Rom 3 - Nobonob Baibel

Kayak Nug oo metta ii uuak kobol dim lamidtte

¹ Anam daatte amunu, Juda danab ag Juda daanna, ena dooglagnu ib laa elete? Ao, anam daatte amunu, Juda danab, ag gaɗa otaɗak aotteb amu, ag Juda danab daanna, keeke ena laa anidkkulagnu ib laa elelete?

² Yo, ag Juda daanna, gaɗa otaɗak aona, ehanittak digdig aoppig. Keeke anuqaknab amu inam. Kayak Nug nai nuhignab Juda ag atognona dim lamidkkulagnu mattom.

³ Genab, Juda danab laala ag nai amunu oolagppa genab ii dooppig, amge ooppa genab ii doyak ahilag amuam he, Kayak Nug aɗi hekkun attenu oo metta ii uuak kobol dim lamidtte, am nuhig kobol amu iitta meumte?

⁴ Iittanab! Danab oh ag hambuppulob, amge Kayak Nug nai hambuppuak ii mattima. Iitta. Nug nai doyak diig genabibppanu aakkuib maditte. Amu Kayak naippa nai laa daatte amubia. Nai amuam inam. “Da hipunin hemi amunu, na Kayak, haen na dahilnu, ‘Na hipunin heme,’ attem am genabib attem. Yo, haen na da hettoɗiakppa meiɗna, na tutukkuib hettem.”

⁵ Amge kobol nau ihinig am heeb, Kayak Nug genab tutukku hak kobol aakkuib hette, nuhig kobol amu miag atieb amu, attemu? Ig aɗi akkunig? (Da ig danab ihinig dabmak dim lamitte madittem.) Ig, “Haen Kayak Nug ihinig eheɗ haknu bu megatte amu, Nug nai doya mala hettoɗia epeɗia elele mettak kobol ii dim lamidtte,” aot akkunigte?

⁶ Iittanab! Kayak Nug nai doya hettoɗia epeɗia elele mettak kobol ii dim lamidlo amu, Nug attemnab danab oh dilag kobol epeɗiadlo?

⁷ Danab laa nug inam akkutai. “Amu hambuppuak dahilppa Kayak Nug hanhan aɗi nai maditte, aɗi keeke hette amu, Nug doyak diig genabibppanu aakkuib hette amunu, hambuppuak dahil am he, nuhig kobol amu miag atitte, binag amahlak oppiaawak ele Nug medatte amu, aɗinunab Nug da epeɗila, dahilnu, ‘Hipunin danab’ ana, eheɗ hak dahilnu nob nau meɗakku?

⁸ Aɗinu ig kobol ena bekkunu ig kobol nau ii hekkunig?” Laa nug anam akkutai, amge anam iittanab. Am elele iittanab, amge danab laala ag dahilnu baeg qak nai mattina, “Polnu nai ele anamib,” aon atteb. Amu dimppa geha Kayak Nug danab amu nob nau tutukku ahilag eheɗ hak eleleppa madakku.

Danab laa nug nukka genab tutukku hak danab ii beum

⁹ Aria, attemnab? Ig Juda ig iitta aɗi danab eɗadta, enaib daattemte? Iittanab! Ig matu amut, Juda, iitta aɗi ele amu hipunin nug ig oh tonikkom daattem.

¹⁰ Kayak naippa, nai amunu daatte am inam. “Danab laippu laa nug genab tutukku danab ii daatte. Iittanab!

¹¹ Danab laippu laa nug diignu doyak tutukku ele iitta. Amu danab laippu laa Kayak madikkunu ii hette.

¹² Danab oh ag Kayak dimedappig. Ag oh diilkad ena iitta. Laippu laa ena ii hette. Iittanab!”

¹³ “Mattiak ahilag am uɗig wak nau, mauhak moɗ ooppan bia. Ge, ag nai maditteb, amge nai amuam nai hambuppuak.” “Ag mat nau, danab emalatteg mauhtteb ele, amubia ag oɗelagppa nai nau maditteb.”

¹⁴ “Haen oh ag laa dilagnu eheɗ laa awaknu anak waappa dayaknu nai anana, ag nai nautud danab uug madakkunu amu maditteb.”

¹⁵ “Amu ag danab kekeɗ mattan aqaglagnu pahaettak hetteb.

¹⁶ Ag aɗi aɗi hetteb ele amu, ag amuppa keeke heeg nauhtte; ag heeg, uug okkai daatte.

¹⁷ Ag laa ele maɗoɗ ele daaglagnu oolag ii maidtte.

