Revelesen 17 - Nobonob Baibel

Gappai ah onig, ɠagattag elenu nai

¹ Amu dimppa engel eblaih aɗit ele ag tappiɗ eblaih aɗit ele, amunu oolagppa laippu laa nug doa, da amelppa inam aum. “Na inam doppe, da gappai ah onig ele, nug le kuɗum qaɗelagppa daatte ele, nuhig nob nau mak ippunidkkul.

² Wannu king ag nug ele ewau pakkua gappai hak kobolppa oippig. Wanppanu danab ag nuhig gappai kobolppa danab wain lawona kaaka aqadtte, amubia kaaka aqom,” awa aum.

³ Awa a amu, Kayak Ouɗi dahilppa ambe, engel nug omaiɗa, atu taɗakppa ukke, da ah laa nug doɗ dakkuɗ laa beɗu kokoɗnab qaɗeppa dayeye anidmi. Doɗ amu beɗu am, Kayaknu dabittak nai kuɗum yaak ele; nug ikki eblaih aɗit ele, nug qeqeɗi eblaih laih ele.

⁴ Ah amu nug lamen perpel, kokoɗnab ele, bala golppa hak digdig ele, amu bala laa men daden nob okkainab ele, amuppa heppig, amu oogog ele meum. Nug eppegppa kap golppa hak ele aɗom, amu keeke nau digdig, Kayak Nug keeke amunu ooppa uuaknab dootte, amu ah amu nug nuhig ewau pakkua gappai kobol dubuttid nau ele, keeke amu oh am kap-ppa ambak dayom.

⁵ Nug iɗuppa onig laa nai tonakppa yaappig. Onig amuam inam. “Aab okkai Babilon onig, ɠagattag ele, nug am ib baag ah, amu wanppanu keeke nau digdig, Kayak Nug amunu ooppa uuaknab dootte, am amu oh anilag aakku.”

⁶ Da ah amu nug Kayaknu danab ah oppiaawak ele, ag Jesusnu madippig amu, nug ag tiilag, le ɠagattag latteb bia la, kaaka qe dayom. Da anttena, da ottaie dabmak kuɗum aomi.

⁷ Da ottaien dabmak kuɗum anam aoiyi, amu engel laa nug da amelppa aum. “Na aɗinu na ottaina dabmak kuɗum aottem? Da geha ah amunu nai tonak, amu doɗ dakkuɗ ikki eblaih aɗit, qeqeɗi eblaih laih ele, nug ah amu maotte, amunu ele diig mehuqppi dookkut.

⁸ Na doɗ dakkuɗ anidme amu, nug tatam dayom am gemu nug ii daatte, amge dimppa nug moɗ oɗe noa ukka batak iitta eleppanu bekku. Ba amu nug geha padal mekku. Wanppanu danab ah laala ag buk laa, amuam buk onig Bauklel Awe Onig Yaaknu Buk, Kayak Nug wan digma heum, haen amuppa ag onilkad buk amuppa ii yaak ele, ag doɗ dakkuɗnu ottaina dabmak kuɗum aoglag. Aɗinu? Anukka nug dayom, gemu ii daatte dimppa nug moɗppanu bekku.

⁹ Imu amu danab nug doyak dabmak ena ele amu nug dookkunu ippunigtte. Ikki eblaih aɗit amu qauko eblaih aɗit ippunigtte. Ib baag ah nug amuppa daatte.

¹⁰ Ikki eblaih aɗit ele am king eblaih aɗit ele, amu ele ippunigtte. Tanig ele amu ag aakku bena, nena qeppig. Laippu laa amu daatte, laippu amu nug ii beum. Nug ba amu nug haen tutuib daakku.

¹¹ Aria, doɗ dakkuɗ nug tatam dayom ele, gemu nug ii daatte, amuam king eblaih ewam ele. Nug king eblaih aɗit abenlag awa amu, nug geha nug padal mekku.

¹² Amu na qeqeɗi eblaih laih ele anidme amu, amuam king eblaih laih ele ag gemu wanelkad ii aona, king ii beppig, amge ag gumaknu ehah aona, aua laippu doɗ dakkuɗ ele king daaglag.

¹³ Ag ahilag dabmak am laippu amunu, ag ɠagattag ahilkad, ahilkad gumaknu ehah ele, ag amu oh doɗ dakkuɗ mettaglag.

¹⁴ Medappeg, ag Sipsip Nag ele ban hena, Sipsip Nag Nug ag oh eɗadkku. Aɗinu? Nug am naɗi dilag Naɗi, amu king dilag King. Amu laa Nug ag onilagppa eum, Nug ag nuhig daaglagnu tituanattom, ag nuhignu oo metta ii uuak kobol dim lamidtteb ele, danab amu ag oh Sipsip Nag ele daana, ban eɗidkkulag,” awa aum.

¹⁵ Nug anam awowa, engel amu nug baula da amelppa aum. “Na le kuɗum, gappai ah nug amu qaɗelagppa dayeye anidme ele amu, le amuam danab ah beɗulag iɗu iɗu ohppanu, huu ohppanu, wanppan wan ohppanu, amu nai ohppanu ele ippunigtte.

¹⁶ Am na qeqeɗi eblaih laih ele anidme amu, ag oh amu doɗ dakkuɗ ele ag ib baag ahnu oolagppa nau ninig ele dooglag. Ag anam doonna, ag nug heppeg nauhkku. Lamen nuhig oh uɗidppeg, nug beɗu miag daakku. Ag nug teppu lakkulag. Nug beɗu laa oh, amuam ebehi keeke, ag amu aab aɗuppa maippeg eokku.

¹⁷ Ag oolag laippu mena, gumaknu ehah, ag amuppa king daatteb ele amu, ag oh gumaknu ehah amu doɗ dakkuɗ mettaglag. Ib amuppa ag Kayak nug dabmak amu ag oolagppa meum, ag Nug keeke anam bekkunu maittak awom am genab heppeg meu okku. Ag anam heppeg ukkeb, Kayak dabma mattiom amu, nai amu oh meu okku.

¹⁸ Aria, na ah anidme ele, nug am aab okkai, nug wanppanu king oh ikkilag daatte,” awa aum.