Revelesen 7 - Nobonob Baibel

Israel kuɗumnab ag Kayaknu epponak keeke aoppig

¹ Da keeke amu anttoya, da engel waɗele laa, ag wan daug laih laih waɗele amuppa hippaidna, ulah waɗele ippulag aben abenppa uɗippeg, yuppa ulah daamanu, wanppa ulah daamanu, ad amu keeke laala oh ulah aomnanu, ag ulah ippulag oh oo neppig ele anidmi.

² Oo neegeg amu engel laa, nug Kayak Bauklelnu doyaknu at stemp-ppa daatte aɗom ele, nug laih aam bedeppanu beebe anidmi. Nug baag okkaippa engel waɗele, ag wan, yu ele heppeg nakok nauhkkulahnu ɠagattag aoppig ele amu, nug ag onilagppa ewa, inam aum.

³ “Ag wan, yu, ad amu keeke laa oh ele paha aib heppeg nakok nauhkkulag. Ig Kayaknu maɗi nid uɗalkadppa epponak keeke amu mepput, ag maɗi ahilag heig!” awa aum.

⁴ Nug anam a amu, da Israel dilag huu okkai ohppanu danab ah ag Kayaknu epponak keeke aoppig ele, da ahilag ebqak doomi. Ebqak amuam kuɗumnab (144,000).

⁵ Israel dilag huu okkai Judanu amu 12,000, Israel dilag huu okkai Rubennu am 12,000, Israel dilag huu okkai Gadnu 12,000,

⁶ Israel dilag huu okkai Asernu am 12,000, Israel dilag huu okkai Naptalinu am 12,000, Israel dilag huu okkai Manasenu am 12,000,

⁷ Israel dilag huu okkai Simeonnu am 12,000, Israel dilag huu okkai Lewinu am 12,000, Israel dilag huu okkai Isakarnu am 12,000,

⁸ Israel dilag huu okkai Seblonnu am 12,000, Israel dilag huu okkai Josepnu am 12,000, amu Israel dilag huu okkai Benyaminnu am ele 12,000.

⁹ Imu oh dimppa da baula neekke, danab ah kuɗum kuɗumnab qagmena daaegeg anadmi. Aun laa nug danab ah amu oh ebaqakkunu elele? Iitta! Elele iitta! Danab ah amu ag wanppan wan ohppanu, huu ohppanu, beɗulag iɗu iɗu ohppanu amu nai ohppanu ele, ag Sipsip Nag amu Kayak, Nug sia king ⌊anuqak,⌋ appa daatte ele, ag aa noolahppa hippaidna daappig. Ag lamen elab hakkab takkaladna, ad pam ebekkud eppelagppa aɗualadna daappig.

¹⁰ Ag baalag okkaippa ena appig. “Eɗua awikkaknu diig am ihinig Kayak, Nug nuhig sia king ⌊anuqak,⌋ appa daatte, amu Sipsip Nag ele,” aon appig.

¹¹ Amu engel oh ag sia king ⌊anuqak⌋, ikki danab, amu hab daup waɗele Kayaknu bauklel aotteb ele, ag amu oh taliliadna daaeg, ag oh sia king ⌊anuqak⌋ noobppa gatelag qaun ona, ag dup nona Kayak binag meppig.

¹² Ag binag mena appig. “Genab, anam dayaɗ! Onig okkai, binag amahlak oppiaawak ele, doyak dabmak ena ele, ena heme anak, binag mak, ɠagattag oh, amu ebehi ele hanhan alet ele ihinig Kayak, nuhigppa dayaɗ! Genab.”

¹³ Aon aeg amu ikki danab laa oɗ meɗom. “Lamen elab hakkab meppig imu amu, ag am aun aɗi? Ag adeppanu uɗippig?” awa oɗ meɗom.

¹⁴ Oɗ meɗe, da nuhig oɗmak nob mein ami. “Naɗi, na doottem,” awe ami. Da ai amu, nug da amelppa aum. “Danab imu amu, ag eheɗ hattak okkainab, amuppa daappig, amge ag Kayak di-ii-medappig. Ag lamen elab ahilkad Sipsip Nag tiigppa ihalatteg hakkab ebappig

¹⁵ amunu, ag Kayaknu sia king noobppa hippaidna daatteb. Ag nuhig mettid lag ooppa tuqan, amun ele Nug waappa daanna Nug oɗe dim lamidtteb. Laa Nug sia king ⌊anuqak,⌋ appa heɗep neum daatte ele amu, Nug ag ele daan, atognoadkku

¹⁶ Anam amunu, ag geha baula enug ii aqama, le ele baalag ii diima. Aamnu gakkaɗak, aria gakkaɗak nau laala ele ii aqama.

¹⁷ Aɗinu? Sipsip Nag Nug gamagppa sia king ⌊anuqak⌋ guguittak daatte amu, Nug ahilag gumak danab ena dayaya, geha gumattebeb gona, moɗ laappa, le qeppuɗia bette ele, amuppa ag bauklel le aoglag. Amu Kayak nug geha amelag leb oh amelagppanu obikku,” awa aum.