Revelesen 21 - Nobonob Baibel

Jerusalem baunu nai

¹ Aria, amu dimppa da aakku hab bau wan bau ele anatmi. Hab tatamnu wan tatamnu ele aa iitta mepiɗ, amu yu nug ele iitta meum.

² Anam amu, da aab okkai, am Jerusalem bau Kayaknu tituanak daatte, aab amuam hab aabppa, Kayak toppanu neene anidmi. Nug am ah bau nug danab aokkunu bala mettom, amubia.

³ Anam daye amu, da nai mattiak baag okkai sia king ⌊anuqak,⌋ amuppanu laa inam a doomi. “Gemu Kayak laug danab oolagppa daatte! Nug ag ele daaglag. Ag nuhig danab daaglag. Kayak Nug ag ele daaglag, amu Nug Kayak ahilag daakku.

⁴ Kayak Nug heeb, amelag leb am iitta mekku. Danab ah ag baula ii mauhmana, ag baula ii mahimna, ag baula ii gaamna, amu ag guittak ele baula ii doomna. Aɗinu? Anukkan keeke amu oh iitta meum.”

⁵ Am laa nug sia king ⌊anuqak,⌋ amuppa daatte ele Nug aum. “Amu gemu da keeke oh bau hadattem!” awa aum. Anam ana amu Nug baula ele aum. “Keeke imu oh na ye! Aɗinu? Nai imuam genab, danab ah ag oolagppa genab dooglagnu elele,” awa aum.

⁶ Nug anam awowa, Nug tuɗitta da amelppa aum. “Keeke oh aakku meu beum! Da haen oh daattem; da tatam daami, da hanhan daakkul. Digmakppa, batakppa ele da daattem. Laa ag le baalag diitte amu, da ag le bauklel ele, le amuam qeppuɗia bette, da le amu nob iitta, hamu madakkul.

⁷ Laa nug ban eɗidkku amu, da nug imu medakkul. Da nuhig Kayak daakkul; nug dahil nid daakku.

⁸ Amge laa ag baɗanna, akka ahilagnu dabmena hak kobol dim lamidna, laa ag oolagppa genab doyak iitta, laa ag kobol nau uɗig wak hetteb ele, laa ag danab aqaeg mauhtteb, laa ag gappai kobol hetteb, laa ag baɗ mak danab, laa ag dup noa kayak hambuppuak binag mak danab, amu nai hambuppuak danab oh ele, amu oh aab ameg kalu laa huana eotte onig salpa eotteppa, ag amuppa aben aoglag. Amuam mauhak ebqak 2 aakku,” awa aum.

⁹ Anam a amu, engel eblaih aɗit ele ag tappiɗ eblaih aɗit ele aɗualadppig, amuppa keeke naunab danab he nauhaknu eblaih aɗit ambak ele, ag oolagppanu laippu laa nug doa, da amelppa aum. “Na do! Da ah makkun bau Sipsip Nag wau ippunidkkul,” awa aum.

¹⁰ Aria, Kayak Ouɗinu ɠagattag dahilppa ambe, engel nug omaiɗe, qauko okkai attannab amuppa gomuɗ. Goɗa amu, nug aab okkai, am Jerusalem bau Kayaknu tituanak daatte, aab amuam hab aabppa, Kayak toppanu neene ippuniɗom.

¹¹ Ippuniɗe amu, Kayak binag amahlak oppiaawak aab okkai amuppa amahale, aab am amahalom. Amahlak nuhig am aam men daden nob okkainab onig jaspa, amu ye, amahlak amia gotte, amubia. Men jaspa amuam men onig kristal, dubuttid nakok laa iitta, am dubuttid nakok laa iitta amubia daatte.

¹² Aab amu nug aɗ okkai attannab ele, nuhig od oɗe am 12. Engel 12 ag od amu gumappig; ag oolagppanu engel laippu am od oɗe anen anen guguittak dayom. Od oɗe anen anen amu ohppa Israel dilag huu okkai 12 onilkad oolagppa onig laippu yaak dayom.

