Rom 16 - Nobonob Baibel

Pol nug danab ah kuɗum humittak nai mattom

¹ Pibi, nug ah ena, ig hettem bia Jesusnu ooppa genab dootte, Senkria Kristen tamaniakppa toliak ah daatte amu, nug ahilagppa gokku amunu, da nuhignu, nug am ah ena doyeye, nug onig iikku diien ag ippunadttem.

² Nug ag ele oh ag Jesusnu oolagppa genab dootteb amunu, ig Kayaknu danab ah oppiaawak ele, ig laa nug bia ehanidkkunignu doottem, amubia ag nug aon ehanidkkulagnu oɗ madattem. Nug keeke laanu oo uug dayeb, ag ehanitteg! Aɗinu? Nug danab kuɗum laa ehanattom, da ele ehaniɗom amunu, nug ag anam ehanidkkulagnu elele daatte.

³ Amu ag humittak dahil Prisila, Akwila ele mateg! Aa da ele, ig oh Kristus Jesusnu daatta, nuhig uɗatnu kadoi laippu daattem.

⁴ Aa da mauhpanu amu aa mauhak ib oɗeppanab oiyya ehaniɗpiɗ. Da aa amelahppa, “Ena hepiɗ,” awe attem, amge da dakka anam ii hettem. Iitta! Iitta aɗi dilag Kristen tamaniak oh ele ag anam dootteb.

⁵ Amu humittak dahil Kristen tamaniak aa laulahppa qagmetteb ele matteg! Amu ag humittak dahil Epainetus, da layalnab, nug ele metteg! Nug Asia prowinsppanu danab oh ag Jesusnu oolagppa dooppig amu, nug amunu danab tatam ooppa genab doyom.

⁶ Amu ag humittak dahil Maria metteg! Nug uɗat naɗi ag ehanadkkunu heum.

⁷ Amu ag humittak dahil Andronikus, Junias ele mateg! Aa am da ele ig oh Juda danab amu, ig haen laippu oh maniguittakppa daamut. Totol danab ag danab aɗit amu, ag ahilahnu ena elele doyak okkai dootteb. Da Jesusnu ooppa genab doyak danab ii bein daaiyi, aa tatam Kristusnu daapiɗ.

⁸ Amu ag humittak dahil Ampliatus metteg! Nug am Naɗinu kobolppa dahil layamnab.

⁹ Ag humittak dahil Urbanus metteg! Nug ig ele, ig oh Kristusnu daatta, nuhig uɗatnu kadoi laippu daattem. Amu humittak dahil Stakis ele metteg! Nug am da layalnab.

¹⁰ Amu ag humittak dahil Apeles metteg! Nug Kristusnu daatte. Dayaya amu, nug ma anttak awa, elele ha, amuppa nug am onig ele. Amu ag humittak dahil danab Aristobulus laugppanu ele matteg!

¹¹ Ag humittak dahil Herodion metteg! Nug am da ele i Juda danab. Amu ag humittak dahil Narsisus laugppanu danab laala ag Jesusnu oolagppa genab dootteb ele, ag matteg!

¹² Ag humittak dahil Tripina amu Triposa ele mateg! Aa Naɗinu uɗatppa wagai mettep. Ag humittak dahil Persis metteg! Nug am da layalnab. Nug am ah laa nug Naɗinu uɗat okkainab heum.

¹³ Amu ag humittak dahil Rupus metteg! Nug Naɗi dim lamidkkunu amu, danab enanag. Nug anig amu, nug dahilnu da anil bia hette, amu nug ele am humittak dahil metteg!

¹⁴ Amu ag humittak dahil Asinkritus, Plegon, Hermes, Patrobas, Hermas amu ag lailkad ag ele oh daatteb amu, ag ele humittak dahil matteg!

¹⁵ Ag humittak dahil Pilologus, Julia, Nereus, ah laa, nug Nereus ele aa am eappinag, amu Olimpas ele, amu Kayaknu danab ah oppiaawak ele oh ag ele daatteb, amu oh ele matteg!

¹⁶ Ag Kristen kobol oppiaawak eleppa, ag nug humittak heig! Kristusnu tamaniak oh ag ahilag humittak ag madatteb.

Bataknu nai

¹⁷ O lailad, nai ag aoppig amu, danab laala ag nai amu tappaeg neene, ag heeg, tamaniak ooppa obatak obatak daatteb, danab ah dilag ooppa genab doyak ele kobolitteb amu, da ag Rom daatteb, da danab amu dilagnu dabmena autna aoglagnu dabmak ahilkad maɗedattem. Ag danab amu dilagnu awaidna, dekkaɗnana dayeg!

¹⁸ Danab amu ag ihinig Naɗi Kristus waappa daan nuhig uɗat ii hetteb. Iitta. Ag am beɗulagnu dabmak nau amuib dim lamidtteb. Amu oo eeɗaknu nai ittag ele, ag amuppa danab ag kobol atten am ena, kobol atten am nau ii dootteb ele amu, ag buppualadtteb.

¹⁹ Ag Rom danab ag Kayak oɗe dim lamidtteb amu, nai amu danab oh ag doon malappig daatteb amunu, da ahilagnu maɗoɗppan gamag ahak okkai doottem, amge da ag kobol enanu doyak dabmak ena ele dim lamidna kobol amu hena, kobol tutukku iittanu amu nakok laa ii helobnu ool okkai daatte.

Danab laala ag Rom dilag humittak nai meeg ukkom

²⁰ Haen elab iitta Kayak, Nug am maɗoɗ diig amu, Nug geha Satan tappeb na, ag baelag waappa daakku. Naɗi Jesusnu ehanittak okkai hamu mettak ahilagppa dayaɗ!

²¹ Dahil uɗat laippu Timoti, nug ele ag humadtte. Lusius, Jeson amu Sosipater ele, ag da ele ig oh am Juda danab amu, ag ele ag humadtteb.

²² Aria, da Tertius, da Pol oɗe awe, nai imu ahilagnu yaami amu, da ag ele, ig oh Jesusnu oonigppa genab doottem amu, da ag humadttem.

²³ Amu Gaius, da nug laugppa daaiyi, nug da atognoiɗtte, Kristen tamaniak nug laugppa ele qagmetteb amu, nug ele ag humadtte. Amu Erastus, nug am aab imunu men doɗo gumak danab, amu ig lainig Kwartus ele, aa ele ag humadttep.

²⁴ ((Ihinig Naɗi Jesus Kristus, nuhig ehanittak okkai hamu mettak amu ahilagppa dayaɗ! Genab.))

Kayak binag maknu nai

²⁵ Ig Kayak binag metu! Nug da Jesus Kristusnu Nai Ena mehuqttem bia, amu nai lokkumak anukkanu dayom, nai amu atte, amubia ele, Kayak Nug ag ahilag ooppa genab doyakppa ɠagattag daaglagnu ehanadkkunu elele daatte.

²⁶ Nai lokkumak dayom ele, amuam genab lokkumak dayom, amge gemu propet dilag yaakppa nai amu aakku miag atiom. Amu Kayak hanhan daatte ele, Nug a, danab iɗu iɗu oh, ag oolagppa genab dooglagnu, ag Nug oɗe dim lamidkkulagnu nai amu ig mehuqttem.

²⁷ Kayak, Nug nukka doyak dabmak ena ele, Nug Jesus Kristus nuhig uɗatppa hanhan binag amahlak oppiaawak ele awaɗ! Genab.