Revelesen 6 - Nobonob Baibel

Buk itoɗiaknu qataqak tolaknu nai

¹ Keeke amu oh dimppa da Sipsip Nag nug buk itoɗiak qataqak eblaih aɗit ele amu, Nug digma qataqak ebqak 1 tole anidmi. Tole amu da hab daup waɗele Kayaknu bauklel aotteb ele, ag oolagppanu laippu laa nug hakkaɗ oqotti biappa inam a doomi. “Na do!”

² Nug anam a, da neekki ukke, hos hakkab laa anidmi. Danab nug hos attan dayom ele amu nug lat ele aɗom. Nug king haɗ laa eppegppanu awom. Nug ban eɗadkkunu elele amunu, nug ban kuɗumnab eɗadkkunu ukkom.

³ Ukke amu Sipsip Nag Nug qataqak ebqak 2 tolom. Tole amu da hab daup waɗele Kayaknu bauklel aotteb ele, ag oolagppanu ebqak 2 nug inam a doomi. “Na do!”

⁴ Da dooi amu hos kokoɗ doum. Danab nug hos amu attan dayom, amu ag nug ɠagattag, ɠagattag amuppa nug wanppa danab oh dilagppanu maɗoɗ kobol amu eɗua aweb, ag akka danab ah laa aqappeg mauhkkulagnu, ɠagattag amu medappig. Amunu nug uɗat amu hekkunu qep okkai elab medappig.

⁵ Mettaeg amu Sipsip Nag Nug qataqak ebqak 3 tolom. Tole amu hab daup waɗele Kayaknu bauklel aotteb ele, ag oolagppa laa nug inam a doomi. “Na do!” Nug anam a amu da neekki ukke, hos hinqak anidmi. Danab hos amu attan dayom, nug eppegppa skel aɗom.

⁶ Hab daup waɗele Kayaknu bauklel aotteb ele, ag oolagppa baag laa oqotti inam ba a doomi. “⌊Enug haen ɠagattag daatte amunu,⌋ danab nug deɗ laippunu uɗatnu nob am wit aeg waa nakok laippu aakkuib aokku. O iitta bali aeg am waa nakok ewam aakkuib aokku. Anam dayebeb, danab aun laa nug goɗen, wain ele aib heeb nauhom,” awa aum.

⁷ Anam a amu, aria Sipsip Nag qataqak ebqak 4 tolom. Tole amu hab daup waɗele Kayaknu bauklel aotteb ele, ag oolagppa ebqak 4 nug inam a doomi, “Na do!”

⁸ A amu da neekke, hos laa, nuhig beɗu anttak am lanlan geɗaɗa ele, da amu anidmi. Anitti amu danab hos amu attan dayom, nug onig Mauhak. Hades nug nug gukkuitta dim lamitte dopiɗ. Aa dopiɗ, amu wanppan danab ah oh waɗele waɗele oolagppa aa qep elabppa, enugppa, oɗe danab kuɗum aqe mauhttebppa, amu doɗ dakkuɗ oɗelagppa ele hepeɗ, laippu mauhkku, ewam bau daaglagnu ɠagattag aopiɗ.

⁹ Amu Sipsip Nag Nug buk itoɗiak qataqak ebqak 5 tolom. Tole amu qaɗab waappa danab ah Kayak nainu oolagppa genab doona, mehuqppig ele amunu, laa ag aqaeg mauhppig ele amu, da ag dottolkad anadmi.

¹⁰ Anattitti, ag baalag okkaippa enana appig. “O Naɗi Nakka Ɠagattag Oh Ele, na am oppiaawak, kobol genabib dim lamidttem. Na haen ganeb danab wanppa daatteb, ag ig na ii uuittut, iqaeg mauhmut ele amu, na haen ganeb ag heppig amunu epeɗiadna, ig tiinignu nob ahilagppa eɗukkut?” aon appig.

¹¹ Ag anam aeg amu Kayak Nug ag oh anen anen lamen elab hakkab madatta, amelagppa ag nakok laa ele hik aon daappeg, danab nau ag ag lailkad uɗat laippu wanppa daatteb, ahilag ebqak elele daakkunu aqappeg mauhppeg, ahilag ebqak elele dayeb, Kayak Nug danab nau amu nuhikkud danab oh tiilagnu nob eɗukkunu aum.

¹² Kayak Nug anam he amu, Sipsip Nag Nug buk itoɗiakppa qataqak ebqak 6 tolele anidmi. Tole, mim okkai wanppa neum. Aam gatatu mane, wan gatatu manom. Gatatu mane amu kalam nug kokoɗ, tiig bia, dayom.

¹³ Anam daye amu, hoɗoppai ag habppanu ad fig meulkad lep ii mak, ulah huanaknab he, kaolna nena qetteb, amubia wanppa nena qeppig.

¹⁴ Nena qeeg, hab ele buk itoɗiak ag itoɗieg ukke qena metteb, amubia itoɗia ukkom. Itoɗia ukke, qauko oh amu nud oh ele ag abenlag uuna, kautna laih wappig.

¹⁵ Laih waeg, wanppanu king, anuqak danab, ban daup ikki anuqak, danab enulag ele, danab ɠagattag ebehilag ele, begbeg maɗi nid oh, danab laa oh begbeg maɗi nid iitta, ag oh qaukoppanu men oɗeppa amu men giɗoɗlagppa gona lokkumadppig.

¹⁶ Lokkumna daanna, ag qauko, men ele dilag appig. “Laa nug sia king ⌊anuqak,⌋ appa daatte ele, Nug amegnu lokkumigkkulagnu, amu Sipsip Nag, Nug danab ah dilag hipuninnu oppoɗi bak dootte ele amu, ag oppoɗi bak amunu ele lokkumigkkulagnu, ag nena qena tonikkeg!

¹⁷ Aɗinu? Deɗ naɗi, amuam aa danab ah hipunin ahilagnu bu aqaglahnu deɗ, deɗ amu aakku beum daatte. Aun nug ɠagattag daya, haen naɗi amu eɗidkku? Auntai laa iitta!” aon appig.