Revelesen 19 - Nobonob Baibel

Kayak binag mak

¹ Keeke amu oh dimppa da danab ah ameg naɗi baalag okkaippa hab aabppa eegeg doomi. Ag inam eppig. “Ig Kayak binag metu! Padal ii maknu ehanittak, binag amahlak oppiaawak ele, amu ɠagattag ele ihinig Kayak, nuhigppa dayaɗ!

² Aɗinu? Nug nuhig epeɗia nob mattak am genab, tutukku ele. Kayak Nug ib baag ah onig, ɠagattag ele nug nuhig ewau pakkua gappai hak kobolppa he, wanppan danab ah ag oolkadppa dubuttid ele daappig amu, Kayak Nug eheɗ hak nuhig amunu nob nau mettom. Nug Kayaknu maɗi nid ele aqe mauhppig amunu, Kayak nuhig eheɗ amunu nob nau eɗua mettom,” aon appig.

³ Ag awona, ag baula eɗun enan appig. “Ig Naɗi binag metu! Aab okkai amunu aab kah hanhan tette,” aon appig.

⁴ Anam aeg amu, ikki danab 24, amu hab daup waɗele Kayaknu bauklel aotteb ele, ag Kayak, Nug nuhig sia kingppa daatte, ag Nug noobppa gatelag qaun ona, dup nona, Nug binag mena appig. “Genab, anam dayaɗ! Ig Kayak binag metu!” aon appig.

⁵ Ag anam aeg, sia king ⌊anuqak⌋, amuppanu amu baag laa ewa aum. “Ag Kayaknu maɗi nid, ag Kayaknu ebehilkad oh bodoetta le mette amu, ag okkai okkai, naunau ele ag oh ag ihinig Kayak binag meig!” awa aum.

⁶ Nug anam a amu, da keeke laa danab ah kuɗum baalag bia, am le okkai buɗuɗuppa noawa oqotti otte amubia, amu hakkaɗ okkai qa aɗeɗe neene, oqotti otte, da amubia dooiyi amu ag enana appig. “Naɗi Kayak Nukka Ɠagattag Oh Ele ihinig Nug King daatte amunu, ig Nug binag metu!

⁷ Gemu ig maɗoɗppan gamag ahak doot, binag amahlak oppiaawak metu! Aɗinu? Sipsip Nag Nug nuhig ah aokkunu haen aakku beum, amu ah nuhig nug ha, nug amunu babaittak daatte.

⁸ Anam amu, Kayak Nug linen lamen hakkab, amiak, oppiaawak ele nug mekkunu mettom,” aon appig. Amunu diig am, linen lamen hakkab amuam genab tutukku hak kobol Kayaknu danab ah oppiaawak ele hetteb ippunigtte.

⁹ Amu dimppa engel nug da amelppa aum. “Na nai imu ye! ‘Danab ah, Kayak Nug ag Sipsip Nagnu ah awaknu hobulppa uɗiglagnu onilagppa eum ele amu, ag itittak ena aoppig daatteb,’ ” awa aum. Awona amu, nug da amelppa aum. “Nai imu am Kayak oɗe, amu nai nuhig am nai genab,” awa aum.

¹⁰ Anam a amu da nug noobppa dup noin binag mekkulnu nug baegppa laippun gatel qaun oin gomelen, iɗul wanppa memi, amge nug da amelppa aum. “Na anam ii hemana! Da na, amu na laipad ele, ag oh Jesusnu oolagppa genab doonna, nuhignu mehuqtteb ele, da na ag ele, ig oh am Kayaknu maɗi nid. Na Kayak noobppa dup nona binag me! Aɗinu? Propet ag Kayak Ouɗi ɠagattagppa Jesusnu mehuqak heppig, amubia Jesusnu mehuqak oh am Kayak Ouɗi ɠagattagppa bette,” awa aum.

Danab hos hakkab attan oiyom

¹¹ Nug anam a amu, hab obate, da hos hakkab laa dayeye anidmi. Laa Nug hos amu attan dayom amu, Nug onig am, Oo Metta ii Uua, Genab Hak. Laa amu Nug nai doya mala hettoɗia epeɗia elele mettak kobol dim lamittatta, nug epeɗiak uɗat, ban hak ele hette.

¹² Nug ameg amu aab dittiak bia, nug igippa king haɗ kuɗum daappig. Nuhigppa onig laa yaak daatte, amge auntai laa nug onig amunu meu ii dootte.

¹³ Nug lamen elab, tiig laaittak ele meum. Nug onig amu Kayak Nai.

¹⁴ Hab aabppanu ban danab ag ahilkad hos hakkab enanag qaɗelagppa daanna, Nug dim lamidppig. Ag linen lamen hakkab, oppiaawak ele ag beɗulagppa maadppig.

¹⁵ Ahilag okkai amu qep elab aeg ele, Nug wanppan wan oh aqakkunu, Nug oɗeppanu doa ukkak daatte. Nug aen bu aɗa, bu amuppa Nug danab ah gumadkku. Nug geha grep meu tappa leppu awaknu abenppa grep meu tabakku. Amuam Kayak Nukka Ɠagattag Oh Elenu oppoɗi bak okkainab, amu ippunigtte.

¹⁶ Lamen elab nuhigppa amu nug tuɗippa ele onig imu yaak ele dayom. “Nug am king dilag King, amu naɗi dilag Naɗi.”

^17-18 Aria, da engel laa aam amegppa hibaitta dayeye anidmi. Dayaya, nug baag okkaippa, ai oh hab waappa hagagaɗppig ele, nug ag uɗin, king teppulag, ban daup ikki teppulag, danab ebehilagnab teppulag, danab amu hos ahilkadppa daappig ele teppulag, danab ah laa, laa ag begbeg maɗi nid iitta, laa ag begbeg maɗi nid, laa ag onilag ele, laa ag onilag iitta ele, amu oh teppulag ele lakkulagnu ag onilagppa ewa, inam aum. “Ag uɗin, Kayaknu ee lanak balalppa dayeg!” ewa aum.

¹⁹ Amu da doɗ dakkuɗ, wanppanu king amu ahilkad daup ele qagmeeg anadmi. Ag laa nug hos hakkab attan dayom ele, amu nuhikkud daup ele ban hekkulagnu daappig.

²⁰ Anam amge, laa ⌊hos hakkab attan dayom⌋ nug doɗ dakkuɗ aɗa, propet hambuppuak ele aɗom. Propet amu nug doɗ dakkuɗ ehanidkkunu epponak keeke kuɗum danab haknu elele iitta heum. Kobol amuppa nug danab oh, ag doɗ dakkuɗnu epponak keeke aoppig, ag ele doɗ dakkuɗ dottog noobppa dup nona binag meppig amu, nug ag hambuppualattom. Amunu doɗ dakkuɗ nug propet hambuppuak ele aa bau daaeheh, laa ⌊hos hakkab attan dayom ele,⌋ nug aa aɗalata, aab ameg kalu laa huana eotte onig salpa eotteppa buɗiate nopiɗ.

²¹ Buɗiate noeh, nug daup danab laa oh qep elab aeg ele, Nug oɗeppanu doa ukkak daatte, amuppa aqom. Aqe, ai oh ag danab amu oh teppulkad laeg, oolag huanaknab dittiom.