Revelesen 8 - Nobonob Baibel

Sipsip Nag qataqak ebqak 7 tolom

¹ Aria, Sipsip Nag buk itoɗiak qataqak ebqak 7 tolom. Tole amu hab aabnu keeke oh toettak, oqotti iitta, nakok haen elab, aua maha, anam dayom.

² Amu dimppa da engel eblaih aɗit, Kayak noobppa hippaidna daatteb ele amu, da ag anadmi; ag trampet eblaih aɗit ele aakku mattaeg aoppig.

³ Engel laa ele nug kalu danab ile muttuɗig enanag bette elenu gol tappiɗ aɗa doa, qaɗab noobppa dayom. Dayeye, ag kalu danab ile muttuɗig enanag bette ele okkai medappig. Nug kalu danab ile muttuɗig enanag bette ele, amu Kayaknu danab ah oppiaawak ele dilag unuqittak, nug keeke aɗit amu oh gol qaɗab, amu sia king ⌊anuqak⌋ noobppa daatte, qaɗab amuppa keeke aɗit amu mana, Kayak medakkunu dayom.

⁴ Mana medette amu, kalu danab ile muttuɗig enanag bette ele, amunu kahug, muttuɗig ele, aria Kayaknu danab ah oppiaawak ele dilag unuqittak ele, engel eppegppanu Kayak toppa teum.

⁵ Te amu, engel nug tappiɗ awa, qaɗabppa aab aɗu ite, ambe, buɗie ukka, wanppa noum. Anam he amu hakkaɗ qa aɗeɗe ne, hakkaɗ diigppa qeeqe, amemɗi awewe, wanppa ele mim neum.

⁶ Mim ne, engel eblaih aɗit ele, ag anen anen trampet ele, ag trampet amu iwalkkulagnu bappaidppig.

Trampet waɗele iwalattak

⁷ Engel ebqak 1 amu nuhig trampet iwale, laa nug ais doɗo, amu aab aɗu tiig ele kaboliak ele buɗie, wanppa nena qeppig. Anam amu, aab wan maha laippu oh ewa, wan maha amu ooppa ad oh ewatta, gikkiɗah bau daatte ele maha amuppa oh ewom, amge wan maha aɗit laa amu ena daapiɗ.

⁸ Ena daaeheh amu engel ebqak 2 nug trampet nuhig iwale, amu laa qauko naɗinab aab ewa dittiak ele bia buɗie ukka, yuppa noum. No amu yu laih laippu amu tiilag eɗuom; laih aɗit amu ena daapiɗ.

⁹ Keeke oh yuppa bau daatteb ele amu, ameg laippuppa amu mauhppig; ameg aɗitppa amu bau daappig. Yuppan uub oh ameg laippuppa nauhppig; ameg aɗitppa am ena daappig.

¹⁰ Aria, engel ebqak 3 nug trampet nuhig iwale amu hoɗoppai okkai laa, hul diditte bia ewawa, habppanu auta na qeum. Hoɗoppai amuam le okkai gotteppa, amu le qeppuɗia bak ele, le amunu wanppan ameg laippuppa na qe; aɗit laappa am iitta.

¹¹ Hoɗoppai amu onig Mua. Le wanppanu ameg laippuppa oh amu mua ele beppig. Beeg amu danab kuɗum ag le amu laeg, oolag ewe, mauhadppig. Le wanppan ameg aɗit laappa am mua ele ii beppig.

¹² Aria, engel ebqak 4 nug nuhig trampet iwale amu laa he, aamnu laih laippu, kalamnu laih laippu, amu hoɗoppai ameg laippu ele, amu oh ii amahalppig; aamnu laih aɗit laa, kalamnu laih aɗit laa, amu hoɗoppai ameg aɗit laa ele, amu oh amahalppig. Anam amunu, amunppa aua waɗele am amahlak iitta, tuqanppa ele aua waɗele am amahlak iitta.

¹³ Amu da ai igel laa hab waappa, aben gamagppa hagagaɗa ugekke anidmi. Nug baag okkaippa ewa aum. “Gadonnab gadon! Gadonnab gadon! Gadonnab gadon! Engel ewam trampet huana ii iwaladppig, geha huana iwaladkkulagnu daatteb amunu, danab ah wanppa daatteb, ag uug okkainab dooglag!” ewa aawo doomi.