Revelesen 3 - Nobonob Baibel

Nai Sardisnu Kristen tamaniakppa ukkom

¹ Nug anam ana, Nug nai tuɗitta aum. “Na nai da attem imu Sardis Kristen tamaniaknu ikki danab, nuhignu inam ye! Laa Nug Kayak Ouɗi, nuhigppa kobol ena oh ambak daatte, Nug hoɗoppai eblaih aɗit ele aɗualadtte amu, nai imu nuhigppanu uɗitte. Da nahip hak oh amu, da doottem. Danab ag nahipnu, ‘Nug bauklel ele,’ aon atteb amge iitta. Na bauklel iitta, na mauhme.

² Aib niime! Na ahan beɗun tatualna, kobol ena na nakok aɗalatte, mauhkkulagnu hetteb amu, na eɗun ɠagattag matte! Aɗinu? Nahip hak am Kayak dahil neekkakppa tutukkunab ii daatteb anidmi.

³ Amunu amu, na nai enanu mattiak na doome ele, nai amu na dautppa dob, na oot eɗueb, nai amu dim lamitte! Na amen ii oppateb daappe amu, da yabhok danab uɗitte bia nahip-ppa wakkul. Da haen adekkuppa nahip-ppa wakkul amu, na ii doomna.

⁴ Amge laippu laippu Sardis appa daatteb, danab ah amu ag ahilag hak dubuttid ii medappig. Ag lamen hakkab tagappeg, da ele oignig. Aɗinu? Ag Kayak oo hette bia oitteb amunu, ag amu hekkulagnu elele.

⁵ Aun laa nug ban eɗidkku amu, nug danab ag lamen hakkab tagappig ele, nug ag oolagppa ele daya, lamen hakkab ele tagakku. Da nug onig buk laa, amuam buk onig Bauklel Awe Onig Yaaknu Buk, buk amuppanu ii obipa. Iitta! Da nug da Mamel noobppa, amu engel noolagppa ele nug onig miag akkul.

⁶ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ!” awa aum.

Nai Piladelpianu Kristen tamaniakppa ukkom

⁷ Nug anam ana, Nug nai tuɗitta aum. “Na nai da attem imu Piladelpia Kristen tamaniaknu ikki danab, nuhignu inam ye! Nai imu, laa Nug oppiaawak ele, Nug kobol genabnu diig, Nug Dawitnu ki aɗa, Nug od matultte amu, laa nug manakkunu elele iitta, od Nug maitte amu, laa nug matulkkunu elele iitta, nuhigppan uɗitte.

⁸ Da nahip hak amu, da doottem. Antte! Da na noomppa od matule mettami, laa nug maikkunu elele iitta. Na nahip ɠagattag nakok ele, amge na dahil nai dim lamidna, dahilnu, ‘Da Nug ii doottem,’ ii ame.

⁹ Iikkud antte! Da heppi laa ag, ‘Ig am Juda,’ aon atteb, amge ag am Juda tutukku iitta, ag am Satannu daupib, ag geha na noomppa dup nokkulag, da nahipnu ool mauhtte ele dooglag.

¹⁰ Na dahil haknunab nai dim lamidna, uug oh oo bodoettak ele maon oime amunu, da danab ah wan atu oh dilagppa uug naɗi, ma anttak madakkunu bekku amu, da na atognoidkkul; uug amu nahip-ppa ii bema.

¹¹ Da paha eɗue uɗikkul. Laa nug nahip keeke ena, king haɗ bia amu, nug aomanu, keeke na aome amu na ɠagattag aɗan daye!

¹² Aun laa nug ban eɗidkku amu, da nug dahil Kayak, nuhig mettid lagppa anuqak laa meppi daakku; nug haen oh lag uua dimittim ii wama. Da nug qaɗeppa dahil Kayak onig amu dahil Kayaknu aab okkai onig ele yaakkul. Aab okkai amuam Jerusalem bau, am dahil Kayak toppanu attannu nette. Am da onil bau ele nug qaɗeppa yaakkul.

¹³ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ!” awa aum.

Nai Laodisianu Kristen tamaniakppa ukkom

¹⁴ Nug anam ana, Nug nai tuɗitta aum. “Na nai da attem imu Laodisia Kristen tamaniaknu ikki danab, nuhignu inam ye! Nai imu, laa Nug nuhigppa Kayaknu mattiak tutukku daatte, Nug oo metta ii uuak kobol dim lamitta, Nug laa aɗi heehe anttomnu mattiak danab dayaya, nai genabib maditte, Kayak keeke hattom amu ele Nug atognoadtte, amu nuhigppan uɗitte.

¹⁵ Na nahip hak oh amu, da doottem. Na gamagmag daattem amunu, da nahipnu oolppa ena ii doottem. Na dabmak dahil daatte bianab helom am ena.

¹⁶ Amge iitta, na dabmak dahil daatte bianab ii henana, gamagmag daattem amunu, da na bu okkai medakkulnu miag doottem.

¹⁷ Na nai inam madittem. ‘Da enul ele. Da keeke kuɗum ele daattem. Da keeke laanu tutu mak iitta.’ Amge iitta. Na uug naunabppa daattem; na danab ag nahipnu oolag dookkunu elelenab daattem; na daɗek daattem; na amen gaɗuak daattem; amu na bam iitta ele daattem. Na nakka na anam daattem, amge na amu ii doottem,

¹⁸ Anam amunu, da ulum mettak nai imu na medattem. Na enun ele daakkutnu, na gol babaitta epeɗia awak dahilppanu daden mena, na bam iittanu uɗa nak doomnanu, na lamen hakkab ele dahilppanu daden mena, aria, na neegna keeke anidkkutnu, na marasin na amenppa mekkutnu ele dahilppanu daden me!

¹⁹ Da bekkalad dilagnu ool mauhe, amu da ag tutukku daaglagnu ag daulag batete, ahilag kobol ena bekkulagnu toliadttem amunu, na kobol nahipnu dabmena autna aona, oot eɗuaɗ!

²⁰ Antte! Da lag odppa dayeye, od qeqalele daattem. Aun laa nug doya od matuleb amu, da lag ooppa noppi, nug ele ee lakkunih.

²¹ Aun laa nug ban eɗidkku amu, da nug daakkunu elele appi, nug da ele dahil sia kingppa, anukka da ban eɗitti, gemu da Mamel ele nuhig sia kingppa daattep amubia daagnih.

²² Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ!” awa aum.