak Nug Abraham, amu nug buɗuppud ele Nug ag geha wan atu oh madakkunu nai qakka aum. Nug nai nuhig amu qakka aum, amge Abraham nug ɗo dim lamittom, diig amunu Kayak anam ii aum. Iitta. Abraham nug ooppa genab doye, Kayak nuhignu, “Genab tutukku hak danab,” awa awowa, Nug nai qakka anak nuhig amu aum.

¹⁴ Amunu danab ag ɗo dim lamidtteb ele, agib keeke amu oh aoglagnu daalob amu, ooppa genab doyak kobol am hamu daalo, amu Kayak Nug nai qakka aum ele, nai amuam bodoettak daalo.

¹⁵ Ɗoppa keeke ena amu bekkunu elele iitta. Aɗinu? Ɗo nug Kayak oppoɗi bak he bette, amge ɗo iitta dayeb amu, danab ag ɗo tippalkkulagnu am elele iitta.

¹⁶ Amu Kayak Nug nai qakka ana, ig eɗua awigkkunu aum, amge ig amu hamu mauhnoak aognignu ii aum. Iitta. Ig nuhignu oonigppa genab doota, ig aognignu aum. Ig ɗo dim lamidta aognignu ii aum. Ig ooppa genab doyaknu ib, ig ib amuppa aognignu diig am, ig Kayak Nug ehanittak okkai hamu megatte, kobol nuhig amuppaib ig aognignu babaittom. Aria, ib amuppa awaknu daatte dayeb amu, ig Abraham buɗub oh, laa ig Juda danab, laa ag Juda danab iitta, ig oh ig Abraham ooppa genab doyom, amubia ig oonigppa genab doot, nug buɗub daattem ele amu, ig oh ib amuppa Kayaknu keeke ena genabnab aognignu doognig. Aɗinu? Ib amuam danab oh tonadkkunu elele daatte. Anam daatte amunu, Abraham nug am ig oh ig mamenig daatte,

¹⁷ Amuam Kayak naippa, nai Abrahamnu inam daatte bia. “Da heppi, na wanppan wan laala kuɗum mamelag daakkut.” Abraham, nug Kayaknu ooppa genab doyom, amu Kayak Nug nuhignu, nug am ig oh ig mamenig daatte dabmette. Kayak Nugib danab mauhppig ele bauklel madatte amu, Nug keeke ii beppig ele, keeke beppig bia onilagppa ette.

¹⁸ Amu Kayak Nug Abraham nugnab bekka laa menukkunu a, Abraham amu doya, nug ooppa genab doyom. Keeke amu bekkunu am ib iitta, amge Kayak Nug Abraham bekka laa medakkunu a, Abraham nug ooppa genab doyom amunu, nug wanppan wan laala kuɗum mamelag beum; amuam Kayak Nug Abraham amegppa ⌊buɗupud kuɗumnab, hoɗoppai kuɗum daatteb bia daaglagnu⌋ inam aum bia. “Na buɗunad amu, geha ag anam daaglag,” awa aum.

¹⁹ Abraham nug doyom, nug maɗ nuhig 100 guguittak, nug beɗu amu bodoettak, amu Sarah nug ele anam daya, ⌊ah mattoi ele dayom⌋, amge Abraham nug amu doya, ooppa genab doyak nuhig ii paɗom. Iitta. Nug ooppa genab doyaya dayom.

²⁰ Aa anam daapiɗ, amge Kayak Nug keeke dimppa bekkunu nai qakka aum amunu, Abraham nug amunu oo aɗit ii daye, ooppa genab doyak nuhig ii paɗe neum. Iitta. Nuhig ooppa genab doyak ɠagattag mette, nug Kayak binag meum.

²¹ Nug doya malom, Kayak Nug haen matu keeke hekkunu nai qakka aum amu, Nug amu hekkunu elele.

²² Kayak Nug Abrahamnu ooppa genab doyak amu antta doyom, diig amunu Nug nuhignu “Nug am genab tutukku hak danab daatte,” awa aum.

²³ Nai imu, “Kayak nuhignu, ‘Genab tutukku hak danab,’ awa aum,” nai amuam Abrahamnuib ii daatte.

²⁴ Iitta. Ihinignu ele aakku atte. Ig Kayak Nug he, Jesus, ihinig Naɗi, Nug eɗua hibaittom amu, ig nuhignu oonigppa genab doottem, amu Kayak Nug ihinig ooppa genab doyaknu amu ele antta, ihinignu, “Ag am genab tutukku hak danab,” atte. Amunu nai amuam ig oh, ihinignu nai.

²⁵ Kayak Nug Jesus me uɗia, ihinig hipunin uhuqa megakkunu mauhom, amu ⌊ig Nug eɗua hibaittom anidta, nuhignu oonigppa genab doopput,⌋ Kayak Nug ⌊amuppa⌋ ihinignu, “Genab tutukku hak danab,” akkunu Nug he, Jesus eɗua hibaittom.