Rom 15 - Nobonob Baibel

Kristusnu dabmak dim lamittaknu nai

¹ Ig danab ig oonigppa genab ɠagattag doottem ele, ihinig uɗat am danab ag oolagppa genab ɠagattag ii dootteb ele ag ehanadkkunignu daatte. Ag akka ahilag uug maoglagnu elele iitta amunu, ig ehanadta, uug ahilag maotu! Amu ig ikka ig aɗi hekkunignu oonig daatte amu, ig ihinig dabmak amuib aib dim lamidta oimut.

² Ig anen anen ig lainkad ag ena bekkulagnu ehanadta, ag geha ɠagattag aoglagnu daattem.

³ Aɗinu? Kristus ele, Kayak naippa nai nuhignu daatte amu, Nug nukka nuhig dabmak ii dim lamidttom. Nai amuam inam. “⌊O Kayak,⌋ danab ah ag na aon aon naunab nidatteb amu, nai nau amu dahilppa aakku uɗia, da yaaiɗtte.”

⁴ Danab ag Kayak nai yaappig amu, ig nai amu ebqetata, ig ippunittak aognignu yaappig. Ig Kayak aɗi keeke ena megakkunu aumnu dabmak aɗat daagnignu, ig nai amu ebqetata, ig oo maɗoɗ ele dayak kobol anidta doot, ig Kayak tuɗidta dim lamidkkunignu oonigppa ɠagattag qak ele aottem.

^5-6 Amu ag oolag laippu daanna, oɗelag oh ob, ag Kayak, Nug am ihinig Naɗi Jesus Kristus Mameg, Nug binag mekkulagnu, ig Kayak, Nug am oo maɗoɗ ele dayak amu ɠagattag dayak elenu diig amu, Nug ag ehanatteb, ag Kristus Jesus dim lamidnana, ag dabmak laippu aɗan oiglagnu oonig daatte.

⁷ Anam amunu, ag Kayak binag mettaglagnu Kristus Nug ag diiom bia ag oh ag lailkad diippeg, oolag laippu dayeg!

⁸ Da inam attem. Kristus, Nug Kayaknu nai ig alankad amelagppa qakkatta aum amu, nai amuam genab miag atikkunu, Kristus Nug Juda dilag maɗi nid beum.

⁹ Nug amu heumnu diig laa am iitta aɗi ag Kayaknu oo gai-iitta doya oo metta ehanittak kobol anidna, Nug binag mekkulagnu ele heum. Kayak naippa, nai amunu inam daatte. “Amunu da na onin iitta aɗi danab ah oh oolagppa humakkul. Ao, da na onin humakkulnu ahi edakkul.”

¹⁰ Kayak naippa, nai laa am inam. “Ag iitta aɗi danab ah, amu Kayaknu danab ah ele, ag oh maɗoɗppan gamag ahak doyeg!”

¹¹ Aria Kayak naippa, nai laa ele am inam. “O ag iitta aɗi danab ah oh, ag Naɗi binag meig! Ao, ag wanppan huu ohppan danab ah, ag Nug binag meig!”

¹² Amunu nai laa am, Aisaia nug ⌊Kayak oɗe awa,⌋ nai imu ⌊Kayak naippa yaak daatte⌋ aum. “Genab, Jesi buɗubppanu danab laa ba dayaya, Nug geha wanppan wan ohppan danab ah dilag gumitta danab daakku. Nug beeb amu iitta aɗi ag geha nuhigppa ehanittak aoglagnu dabmak aɗan daaglag.”

¹³ Amu Kayak Ouɗinu ɠagattagppa ag butti aɗi hab aabnu keeke aoglagnu dabmak aɗan daan autna aoglagnu, da ag Kayak, Nug am aɗi keeke oh ena bekkunu dabmak aɗa dayaknu diig, ag nuhignu oolagppa genab doobppeg, Nug heeb, ag oolagppa maɗoɗppan gamag ahak okkai, amu maɗoɗ ele naɗi daaglahnu ool daatte.

Pol nug iitta aɗi dilagnu uɗat heum

¹⁴ O lailad, da dakka da ag haen oh kobol ena hetteb, ag dabmak ena okkainab aoppig, amu ag akka akka nug ippunittak hekkulagnu, da amu ohnu oolppa genab doottem.

¹⁵ Amge da nai laala ahilagnu nakok ɠagattag yaaladmi amu, da nai amuppa dabmak ahilag maɗedakkulnu dabmemi. Aɗinu? Kayak Nug da ehanittak okkai hamu meɗa he,

¹⁶ da iitta aɗi ag oolagppa uɗat hekkulnu Kristus Jesusnu maɗi nid bemi. Da iitta aɗi ag Kayak Nug oo daatte amubia daaglagnu, Kayak Ouɗi Nug heeb, ag oppiaawak danab bena daaglagnu, da ag diie, Kayak medakkulnu mana mettak danab bia bein, Kayaknu Nai Ena mehuqttem.

