Rom 10 - Nobonob Baibel

Kayak Nug danab ah oh eɗua diikkunu oo daatte

¹ O lailad, Kayak Nug danab dahilad, Israel, ag eɗua diikkunu ool unuqag ele doyeye, da amunu Kayak unuqidttem.

² Da Juda ahilagnu doye aute aottem amunu, da miag atiak iikku attem. Ag am Kayaknu kobol dim lamidkkulagnu ag yag-nab-bak dootteb, amge ag doyak ena iitta ele amu hetteb.

³ Amu Israel ag Kayak Nug ihinignu, “Genab tutukku hak danab,” atte ele, ag amunu oolag ii maitte, ag akka ag oolagppanu kobol laappa genab tutukku daaglagnu amuib hena, ag Kayak Nug ahilagnu, “Genab tutukku hak danab,” akkunu amu ag uuppig.

⁴ Juda ag anam hetteb, amge Kristusnu uɗat okkaippa, ig oonigppa genab doottem ele amu, ig ib amuppa genab tutukku hak danab bemut daattem. Ig ɗoppa genab tutukku danab ah ii bettem. Uɗat amu Kristusnu uɗat okkaippa aakku iitta meum amunu, danab oh ag Kristusnu oolagppa genab dootteb aakkuib Kayak Nug ahilagnu amu, “Genab tutukku hak danab,” awa atte.

⁵ Moses nug danab ag ɗo kobol dim lamitteg, Kayak ahilagnu, “Genab tutukku hak danab,” akkunu dabmetteb ele, nug ahilagnu inam yom. “Danab nug dahil ɗo anam dim lamidkku dayeb, amuppa nug bauklel daakku.”

^6-7 Amge danab nug ooppa genab doyak ibppa genab tutukku hak danab bekkunu dabmette amu, dabmak amunu Kayak naippa, nai daatte am inam. “Na ootppa, ‘Aun nug hab aabppa tekku?’ aon aib ame. (Amuam nug ta, Kristus omala nekkunu atte.) O iitta na, ‘Aun nug mauhak abenppa nokku?’ aon aib ame.” (Amuam nug noa, Kristus omala bekkunu atte.)

⁸ Amge nai amu aɗi atte? Am inam atte. “Nai amu na guguittaknab daatte, na oɗenppa, na ootppa ele daatte.” Nai amuam ooppa genab doyaknu nai; nai ig mehuqttem ele.

⁹ Amu nai amuam inam. Na oɗenppa, “Jesus am Naɗi,” genab akkut, Kayak Nug Jesus mauhakppanu he eɗua hibaittom ele ootppa genab dookkut amu, Kayak na eɗua awidkku.

¹⁰ Amunu diig am, danab nug nuhig oo unuqagppa ⌊Jesusnu⌋ ooppa genab dootte, amuppa ⌊Kayak he,⌋ nug genab tutukku hak danab daatte. Ge, danab nug oɗeppa nuhig ooppa genab doyaknu maditte, amu ooppa genab doyak amuppa Kayak Nug danab amu eɗua aotte.

¹¹ Kayak naippa, nai laa kobol amunu daatte am inam. “Danab aun nug nuhignu ooppa genab dookku amu, nug uɗa nak iinab aoma,” awa atte.

¹² Nai amuam ooppa genab doyaknu kobolnu Juda amu iitta aɗi ele ag Naɗinu neekkakppa huu piɗe piɗe daatteb ii ippunigtte. Iitta! Kayak laippuib, Nug am danab oh dilag Naɗi daatte, amunu danab aun aɗi ag Nug onigppa etteb ele, Nug ag itittak ena okkai madatte.

¹³ Aɗinu? ⌊Kayak naippa, nai laa inam daatte.⌋ “Aun laa nug Naɗi onigppa eeb amu, Naɗi Nug ehanitteb, nug padal ii mema.”

¹⁴ Amge laa ag nuhignu oolagppa genab ii dootteb ele, ag attem hena, onigppa ekkulag? Amu laa ag nuhignu nai ii dooppig ele, ag attem hena, ag nuhignu oolagppa genab dooglag? Amu laa nug ag amelagppa ii mehuqeb amu, ag attem hena dooglag?

¹⁵ Amu laa ag mehuqak danab laa ii otialadna maadppeg gokkulag amu, ag attem hena, nai mehuqkkulag? Kayak naippa, nai daatte bia. “Danab laa nug uɗia, danab ah amelagppa nai ena maditte, danab ah laa oh dilag neekkakppa amu, danab amu nug enanag hette anidtteb,” awa atte.

¹⁶ Amge Juda danab dilagnu, ag ohnab Nai Ena imu ii aon dim lamidppig; laa aon dim lamidppig, laa am iitta. Propet Aisaia nug amunu inam aum. “Naɗi, aun nug ihinig nainu ooppa genab doyom?”

¹⁷ Amunu ooppa genab doyaknu diig amu Nai Ena doyak, amu haen danab nug Kristusnu nai mehuqtte amu, danab ah ag nai Ena dootteb.

¹⁸ Amge da oɗ mettem. Israel danab amu ag nai iite dooppig? Yo, ⌊Kayak nai atte, amubia⌋ ag dooppig. ⌊Nai amuam inam.⌋ “Keeke amu oh baalag am wan atu ohppa ukka malom daatte. Yo, ahilag nai amu wan oh tualom daatte.”

¹⁹ Da baula oɗ mettem. Israel danab ag nai amunu diignu doyak tutukku iite aoppig? Moses nug oɗmak amunu nob mak tatamnu ⌊Kayak oɗe awa,⌋ nai imu ⌊Kayak naippa yaak daatte⌋ aum. “Da geha danab laala, ag dahilad iitta ehanadppi, ag Israel danab ah, ag amu anidna, ag ehanittak amunu ittag aqeeb, ag ele aoglagnu dabmak aona, ag dahilppa eɗun uɗiglag. Ao, danab ah dahilad iitta, ag diignu doyak tutukku iitta, da ag ehanadppi, ag Israel danab ah, ag amunu oolag nauhkku.” Nug anam aum.

²⁰ Anamib Aisaia nug ele oo ii baɗe, Nug oɗmak amunu ⌊Kayak oɗe awa,⌋ nai imu ⌊Kayak naippa yaak daatte⌋ aum. “Danab laa ag da aniɗkkulagnu uɗat ii heppig ele, ag am da aniɗppig. Ao, danab laa ag dahilnu oɗmak ii heppig amu, da ahilagppa miag atiak tule bemi,” awa aum.

²¹ Amge Israel dilagnu amu nug aum. “Da amu hein, amu da deɗ oh amun tuqan ele danab ah ag oɗe ii dim lamittak danab ah, ag ahilag dabmak ɠagattag eppak daatte, da ag ehanadkkulnu heinne daami.”