Revelesen 2 - Nobonob Baibel

Nai Epesusnu Kristen tamaniakppa ukkom

¹ Nug anam ana, Nug nai tuɗitta Jon amegppa aum. “Na nai da attem imu Epesus Kristen tamaniaknu ikki danab, nuhignu inam ye! Nai imu, laa Nug hoɗoppai eblaih aɗit ele eppeg naɗiap-ppa aɗalattatta, lam maknu balal eblaih aɗit ele oolagppa oitte amu, nuhigppanu uɗitte.

² Da nahip hak, uɗat ɠagattag nahip, amu na uɗat amu hekkutnu ii uun, tuɗidna hettem ele amu, da doottem. Na danab nau dilag ele oot iinab hette. Amu laa ag, ‘Ig am totol danab,’ hambuppun appig amu, na ma anttak matte, ag am hambuppuak danab daatteb anidme.

³ Da doottem, na da onilnu eheɗ laala na beɗunppa be doome; gemu ele doottem. Anam amge na uug doyaya eɗittaknuib dabmak awak kobol dim lamidna, na amuppa na gai-iitta ii meme.

⁴ Amge eheɗ hak nahip laippu imunu da na amenppa iikku attem. Na anukka baubu Kristen beme haenppan na oo mauhak kobol dim lamidna autna autnanab aome, amge gemu oo mauhak nahip amu anam ii daatte.

⁵ Na tatam daame, amuppanu na qakppa daattem amu, na dautppa doaɗ! Dautppa dob, oot eɗueb, hak nahip tatam heme ele amu baula he! Na oot ii eɗukkut dayeb, da nahip-ppa ukken, lam maknu balal nahip amu abenppanu eɗue aokkul.

⁶ Amge kobol imuam nahip-ppa ena daatte. Na Nikolas huu, na amu dilag hak nau guhuɗidttem, da ele Nikolas aɗi dilag hak nau guhuɗidttem.

⁷ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ! Aun laa nug ban eɗidkku amu, da nug bau hanhan dayaknu ad meu, Kayaknu Paradisppa daatte, medappi lakku,” awa aum.

Nai Smernanu Kristen tamaniakppa ukkom

⁸ Nug anam ana, Nug nai tuɗitta aum. “Na nai da attem imu Smerna Kristen tamaniaknu ikki danab, nuhignu inam ye! Nai imu, laa Nug hanhan daatte; anuqakppa, batakppa ele Nug daatte, anukka Nug mauhom, amge Nug gemu bau daatte, nuhigppan uɗitte.

⁹ Da guittak uug ele nahip-ppa beum, na keeke iitta, amuppa qagaiettaknab daame amu, da doottem, amge na keeke kuɗum ele! Da danab laa ag nahipnu baeg qak nai madippig amu, da doomi. Laa ag amu appig amu ag, ‘Ig am Juda,’ aon atteb, amge ag am Juda tutukku iitta; ag am Satannu daupib.

¹⁰ Nakok laa ele ag Smerna, ag uug baula maoglag, amge ag keeke amunu aib baɗappig. Doyeg! Ag Smerna daatteb, ag ahilag ooppa genab doyak am genab, o genab iitta doyaknu, ag ma anttak aoglag. Amuam Satan nug heeb, ahilkad kekeɗ ag oolagppanu laala maniguittakppa maadkkulag. Laa amu, ag deɗ 10 ag Smerna eheɗ hattaglag. Na oo metta ii uuak kobol dim lamidna, ootppa genab doyak ɠagattag aɗappe ukkeb, haen na mauhttem, amuppa amu da na bauklel hanhannu medakkul.

¹¹ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ! Aun laa nug ban eɗidkku amu, mauhak ebqak 2 am nug guittak nakok laa ii mettama. Iittanab,” awa aum.

Nai Pergamumnu Kristen tamaniakppa ukkom

¹² Nug anam ana, Nug nai tuɗitta aum. “Na nai da attem imu Pergamum Kristen tamaniaknu ikki danab, nuhignu inam ye! Nai imu laa Nug qep elab aeg laih laih oh ele amu, nuhigppan uɗitte.

¹³ Da nahip dayak adeppa daatte amu, da doottem. Satan nug aben amuppa nug okkai daatte, amge na da onil ɠagattag aɗattem. Na dahilnu ootppa genab doottem, amu anukka Antipas, nug oo metta ii uuak kobol dim lamitta nai dahil mehuqttom ele, nug mehuqeqe, na appanppa, Satan aguppa daatte amu, appa laa ag Antipas qeeg mauhom, amge haen amuppa ele na ooppa genab doyak nahip dahilnu ii paɗame.

