Revelesen 4 - Nobonob Baibel

Hab aabppa Kayak noobppa dup noa binag mak

¹ Keeke amu oh dimppa da neekke, hab aabppa od matulak dayeye anidmi. Da baag tatam trampet oqotti bia doomi amu, da baula dooiyi amu aum. “Na inam beppe, da keeke dimppa bekkuoitte ele ippunidppi antte!” awa aum.

² Anam a, pahanab Kayak Ouɗi dahilppa ambe, da sia king ⌊anuqak⌋ hab aabppa dayom, laa Nug amuppa dayeye ele anidmi.

³ Nug beɗu am men jaspa, amu men konilian ele, amubia amahlom. Amahlele, di apinak laa sia king ⌊anuqak⌋ amu talilittak men emeral bia anidmi.

⁴ Aria, sia king 24 laa ag sia king ⌊anuqak⌋ amu talilidna daaegeg, sia king amu gamagppa dayom. Sia king oh ag anam daaegeg amu, ikki danab 24 ag sia king 24 amuppa daappig. Ikki danab amu ag lamen ahilkad hakkab ele, ag ikkilkadppa haɗ golppa hak aɗalatteg noeg, ag daappig.

⁵ Daaegeg amu sia king ⌊anuqak⌋, amuppanu amemɗi digma amahala ugekke, hakkaɗ diigppa qeeqe, hakkaɗ qa aɗeɗe ele neum. Lam eblaih aɗit ele ag sia king ⌊anuqak⌋ noobppa eonna daappig. Lam amu ag am Kayak Ouɗi, kobol ena oh nuhigppa ambak daatte ele, am Nug ippunigtte.

⁶ Aria, sia king ⌊anuqak⌋ noobppa le ameg laa, nuhig anttak am lettod bia, oppiaawaknab; men onig kristal bia dayom. Aria, sia king ⌊anuqak⌋ gamagppa dayeye, amu talilittak hab daup waɗele Kayaknu bauklel aotteb ele, ag beɗulkad taliliattak ohppa amelkad kuɗum ele, ag daappig.

⁷ Hab daup waɗele amu ag iɗulag piɗe piɗe. Laa iɗu am doɗ laion iɗu bia, laa am makau dawai iɗu bia, laa am danab iɗu bia, laa am ai igel attan hagagaɗtte, nug iɗu amubia.

⁸ Hab daup waɗele Kayaknu bauklel aotteb ele, ag oh haulkad eblaih laippu ele, ag haulag qaɗeppa, waappa ele amelkad doɗo kuɗum ele. Ag tuqan amun ele Naɗi binag menana, inam atteb. “Naɗi Kayak Nukka Ɠagattag Oh Ele, Nug oppiaawak, Nug oppiaawak, Nug oppiaawak. Nug gemu daatte, anukka dayom, dimppa uɗikkunu ele daatte.” Amun, tuqan ele ag anam anana daatteb.

⁹ Hab daup waɗele Kayaknu bauklel aotteb ele, ag Kayak, sia king ⌊anuqak,⌋ appa daatte, Nug ele hanhan bau daatte, ag Nug binag, amu binag amahlak oppiaawak ele menana, “Ena heme,” aon aegeg,

¹⁰ ikki danab 24 amu ag laa, Nug sia king ⌊anuqak,⌋ appa daatte, Nug hanhan bau daatte ele amu, ag Nug noobppa gatelag qaun ona, Nug noobppa dup nona binag mena, ag anen anen ag ahilkad haɗ ag ikkilkadppanu aon, sia king ⌊anuqak⌋ guguittak maadna daaegeg, ikki danab ag inam atteb.

¹¹ “O Naɗi, ihinig Kayak, Na keeke ohnab heme. Nahip doyakppaib na keeke oh he beppig. Gemu keeke amu oh nahip doyakppaib ele iikku daatteb amunu, binag amahlak oppiaawak, ɠagattag, binag ele nahip-ppa daakkunu, na elele daattem.” Ag anam aegeg anidmi.