Revelesen 9 - Nobonob Baibel

Engel ebqak 5 nug nuhig trampet iwalom

¹ Aria, engel ebqak 5 nug trampet nuhig iwale amu, da hoɗoppai laa habppanu wanppa na qa dayom anidmi. Anitti amu laa moɗ oɗe noa ukka batak iitta ele, amunu ki mettom.

² Nug moɗ amu matule amu moɗppanu kahug okkainab, aab kahug okkai okkainab bette, amubia beum. Kahug amu ba, aam ameg hab ele tonate, gatatu manom.

³ Gatatu mane amu tap-lokus okkai, ag aab kahugppanu wanppa neppig. Wanppa neeg, amu laa wanppanu apiap dilag ɠagattag, amubia ɠagattag mattom.

⁴ Anam amu, laa tap-lokus ag ad, gikkiɗah amu wan etetuab laa oh ele ii aqamnanu aum. Nug inam aum. “Ag danab ah oolagppa oina, laa ag uɗalkadppa Kayaknu epponak keeke iitta ele aakkuib guittak matteg!

⁵ Ag danab ah aib aqappeg mauhppig. Ag kalam tanig ele aakkuib guittak matteg!” awa aum. Anam a amu tap-lokus ag danab ah guittak naunab, apiap danab emalatte guittak dootteb, amubia guittak madappig.

⁶ Haen amuppa danab ag mauhkkulagnu ib mattiglag, amge ii mauhmana. Ao, ag mauhkkulagnu oolag huanak daakku, amge mauhak nug ag uuatta, umanab daakku. Ag paha mauhak ii anidmana.

⁷ Aria, da tap-lokus anadmi amu, ag hos ban hekkulagnu daatteb amubia anadmi. Ag ikkilkadppa amu, haɗ golppa hak ele, keeke amubia daappig. Ag iɗulag amu danab iɗulag bia.

⁸ Hos uɗig am ah ikkilag uɗug elab amubia, aelag am laion aeg bia.

⁹ Ag momolagppa amu keeke qahaɗ aenppa hak bia ele, haulag amu bannu karis kuɗum hos eeɗadna banppa ukkaegeg oqotti otteb, amubia oqotti oppig.

¹⁰ Ag boolkad am apiap boolkad bia, amu apiap bia ag boolkad noobppa aeg hawaɗ ele daappig, amuppa danab ah guittak kalam tanig ele mattaglagnu elele daappig.

¹¹ Ag ahilag king ele, nug ag gumadtte. Nug am moɗ oɗe noa ukka batak iitta ele, amunu okkai. Hibru naippa amu nug onig am Abadon. Grik naippa amu nug onig am Apolion.

¹² Gadonnab, uug okkainab amu aakku ba ukkom, amge aɗit baula ele bekkulahnu daattep.

Engel ebqak 6 nug nuhig trampet iwalom

¹³ Aria, engel ebqak 6 nug nuhig trampet iwale amu da qaɗab, golppa hak, Kayak noobppa daatte amu, da qaɗab guhig waɗeleppa doɗ qeqeɗi dottog daattebppanu baag la doomi.

¹⁴ Baag amu engel ebqak 6 trampet ele amu amegppa aum. “Engel waɗele Yupretis le naɗippa qakkalattak daatteb amu diin uhuqatte!” awa aum.

¹⁵ Awa a amu, nug engel waɗele, ag aua, deɗ, kalam, maɗ amuppanab danab ah oh ameg ewam oolagppa ameg laippu aqaglagnu ɠagattag aoppig amu, nug ag uhuqattom.

¹⁶ Amu daup ag engel waɗele amu waalagppa ban danab hosppa daappig ele am huanaknab; am 200 milion. Da ahilag ebqak doomi.

¹⁷ Da tuleglegppa hos amu danab hosppa daappig ele anadmi amu, ahilag ban bala amu inam. Danab ag momolagppanu qahaɗ am aenib. Qahaɗnu bala amu kokoɗ, ed hinqak bia amu lanlan ele. Hos ikkilkad amu laion ikki bia. Amu aab aɗu, kahug, kalu laa huana eotte onig salpa ewawa, ag oɗelagppanu bena goppig.

¹⁸ Daup amu wanppan danab ah keeke nau ewam, aab aɗu, kahug, amu kalu laa huana eotte ele onig salpa ewewe, hos oɗelagppanu beppig ele, amuppa ag wanppan danab ah ag ameg ewam daaegeg, ameg laippu aqaeg mauhppig.

¹⁹ Hos dilag ɠagattag amu ag oɗelagppa, boolagppa ele dayom. Ag boolag amu makkai bia ikki ele, ag danab amuppa guittak madatteb.

²⁰ Danab laa oh, daup amu ag keeke nau amuppa ii aqaeg mauhppig ele amu, ag oolag ii eɗue, eppelagppa keeke laala hadappig amu ag ii uuppig. Iitta. Ag tuɗidna, kayak hambuppuak dottolkad golppa, silwappa, brasppa, menppa amu adppa ele eppelagppa hadappig amu, ag amu noolkadppa dup nona, binalkad meppig. Kayak hambuppuak dottolkad amu ag ii neegtteb, ag nai ii dootteb, amu ag ele oiglagnu elele iitta. Aria, ag ouɗi nau binalag mak kobol ahilag ele ii uuppig.

²¹ Danab amu ag danab laala aqaeg mauhegeg, onilag aonna, gappai kobol henana, keeke yab ele aoppig, amge ag oolag ii eɗue, kobol amu ii uuppig.