Rom 13 - Nobonob Baibel

Wannu toliak waappa dayaknu nai

¹ Gabman uɗat am nukka ii beum. Iitta. Gabman uɗat oh Kayak nukka meum amunu, danab oh ag danab gumaknu ehah ele waalagppa dayeg! Gumaknu ehah anen anen oh daatteb amu, Kayak maattom daatteb

² amunu, danab nug danab gumaknu ehah ele waappa ii daya tappe nak kobol hette, nug keeke Kayak qappom waappa ii daya tappe nak kobol hette. Amu danab ag kobol anam hetteb amu, ag geha ahilag hak nau amunu nob nau aoglag.

³ Aɗinu? Danab ag gumaknu ehah ele ag danab kobol tutukku hetteb ele, ag ag baɗadkkulagnu ii daatteb, amge ag danab kobol tutukku ii hetteb ele, ag baɗaglagnu daatteb. Amunu ag danab gumaknu ehah ele ii baɗidkkulagnu oolag daatte dayeb, ag kobol tutukkuib heig! Ag anam hekkulag dayeb, ag danab gumaknu ehah ele, nuhigppa binalag aoglag.

⁴ Laa nug gumaknu ehah ele nug ele am Kayaknu maɗi nid, ag ehanatteb ena daaglagnu daatte. Amge ag kobol tutukku ii henana amu, ag baɗeg! Ag dootteb, nuhig ɠagattag am keeke hamu iitta. Uɗat amu Kayak Nug mettom amunu, danab ag kobol tutukku ii heppeg, nug nob nau madakkunu daatte.

⁵ Amunu ig danab gumaknu ehah ele waalagppa daatun! Ig nob nau awaknu aakkuib baɗata, ag waalagppa ii daamta. Iitta. Ig oonigppan oiyak ippunittaknu ulum am ig anam hekkunignu ele ippunigtte amunu, diig amunu ele ig danab gumaknu ehah ele waalagppa daatu!

⁶ Laa ele amu, danab ag gumaknu ehah ele, ag ele Kayaknu maɗi nid daatteb, ag uɗat amu ena gokkunu dabmedatteb, amu diig amunu ag ag takis madatteb.

⁷ Aria, ag keeke iɗu iɗu gabmannu danab mattaglagnu daatte amu, ag mattaglag. Gabmannu takis awaknu danab, ag amunu men doɗo aoglagnu dayeb amu, ag amu matteg! Ag danab laanu ena elele dooglagnu daatte dayeb amu, ag aakku nuhignu anam doyeg! Amu ag danab laa binag mekkulagnu daatte dayeb amu, ag nug binag metteg!

Ɗo tutukku dim lamittaknu meu am oo mauhak

⁸ Ag danab laanu lon aona amu, ag eɗun mekkulagnu haen anidna, ag aib uuppeg, hamu dayom. Ag daden meig! Laippuib, ag laa dilagnu oo mauhak kobol heppeg, elele mekkunu elele iitta amunu, ag amu hekkulagnu haen oh dabmetteg! Aɗinu? Aun nug kobol anam dim lamidtte amu, nug ɗo oh elele medatte.

⁹ Ɗo imu oh, “Na ewau aib pakkuna gappai heme; na danab aib qeppe mauhom; na yab aib heme; na layapnu keeke aib amen qeeb aolomnab dabmak eheɗ aome,” ele, ɗo amu, amu ɗo laala ele daatteb, amu oh dilag ikki tamaniak, ɗo okkai laippu daatte am inam. “Na nakka nahipnu oot mauhtte, amubia na laipad dilagnu oot mauhaɗ!”

¹⁰ Danab nug layagnu oo mauhtte dayeb amu, nug layagnu eheɗ laa ii hette amunu, danab laa nug layagnu oo mauhtte dayeb, nug ɗo laa oh ele aakku tutukku dim lamidtte.

¹¹ Laa ele amu, ag haen gemu ig daattem ele imu ag doyeg! Gemu am ag niiak uuna ahaglagnu haen daatte. Aɗinu? Anukka haen ig baubunab ooppa genab doomut amu, Kayak ig eɗua awikkaknu haen gogppa tekkunu am uma dayom bia, amge gemu am haen amu nakok gukkuikkak doum daatte.

¹² Tuqan iitta mekkunu hette; wagɗak bekkunu miagnab daatte amunu, ig gatatunu kobol oh dimadatta, ig amahlaknu bannu bala aot beɗunigppa metu!

¹³ Amu ig danab nug amunppa tutukku kobolppa oitte bia oitu! Ig aib goɗak qiɗ nau heta, le ɠagattag nau ele aib laut, kaaka iqom. Ig aib gappai kobol heta, hipaɗu ahak kobol ele aib hemut. Ig aib nug aidtata, laa dilagnu, ihinigppa anam daalon dabmak aib aɗat daamut.

¹⁴ Ag amu oh aib heppig. Ag Naɗi Jesus Kristus ele ouqena, nuhig kobol ele aon oiyeg! Am ag beɗulagnu dabmak nau dim lamidkkulagnu aib dabmeppig.