Revelesen 18 - Nobonob Baibel

Babilon nauhom

¹ Keeke amu oh dimppa engel laa nug hab aabppanu neene anidmi. Nug gumaknu ehah okkainab ele, amu binag amahlak oppiaawak ele nuhig am he, wan oh amahlom.

² Nug na, baag okkaippanab ewa aum. “Aab okkai Babilon onig, ɠagattag ele aakku na qeum! Aakku na qeum! Nug aakku ouɗi nau daaglagnu abenlag daatte. Ao, nug am ouɗi nau oh dayaknu aben. Ge, nug am ai ii lanaknu epeɗiak daatteb, amuam ai danab nug ahilagnu ooppa uuaknab dootte, am amu dilag aben daatte.

³ Aɗinu? Danab wan atu ohppanu ag danab wain laeg kaaka aqe, kobol kobol hetteb, amubia ag nug ele kobol nau digdig ele, ewau pakkua gappai hak kobol bia heppig,. Amu king atu atunu ele ag nug ele kobol nau digdig, ewau pakkua gappai hak kobol bia, heppig. Wanppan keeke laihnu awa dadennu mak danab ag nuhig keeke ena ena digdig kuɗumnab hik qe awaknu kobolppa enulag ele daappig,” awa aum.

⁴ Amu da baula baag laa hab aabppanu doomi, amu nug inam aum. “Dahilad danab ah ag nug ooppanu uɗin, dimittim ippa doig! Iitta dayeb, ag nug ouqeppeg, ag nug ele nuhig hipuninppa daaglag, nuhig hipunin nob nau amu, ag nug ele aoglag.

⁵ Aɗinu? Nuhig hipunin am ameg naɗi habppa teppig bia daatteb. Ao, kobol eheɗ nuhig am Kayak daugppa doum.

⁶ Ag nuhig kobol nau amunu dabmena, nob nau elelenab eɗun metteg! Nug kobol nuhig nau qagme, kuɗumnab beum, amubia ag tuɗidna, ag nuhig nob nau qagmena kuɗumnab metteg! Nug laa dilagnu le nau kap-ppa kaboliom bia, ag le naunab tuɗidna, kap amuppa kabolina, kuɗum metteg!

⁷ Nug nukka nug binag amahlak oppiaawak ele metta, nug keeke ena ena digdig kuɗumnab hik qe aokkunu ha awom amunu, ag nug guittak, gayak ele melemel amuppaib metteg! Aɗinu? Nug ooppa, ‘Da kwin, da ah qab iitta amunu gayak baag laa dahilppa ii bema,’ dada nai atte.

⁸ Nug anam atte amunu, keeke nau imu oh deɗ laippuppa nuhigppa bekku; mauhak, qanak, amu enug haen ele. Aab okkai Babilonnu amu, aab eweb iitta mekku. Aɗinu? Naɗi Kayak, Nug ɠagattag okkai ele amu, Nug epeɗidtte.

⁹ Wanppanu king ag ah amu ele ewau pakkua gappai hak kobol hena, nug ele kobol nau kuɗum laa ele heppig amunu, geha wanppanu king ag nug aab aɗuppa ewebeb, nuhig aab kahug anidna, ag mahinna gaaglag.

¹⁰ Ag piɗe daanna, nuhig guittak amunu baɗana akkulag. ‘O gadonnab gadon; gadonnab gadon Babilon! Na aab okkai, na ɠagattag okkai ele, amge aua laippuppaib nahip hipuninnu nob nau aakku neum,’ aon akkulag.

¹¹ Keeke laihnu awa dadennu mak danab ag ele nuhignu dabmak aonna, oolag uug ele daanna gaaglag. Aɗinu? Aab amuppan danab ag ahilag keeke ele baula daden ii memana.

¹² Keeke amuam gol, silwa, men daden nob okkainab ele, oogog, linen lamen otala hamu ukkak hakkab, o perpel, o kokoɗnab, amu lamen otala hamu ukkak silkppa hak, ad muttuɗig ele digdig, keeke laala ag doɗ onig elepan aelagppa hoippig ele, amu keeke laala, ad maha nob okkai eleppa heppig amu bras, aen, men geɗaɗlak ele.

