Rom 12 - Nobonob Baibel

Kayaknu uɗat haknu nai

¹ Amunu O lailad, Kayak Nug ahilagnu keeke okkainab heum amunu, da ag akka ag danab nug doɗ mana Kayak medatte, amubia ag bau daanna, meulkad oh Nug mettaglagnu unuqadttem. Ag meulkad oh ag Kayaknu oppiaawak ele daanna, Kayak oo niitte bia ele daanna, ag Nug metteg! Ib amuppa ag genab Nug noobppa dup nona binag mettaglag.

² Danab laa ag wannu haen imuppan kobolnuib guattak oitteb, ag amubia aib oippig. Iitta! Kayak Nug heeb, ahilag dabmak ena bau beeb, ag oiyak bauppa oiyeg! Ag anam henana, ag Kayak, Nug ag aɗi hekkulagnu dabmaknab aotte, ag amu dooglag. Ag amu doona, ag Kayak Nug aɗi haknu ena dootte, aɗi haknu enanag dootte, aɗi haknu elelenab dootte amu, ag amu ele dooglag.

³ Kayak Nug da ehanittak okkai hamu meɗom amu, da amuppa ag anen anen amelagppa attem. Ag akka anen anen ag, “Dahil hak, dahil oiyak ele am enanag,” amge nahip hak, nahip oiyak ele am melemel amuppa ii bette amu, ag anambia aib dabmeppig. Iitta. Kayak Nug ooppa genab doyak ahilag ag anen anen matte, ag uɗat hetteb ele amu, ag amu dabmenan, ag akka anen anen ag dabmak tutukku aon oiyeg!

⁴ Ig danab ah, ig oh anen anen, ig beɗunig piɗe piɗe. Aria, ig beɗunig piɗe piɗe amu, ag am laih kuɗum, amu laih kuɗum amu ag ahilag uɗat ele laippu iitta daatteb.

⁵ Anam amu, ig oh Kristusnu daattem, ig danab nug beɗu am laih kuɗum ele, amge beɗu am laippu daatte, amubia ig am kuɗum, amge laippu daattem. Beɗu laippu ooppanu laih naunau, ag nug ehanidnana daatteb, amubia Kristen tamaniak ele anam daatte.

⁶ Kayak Nug ig anen anen uɗat laala hekkunignu ehah mekkom amunu, danab laa nug nuhig ehah am propet nai mehuqaknu daatte dayeb, nug ooppa genab doyak nuhig dim lamitta nai mehuqaɗ!

⁷ Aria, danab laa nug nuhig ehah am laikkud laa ehanattaknu daatte dayeb, nug laikkud laa ehanattak uɗat genab haɗ! Danab laa nug nuhig ehah am laikkud keeke ippuanattaknu daatte dayeb, nug ippuanattak uɗat tutukku haɗ!

⁸ Danab laa nug nuhig ehah am laikkud oolag ɠagattag qettaknu daatte dayeb, nug amu tutukku haɗ! Amu danab laa nug nuhig ehah am nug laikkud keeke mattaknu daatte dayeb, nug keeke happiak mettaɗ! Danab laa nug nuhig ehah am gumak uɗat haknu daatte dayeb, nug gumak uɗat amu pehettak haɗ! Aria, danab laa nug nuhig ehah am layagnu oo gai-iitta doya oo metta ehanittak haknu daatte dayeb, nug oo gamag ahak enappa ehanittaɗ!

Layagnu nug oo mauhaknu kobolnab

⁹ Ag lailkad dilag oo mauhak genabppa oolag mauhaɗ! Ag aib hambuppuak bia heppig. Ag kobol eheɗnu nau ninig ele doyeg! Ag kobol ena amuib aɗan autna aweg!

¹⁰ Amu ag lailkad ena daaglagnu oolag mattan, ahilagnu oolag mauhaɗ! Ag oh nug binag mettak elelenab heig!

¹¹ Amu ag aib bahilag yom. Iitta! Ag Kayak Ouɗinu ehanittakppa yagbak doon, Naɗinu uɗat pehettak hekkulagnu ag oolag metteg!

¹² Amu ag Naɗi ehanadkkunu dabmak aɗan daanna, ag maɗoɗppan gamag ahak doyeg! Uug laa ahilagppa uɗieb amu, ag ɠagattag dayeg! Amu ag hanhan unuqitteg!

¹³ Kayaknu danab ah oppiaawak ele laa ag keekenu tutu daappeg amu, ag ehanatteg! Laa dilagnu ag nug ehanittak heig!

¹⁴ Danab laa ag ahilagppa eheɗ heppeg amu, ag itittak ena ag matteg! Ao, ag itittak ena mattana, ag aib amu dilag, ag eheɗ laa awaknu anak waappa daaglagnu appig.

¹⁵ Danab ag maɗoɗppan gamag ahak dootteb ele, ag ele oh maɗoɗppan gamag ahak doyeg! Danab gaappeg, ag ele oh gayeg!

¹⁶ Ag oh laippu daan, oolag maɗoɗ ele dayeg! Ag dada kobol aib dim lamidppig. Iitta. Ag danab binag okkai iitta ele oh oiyeg! Ag akka ahilagib dabmena, “Da dakka iikku doyak ena ele,” aib appig.

¹⁷ Amu laa ag ahilagppa eheɗ laa heppeg, ag aib nob nau mattana, amu dilagppa eheɗ heppig. Ag danab oh amelagppa kobol enappa oiglagnu dabmak aweg!

¹⁸ Maɗoɗ dayaknu amu, ag aɗi aɗi heppe, maɗoɗ ba daakkunu daatte amu, ag amu henana, laa dilag ele maɗoɗ daaglagnu ib daatte ele, ag ib amu dim lamitteg!

¹⁹ O lailadnab, laa ag ahilagppa eheɗ heppeg amu, ag nob nau aib meppig. Uuppeg, Kayak nukka heeb, nuhig oppoɗi bak amu, ag amu aoglag. Amuam Kayak naippa, nai daatte amubia. “Eheɗ haknu nob tutukku eɗua mettak uɗat am dahil. Da geha aun aɗi ag eheɗ hetteb amu, da nob nau madakkul.” Naɗi Nug anam atte.

²⁰ Aakku ag laa ag ahilagppa eheɗ heppeg, ag nob ii memana. Iitta. Ag Kayak naippa nai daatte, ag amubia hekkulag. Nai amuam inam. “Nahip kekeɗ enug qeeb, na ee mette! Ao, nug le baag diieb, na nug le mette! Na anam hekkut dayeb, na nug oo eɗukkunu ehanidkkut,” awa atte.

²¹ Aria na aib heppe, kobol eheɗ na eɗittom. Iitta! Na kobol ena henana, na kobol eɗitte!