¹⁷ Amunu da Kristus Jesusnu dayeye, da uɗat heinne, da Kayak uɗat hettemnu amu da maɗoɗppan gamag ahak doottem.

¹⁸ Da keeke laalanu ii madipa. Iitta. Da keeke laippunuib madikkul. Amuam Kristus Nug ehaniɗa, dahil naippa, dahil uɗatppa ele Nug he, iitta aɗi ⌊kuɗum⌋ ag aakku Kayak oɗe dim lamidppig.

¹⁹ Ele amu, iitta aɗi ag Kayak dabmettaknu kobol danab haknu elele iitta okkai okkai, amu kobol danab haknu elele iitta digdig ele Kayak Ouɗinu ɠagattagppa da hei anidna, ag Kayak nai dim lamidppignu madikkul. Nug anam ehaniɗom amunu, da Jerusalem appa digmein, Kristusnu Nai Ena ohnab mehuqeqe, aben ohppa ele oii ukke ukke, Ilirikum aabppa batami.

²⁰ Da uɗat amu heinne amu, da danab laa ag tatam tamaniak buueg beum daatte amuppa nai mehuqkkulnu ool ii daatte. Iitta. Da aben laalappa Kristus onig ii dooppig ele, ahilagppa Nai Ena madikkulnu da ool okkainab daatte.

²¹ Amge amuam Kayak naippa, nai daatte amubia. Nai amuam inam. “Keeke ag nuhignu ii dooppig amu, ag anidkkulag. Ge, laa ag nuhignu keeke laalanu a ii dooppig ele amu, ag amu doon maidkkulag.”

Pol Rom anttowa Spen gokkunu dabmeum

²² Da uɗat amu heinne daami amunu, da ag Rom daatteb, da ahilagppa gokkulnu dabmeiyi, haen kuɗum uɗat amu da okkuliɗom.

²³ Amge gemu amu da wan atu laih ippa amu uɗat hein malami. Amu da matu ami, da maɗ kuɗum ahilagppa gokkulnu dabmettami,

²⁴ amu da geha wan laa onig Spen appa gokkulnu dabmettem amunu da appa ugekke, da tatam ag anattoya gokkul. Da ag ele appa nakok daat, ool meeb, ahilag ehanittakppa da Spen gokkul.

²⁵ Amge geha iikku amu, da Kayaknu danab ah oppiaawak ele Jerusalem daatteb amu, da ag ehanadkkulnu gottem.

²⁶ Aɗinu? Prowins Makedonia, Akaia ele, danab appanu ag Kayaknu danab ah oppiaawak ele Jerusalem daatteb, ag keekenu tutu men daatteb amu, ag ag ehanadkkulagnu keeke nakok laa qagmaadna, ag meppeg gokkunu maidppig.

²⁷ Am genab ag oolag ena daye, akka ahilag dabmakppa anam heppig. Aɗinu? Ag Jerusalem dilagnu keeke nob eɗua mettak bia hekkulagnu daatte dootteb. Ag anam hekkulagnu dottebnu diig am, Kristusnu nai nug Juda ahilagppanu aha, iitta aɗi dilagppa ukkom amunu, iitta aɗi ag beɗunignu keeke, amuppa Juda danab keeke nob eɗun mattaglag am ena dootteb.

²⁸ Amunu da uɗat amu heppi gog tekkunu gottem. Da keeke ena amu Jerusalem danab da eppelagppanab maattoya amu, da geha Spen gokkulnu ugekke, ag ele anattoya gokkul.

²⁹ Da doottem, geha Kristusnu itittak ena ag ehanattaknu am dahilppa ambak dayebeb, ag gumatte wakkul.

³⁰ O lailad, da ag ihinig Naɗi Jesus Kristusnu, amu Kayak Ouɗinu oo mauhak ihinignu dootte, amu ele dabmebeppeg, ag da aɗi aɗi uug maottem ele, ag da ele ig oh ig Kayak dahilnu unuqidkkunignu ahilkad dabmak maɗedattem.

³¹ Amu ag Kayak da ehaniɗa, Juda laala ag oolagppa genab ii dootteb ele, Nug da ag eppelagppanu eɗua awiɗkkunu unuqitteg! Ag Kayak Nug heeb, nuhikkud danab ah oppiaawak ele Jerusalem daatteb ele, da uɗat ag ehanadkkunu hekkulnu hettem imu amu, ag amunu oolag hekkunu unuqitteg!

³² Anam dayeb amu Kayak Nug ele oo dayeb amu, da maɗoɗppan gamag ahak ele ahilagppa wain, ag ele haen tutu laa daapput, ig oh nug oo ɠagattag qak doognig.

³³ Kayak, Nug am maɗoɗ diig, Nug ag oh ele daaglagnu ool daatte. Genab.