¹⁸ Ag Kayaknu ebehilag oh bodoetta le mak ii dootteb ⌊amunu, ag aɗi hekkulagnu oolag daatte amu, ag hetteb⌋.”

¹⁹ Anam amu, danab laippu laa nug, “Da am genab tutukku hak danab,” akkunu elele iittanab daakkunu, danab oh wan atu ohppanu ag Kayaknu epeɗiak waappa daaglagnu, ig ɗo nai nug aɗi atte amu, nug danab oh dilagnu atte doottem.

²⁰ Ɗo nai am danab oh dilag daatte, amge danab ohnab ag pehettak ii dim lamidtteb amunu, ɗo dim lamittak kobolppa danab laippu laa Kayak amegppa genab tutukku hak danab daakkunu elele iittanab. Aɗinu? Ɗo nai am ig hipunin ihinig uhuqa megakkunu keeke iitta. Ɗo nug he, eheɗ hak ihinig miag atitte aakkuib.

Danab Kristusnu ooppa genab dootte am genab tutukku hak danab

²¹ Amge gemu Kayak Nug he, ig Nug noobppa genab tutukku hak danab ah daagnignu ib laa, ɗo nai, amu propet nai ele aa ib amunu mehuqpiɗ amu, ib amu miag atiom. Ib amuam ig ɗo dim lamidta, Kayak noobppa genab tutukku daagnignu, am ib amu iitta.

²² Da ib laanu attem amuam inam. Danab nug Jesus Kristusnu ooppa genab dootte amu, Kayak nuhignu, “Genab tutukku hak danab,” awa atte. Ib amuppa amu aun aɗi oh ag oolagppa genab dootteb ele, Kayak Nug ahilagnu, “Genab tutukku hak danab,” awa atte. Danab laippu laa nug ib laappa genab tutukku hak danab bekkunu ib laa ii daatte.

²³ Aɗinu? Ig danab oh ig hipunin hemut amunu, ig Kayak Nug ihinignu ig attem daagnignu dabmeum amu, ig amubia laa ii daattem.

²⁴ Kristus Jesus Nug qagaiettakppanu eɗua uhuqaknu ib babaittom, amu ib amuppa Kayak Nug ehanittak okkai hamu mekke, ig genab tutukku hak danab daattem.

²⁵ Anukka Kayak Nug eheɗ haknu nob elele eɗua mettak uua, danab dilag hipuninnu nob nau paha ii mattom amunu, Nug tutukkuib daatte, Nug amu ippunigkkunu haaha, Nug ig aun laa ig Jesus tiigppanu oonigppa genab doottem, Jesus Nug ihinig eheɗ haknu nob nau Nug tiigppa iitta mekkunu heeb elele medakkunu Nug tituanom.

²⁶ Nug ig gemu daattem, ig Kayak Nug am tutukkuib daatte doognignu Nug anam heum. Nug ig anam doognignu, Nug danab oh ag Jesusnu oolagppa genab dootteb ele, Nug tutukkuib ha, Nug ahilagnu, “Genab tutukku hak danab,” awa atte ele ippunigkkunu, Nug anam heum.

²⁷ Anam daatte amunu, ig ikka oninig humagnignu ib adekku daatte? Ib amu laa iitta. Ib amu matu keldoum daatte. Amu aɗi keeke ib amu keldoum? Amu ɗo dim lamittak kobolte? Iittanab! Ooppa genab doyak, kobol amu ib amu aakku keldoum daatte.

²⁸ Aria, ig inam attem. “Danab nug ooppa genabib dootte ele amu, Kayak Nug nuhignu, ‘Genab tutukku hak danab,’ awa akku,” aot attem. “Amu danab nug ɗo dim lamidtte, Kayak Nug nuhignu, ‘Genab tutukku hak danab,’ ii ama,” aot attem.

²⁹ Amu attemu? Kayak Nug am Juda dilagib Kayakte? Nug iitta aɗi dilag Kayak ele iite daatte? Yo, Nug am iitta aɗi dilag Kayak ele daatte.

³⁰ Aɗinu? Kayak laippuib daatte. Anam amu, Nug danab gaɗa otaɗak ele, Nug danab amunu ooppa genab doyak, diig amunu, Nug danab amunu, “Genab tutukku hak danab,” awa akku. Amu danab nug gaɗa ii otaɗak ele, Nug danab amu ele, nuhig ooppa genab doyak, diig amunu, danab amunu, “Genab tutukku hak danab,” awa akku.

³¹ Amunu ig ooppa genab doyak amuppatai ɗo qeut neumte? Iittanab! Ig ɗo aakku qappamut daatte.