Revelesen 16 - Nobonob Baibel

Tappiɗ eblaih aɗit ele

¹ Anam dayeye, da baag laa Kayaknu mettid lag ooppanu engel eblaih aɗit amelagppa aawo doomi. Nug inam aum. “Ag tappiɗ eblaih aɗit ele, oppoɗi bak Kayak Nug danab dilag hipuninnu dootte, amuam tappiɗ amuppa daatte amu, ag tappiɗ amu aon gona, wanppa gokkaɗeg!” awa aum.

² Anam a amu engel ebqak 1 nug wana, oppoɗi bak Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe, wanppan danab ag doɗ dakkuɗnu epponak keeke aona, ag nug dottog noobppa dup nona binag metteb ele, amu dilagppa noum. No, ihilag naunab matte, eheɗ guattom.

³ Engel ebqak 1 dim lamittak, engel ebqak 2 nug wana, oppoɗi bak, Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe yuppa no, yu eɗua danab mauhak tiig bia daye, yuppanu keeke bau amu ohnab mauhadppig.

⁴ Mauheg amu, engel ebqak 3 nug oppoɗi bak, Kayak Nug danab dilag hipuninnu dootte amu, oppoɗi bak amu tappiɗ nuhigppanu leppa, le qeppuɗia bak ele, amuppa gokkaɗe no, amu le tiig eɗuom.

⁵ Tiig eɗue amu, da leppan gumak engel laa nug inam Kayak amegppa aawo doomi. “O Kayak, na gemu daattem, anukka ele daame. Na oppiaawak. Na haen imuppa danab nau heppig ele, na ag epeɗiadna, tutukku hena, nob imu madattem.

⁶ Danab imu ag nahipad danab ah oppiaawak ele, amu propet nahipad ele tiilag aɗappig amunu, na tiig lakkulagnu mattame. Ag nob amu aoglagnu daappig, amu na heme, amuppa na elelenab heme,” awa aum.

⁷ Anam a amu, da qaɗab amuppanu baag laa eewo doomi. Nug ewa aum. “Ao genab, Naɗi Kayak Nakka Ɠagattag Oh Ele, nahip epeɗia nob mattak am genab, tutukku ele,” awa aum.

⁸ Aria, engel ebqak 4 nug oppoɗi bak Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe, aamppa ukke, amu Kayak nug aam hekkunu elele a, aam gakkaɗak, aab aɗu bia, danab ewattom.

⁹ Danab ag gakkaɗak huanaknab amu anam ewatta auta awe, ag Kayak Nug keeke nau danab uug okkai madatteb amu oh gumattom ele, ag nuhignu dabittak nai anana, ag oolag ii eɗuom, Kayak binag amahlak oppiaawak ele ii medappig.

¹⁰ Anam daaegeg amu, engel ebqak 5 nug oppoɗi bak Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe, doɗ dakkuɗnu sia kingppa no, gatatu laa doɗ dakkuɗ amu danab ah ag nug waappa daatteb ele, ag oh tonattom. Tonatte amu danab ag guittak huanak doona, lemaɗulag emalna daappig.

¹¹ Ag guittak doona, ag Kayak, hab aabppa daatte amu, ag nuhignu dabittak nai appig. Aɗinu? Ag ihilag eheɗ guattom, amge ag ahilag hak nau, amunu oolag laa ii eɗuom. Iitta.

¹² Ag oolag ii eɗue, engel ebqak 6 nug oppoɗi bak Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe, Yupretis leppa no, le amu aam bedeppan king ag gona ban hekkulagnu ib bappaidkkunu qaɗaiettom.

¹³ Nug anam he amu, da ouɗi nau ewam, ag oh ahilkad neekkak am og bia, laippu mat naɗinab oɗeppanu, laa doɗ dakkuɗ oɗeppanu, laa propet hambuppuak oɗeppanu, anam doegeg anadmi.

¹⁴ Ouɗi nau amu ag epponak keeke danab haknu elele iitta hetteb. Ag wanppan wan oh dilag king, ag Kayak Nukka Ɠagattag Oh Ele nuhig deɗ naɗippa, amuam deɗ Nug eheɗ hak danab oh epeɗiadkku amu, ag Nug ele ban hekkulagnu qagmattaglagnu gotteb.

^15-16 Aakku, ouɗi nau ag gona, aben laa, Hibru naippa ag aben amunu Armagedon atteb, ag amuppa king qagmaadppig. Amu Naɗi Nug nuhig deɗ naɗinu inam atte. “Antteg! Da yabhok danab bia uɗittem amunu, danab laa nug beɗu miag dayeb, laa ag anidppeg, nug uɗa nemanu, danab nug maɗaɗ maama, nuhig lamen atognoawa daatte amu, nug itittak awom daatte,” awa atte.

¹⁷ Aria, engel ebqak 7 nug oppoɗi bak Kayak Nug danab dilag hipuninnu dootte amu, oppoɗi bak amu tappiɗ nuhigppanu gokkaɗe, ulahppa ukke amu baag okkainab laa Kayaknu sia king, Kayaknu mettid lag ooppa dayom ele amu, aben amuppanu huanaknab e, ewak baag dimittim doum. Nug aum. “Iikku malom!”

¹⁸ Anam a amu amemɗi awewe, hakkaɗ diigppa qeeqe, hakkaɗ qa aɗeɗe ne, mim okkainab ele neum. Digmakppa uɗie uɗie, deɗ mim amu neum, haen amu ohppa danab ah wanppa daanna, ag mim okkainab laa amu bia neene ii anidppig. Iitta! Neum imuam laa oh eɗattak.

¹⁹ Mim ne amu, aab okkai amu nug obate, maha ewam bate, aria atu atu dilag aab okkai ag nena qeppig. Haen amuppa ele amu aab okkai Babilon onig, ɠagattag ele nug Kayak daugppa do, Nug nuhig oppoɗi bak okkainab kap-ppa wain bia mette, Babilon laum.

²⁰ Nud oh ele iitta meppig, wan beɗuppa qauko ele baula ii dayom.

²¹ Amu ais maha, ahilag uug anen anen amu 50 kilogram anam, habppanu nena, danab qaɗelkadppa neppig. Ais okkainab amu nak am naunab nau amunu, ag Kayaknu dabittak nai appig.