Revelesen 20 - Nobonob Baibel

Maɗ 1,000nu nai

¹ Aria, amu oh malak dimppa da engel laa hab aabppanu neene anidmi. Nug eppegppa moɗ oɗe noa ukka batak iitta ele oɗenu ki aɗom. Nug sen okkai laa ele aɗom.

² Nug mat naɗi anukkanunab aɗom. Nug am baeg qak danab, onig laa am Satan. Nug nug aɗa, maɗ 1,000 daakkunu hippalom.

³ Engel nug anam ha, mat naɗinab baula maɗ 1,000 amu ooppa atu atunu danab ah ii hambuppualadmanu engel nug mat naɗinab mawe, moɗ oɗe noa ukka batak iitta eleppa no, od mana, qaɗeppa epponak keeke ɠagattag meum. Dimppa maɗ 1,000 maleb amu, laa nug od matula uhuqeb doa, haen tutuib nug aben ohppa oikkuoitte.

⁴ Amu da sia king laala anadmi. Kayak Nug laala ag hettoɗiakppa danab ah epeɗiadkkulagnu uɗat mattom ele amu, ag sia king laala amuppa daappig. Daaegeg amu da laala ag Jesusnu oolagppa genab doonna, Nug onignu madippig, ag Kayak nai ɠagattag aɗappig amunu ag baalag otaɗppig ele amu, da ag dottolag anadmi. Danab amu ag doɗ dakkuɗ dottog noobppa ii dup nona binag meppig; ag uɗalkadppa eppelkadppa ele nuhig epponak keeke ii aoppig. Danab amu ag eɗun hippaidna bauklel aona, Kristus ele gumak uɗat maɗ 1,000 henan daappig.

⁵ Amuam danab eɗua hibaittak anuqak aakku. Laala mauhppig ele amu ag maɗ 1,000 amu male, eɗun hippaidppig.

⁶ Aun nug eɗua hibaittak ebqak 1, nug amuppa eɗua hippaidtte amu, nug Kayaknu itittak ena awom daatte; nug am oppiaawak ele. Amu ele mauhak ebqak 2 nug danab amu heeb, nau aoglagnu ɠagattag iitta. Ag maɗ 1,000 amu ooppa ag Kayak, Kristus ele dilah mana mettak danab daanna, ag Kristus ele king daaglag.

⁷ Dimppa maɗ 1,000 uueb, ⌊engel⌋ laa nug heeb, Satan nug geha maniguittak nuhig ooppanu eɗua dimittim dokku.

⁸ Amu nug geha dimittim wana, danab ah wan atu ohppanu ag Jesusnu kekeɗ daatteb, amu nug ag buppualadkku. Nug geha ban humaglagnu qagmaadkku. Ebqak ahilag amu yu ihippanu abuɗ bia.

⁹ ⌊Aria, da imu ele anidmi.⌋ Daup huanak amu ag wanppan wan oh tonan gona amu Kayaknu danab ah oppiaawak ele dilag aab okkai, aab amunu Kayak Nug oo mauhtte ele, amu talilidppig, ge aab aɗu hab aabppanu na, ewatte mauhppig.

¹⁰ Amu ouɗi nau danab amu buppualattom ele, amuam Satan, ag nug aab ameg kalu laa huana eotte onig salpa eotteppa buɗieg, propet hambuppuak, doɗ dakkuɗ ele daattep-ppa noum. Ag hanhannab tuqan amun ele guittak nau doonna daaglag.

¹¹ Da amu anttena amu, da imu ele anidmi. Da sia king okkainab, hakkab ele, amuppa Kayak Nug heɗep na dayeye anidmi. Wan imu, hab ele nug noobppanu ooleh, aben laa aa daaglahnu ii dayom.

¹² Da aakku danab mauhadppig, okkai nakok ele oh, Nug noobppa hippaidna daaegeg anadmi. Nug buk laala kolattom amu buk laa, amuam buk onig Bauklel Awe Onig Yaaknu Buk, Nug buk amu ele kolom. Danab mauhadppig amu ag aɗi heppig, buk laalappa epeɗiaknu amu yaak niitte amuppa epeɗiattom. Amu oh ag aɗi heppig amuppa epeɗiattom.

¹³ Yo, mauhak yuppa daappig, moɗppa daappig, amu Hadesppa daappig ele, ag oh ag Kayak noobppa daaegeg, ag aɗi heppig amuppa epeɗiattom.

¹⁴ Aakku ⌊Kayak Nug⌋ Hades, mauhak ele aab amegppa buɗialate nopiɗ. Aab ameg amuam mauhak ebqak 2.

¹⁵ Aun laa nug onig buk laappa, amuam buk onig Bauklel Awa Onig Yaaknu buk, nug onig buk amuppa ii yaak amu, laa nug nug aab amegppa buɗie noum.