¹⁴ Amge eheɗ hak nahip laippu laippu imunu da na amenppa iikku attem. Nahipad danab laa Pergamum appa ana daatteb, ag Balamnu kobol amu ɠagattagnab aɗatteb. Nug Balak ippunitte, Balak nug he, Israel danab ah ag hipuninppa nena qeppig. Amuam Israel aɗi ag danab laa, ag doɗ main kayak hambuppuak dottolkad madappig ele, ag doɗ amu lana, gappai kobol ele heppig.

¹⁵ Amubia laala na ele appa ana daatteb, ag Nikolas huu dilag nai, ⌊amuam Balamnu nai bia,⌋ ag nai amu ɠagattag aɗatteb

¹⁶ amunu, na oot eɗuaɗ! Iitta amu, nakok laa ele da na gumitten goppi, qep elab aeg laih laih ele da oɗelppa daatte amu, da amuppa danab amu ele nug qekkunig.

¹⁷ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ! Aun laa nug ban eɗidkku amu, da maana gemu lokkumak daatte, da amunu laa medakkul. Da nug men hakkab laa ele nug medakkul. Men amuppa onig bau yaak ele daatte. Laippu laa nug onig amu diig ii dooma, aun nug da mettami ele amu, nug aakkuib dookku,” awa aum.

Nai Taiatairanu Kristen tamaniakppa ukkom

¹⁸ Nug anam ana, Nug nai tuɗitta aum. “Na nai da attem imu Taiataira Kristen tamaniaknu ikki danab, nuhignu inam ye! Nai imuam Kayak Bekkanu uɗitte, Nug ameg aab diditte bia, Nug baeg amu bras bia amahaltte.

¹⁹ Da nahip hak, nahip oo mauhak, ooppa genab doyak nahip, ehanittak uɗatppa danab ah ehanadttem, uug digdig maot oiyaknu kobol nahip, amu na kobol oh tatam ena heme amu, gemu na amu eɗittak enanag hettem, da amu oh doottem.

²⁰ Amge eheɗ hak nahip laippu imunu da na amenppa iikku attem. Na ah Jesebel, nug nuhig haknu amu, na nug amegppa aib ii attem. Nug, ‘Da am propet ah,’ awa atte, amge nug anam ii daatte. Nug ippunittak hette, amuppa nug he, dahil maɗi nid ag gappai kobol hena, laa doɗ main kayak hambuppuak dottolkad madappig ele, ag doɗ amu ele latteb.

²¹ Da nug oo eɗukkunu haen mettami, amge iitta. Nug nuhig gappai kobol ii uuom, oo ii eɗuom.

²² Anam amunu, da geha nug oɗe, guittak ele okkai nug medakkul. Aria, danab ag nug ele ewau pakkua gappai hak kobol heppig ele amu, ag ele oolag ii eɗueb, ewau pakkua gappai hak kobol ii dimedappeg amu, ag ele oɗe guittak okkainab ele madakkul.

²³ Da nuhikkud nid ele heppi mauhkkulag. Amuppa Kristen tamaniak oh ag dooglag, da danab oolag, amu ahilag dabmak ele epeɗie aute aottem. Amu ele, da Taiataira daatteb, da ahilag hak attemu amu, da amuppa nob madakkul.

²⁴ Amge ag laala ag Taiataira daatteb ele, ag ah amu nuhig nai dab-ii-medatteb, ag Satannu dabmak, danab laala ag amunu, ‘Dabmak amuam unuqagnab daatte,’ aon atteb ele amu, ag amu ele ii dim lamidtteb amunu da ag amelagppa inam attem. Da ag keeke uugnab laa ii madapa.

²⁵ Iitta. Amge ag keeke aoppig amu, ag amu ɠagattag aɗan daappeg ukkeb, da eɗue uɗikkul.

²⁶ Aun laa nug ban eɗidkku, nug ele dahil dabmaknab tuɗitta dim lamitta, gog tak haen batak amu, da nug wanppan wan laappan dilag ikki daakkunu onig medakkul.

²⁷ ‘Nug danab amu kingnu qakun aenppa hak amuppa gumadkku. Ao, nug danab laa he, waa aoɗe, maha kuɗum nette, amubia danab amu gumadkku.’ Mame Nug da amubia hekkulnu onil meɗom, amubia da nug onig anam medakkul.

²⁸ Am da nug wakkaɗak haenppanu hoɗoppai Boitinan amu ele medakkul.

²⁹ Danab nug daug ele dayeb, nug Kayak Ouɗi Nug Kristen tamaniak dilkadppa nai mehuqtte doyaɗ!” awa aum.