¹³ Aria, laa sinamon, spais, kalu danab ile muttuɗig enanag bette, mir, prankinsens, wain, olip goɗen, wit, wit kalu enanag, amu makau, sipsip, hos karis ele, begbeg maɗi nid ele. Keeke amu oh amu aab okkai amunu danab ag baula daden ii memana.

¹⁴ Keeke laihnu awa dadennu mak danab ag aab amunu inam akkulag. ‘Keeke oh na haen oh aokkutnu oot huana dayom amu, na baula ii aomna. Na enun, keeke ena ena ele oh ele padal meppig amu, na keeke amu oh baula ii anidmana,’ aon akkulag.

¹⁵ Aria, keeke laihnu awa dadennu mak danab ag ahilag uɗat amu henana, men doɗo aab okkai amuppanu aoppig ele amu, ag guittak nau aab okkai amu awom amunu baɗana autna aona, piɗe umanab gona gaanna, oolag uug ele daanna,

¹⁶ akkulag. ‘O gadonnab gadon! Aab okkai amunu amu gadonnab gadon! Anukka nug linen lamen hakkab, perpel, kokoɗnab eleppa hak takka, nug beɗu golppa, men daden nob okkainab ele, amu oogog eleppa bala meedttom.

¹⁷ Amge aua laippuppa nuhig enub amu oh iitta meum,’ aon akkulag. Uub gumak danab okkai, danab uub daden mena, uubppa tena, yu qaɗeppa aab laappa gotteb ele, uub gumak danab okkainu uɗat nid, amu keeke laihnu awa dadennu mak danab ele, ag oh aab okkai amu anidna, piɗenab hippaidna daaglag.

¹⁸ Ag aab okkai Babilon ewebeb, nuhig kahug amu anidna, enan akkulag. ‘Aab atten amu aab okkai umu ele elele?’ aon akkulag.

¹⁹ Ag anam ana, ag wan gappud agappeg, ikkilagppa teebeb, ag oolag uug ele daan gaanna, inam enan akkulag. ‘O gadonnab gadon! Uub mamelkad oh, ahilkad uub amu yu qaɗeppa oiyakppa ag keeke aona, aab okkai amuppa meeg, daden meegeg, enulag ele daappig amu, aua laippuppa aab okkai amu aakku iitta meum,’ aon akkulag.

²⁰ O hab aab, na nuhigppa beum amu, na maɗoɗppan gamag ahak doye! Amu ag Kayaknu danab ah oppiaawak ele, Kristusnu totol danab, amu Kayaknu propet ele amu, ag ele anam heig! Kayak Nug aab okkai amu nug ahilagppa eheɗ heum, Nug amunu nug nob nau aakku mettom,” awa aum.

²¹ Nai amu oh male amu, engel ebehi ele laa, nug men laa, okkai nuhig am ee aeg ganuaɗaknu men okkai bia, nug amu huma, yuppa buɗie noowo aum. “Babilon onig, ɠagattag ele, Kayak Nug heeb, aab amuam men yuppa pahanab noum bia na qekku; baula ii daama.

²² Babilon, nahip-ppa danab ag heegeg, harpnu oqotti, ahiettaknu oqotti, dumuttum iwalaknu oqotti, trampet iwalaknu oqotti ele amu baula nahip-ppa ii daama. Nahip-ppa amu, danab nug aɗi uɗat laa haknu doyak okkai ele laa ii daama, amu laa nug ee aeg ganuaɗaknu mennu oqotti ele baula nahip-ppa ii dooma.

²³ Lamnu amahlak ag baula nahip-ppa ii amahalmana, danab ah aokkunu, ah nug danab aokkunu ele, aa baalah oqotti ele nahip-ppa baula ii daama,” awa aum. Awowa amu, nug nai tuɗitta aum. “Anukka nahipad keeke laihnu awa dadennu mak danab ag wanppanu danab okkai daappig, amu na onig awak kobol nahip-ppa na atu atu danab amelag aonna, ham-ele-buppualadme.” Engel ebehi ele nug anam aum.

²⁴ ⌊Babilonnu amu,⌋ Kayak Nug nuhikkud propet, nuhikkud danab ah oppiaawak ele, amu wan atu ohppan danab Babilon aqe mauhppig ele, Nug aab okkai amuppa amu oh tiilag wanppa ne anttom amunu, Nug aab amu nob nau amu mettom.