¹³ Aɗppa amu, ulah kaɗag uɗitteppanu amu od oɗe ewam daappig, yawalti uɗitteppanu ewam daappig, yau uɗitteppanu ewam daappig, amu qaban uɗitteppanu ewam ele daappig.

¹⁴ Aab okkai amunu aɗ ukku am men kuɗum duqe ukkak huu 12 ele. Aɗ nug amu attan daatte. Amu Sipsip Nagnu totol danab 12 onilkad amu, ag men amuppa yaalattak daappig.

¹⁵ Engel nug da ele nai mattimuɗ ele amu, nug melemel maknu keeke golppa hak, aab amu, nuhig od, amu nuhig aɗ ele melemel mekkunu aɗom.

¹⁶ Aab okkai amu nuhig melemel laih laih am attan ele am laippuib. Engel nug aab okkai amu nuhig melemel maknu keekeppa melemel meum amu, nuhig laih laih amu attan ele oh am okkainab, 2,200 kilomita.

¹⁷ Nug aab amunu aɗ am ele teppu melemel meum, am amuam 65 mita dayom. Melemel amuam danab melemel metteb bia. Engel amu nug melemel amuppaib melemel meum.

¹⁸ Aabnu aɗ am Kayak Nug men jaspa, amuppa heum. Aab amu golppa heum, am gol ena dubuttid iitta ele, amu anttak nuhig amu le ameg oppiaawak kinipan iitta bia, o lettod bia.

¹⁹ Aab amunu aɗ ukkunu men duqe ukkak ele amu Kayak Nug men amuppa men laala daden nob okkai ele, qata-aqattom. Men duqe ukkak anuqakppa am men jaspa. Men duqe ukkak ebqak 2ppa am men sapaia. Men duqe ukkak ebqak 3ppa am men kalsedon. Aria men duqe ukkak ebqak 4ppa am men emeral.

²⁰ Men duqe ukkak ebqak 5ppa am men sadoniks. Men duqe ukkak ebqak 6ppa am men konilian. Men duqe ukkak ebqak 7ppa am men krisolait. Men duqe ukkak ebqak 8ppa am men beril. Men duqe ukkak ebqak 9ppa am men topas. Amu men duqe ukkak ebqak 10ppa am men krisopres. Men duqe ukkak ebqak 11ppa am men haiasin. Men duqe ukkak ebqak 12ppa am men ametis.

²¹ Aria, od 12 am oogog, ag oogog okkai okkai 12, od laippuppa amu oogog okkai laippuppa heppig. Aab okkainu ib oh am gol dubuttid iitta ele, amuppa hak. Gol amu, anttak nuhig am lettod dubuttid nakok laa iitta ele, amubia.

²² Amu da aab okkai amuppa Kayaknu mettid lag ii anidmi. Aɗinu? Naɗi Kayak Nukka Ɠagattag Oh Ele amu Sipsip Nag ele aa aakkuib aab amuppanu Kayaknu mettid lag daattep.

²³ Aab okkai amuppa amu aam kalam ele aa aab amu amahlak laa medakkunu ii daattep. Aɗinu? Kayaknu binag amahlak oppiaawak ele am amahlak medatte, amu Sipsip Nag am aab amunu lam daatte.

²⁴ Wanppan wan ohppan danab ah ag aab okkai amunu amahlakppa oiglag; amu wanppanu king ag ahilag binag amahalak oppiaawak ele aon nuhigppa uɗiglag.

²⁵ Amunppa ag aab amunu aɗ od ii maimna amunu, nuhig od am haen laa manak ii daamna. Aɗinu? Gatatu aab amuppa ii nema.

²⁶ Wanppan wan oh danab ah ag ahilag binag amahlak oppiaawak ele, amu ag binalkad ele aon, aab amuppa uɗin mekkulag.

²⁷ Amu keeke oppiak iitta ele aab okkai amuppa ii noma. Laa kobol nau digdig, Kayak nug kobol amunu ooppa uuaknab dootte, amu hambuppuak kobol hette ele amu, nug ele iitta. Am laa ag onilag Sipsip Nagnu buk, amuam buk onig Bauklel Awe Onig Yaaknu Buk, buk amuppa ag onilag yaak daatte ele amu, ag aakkuib aab okkai amuppa nokkulag.