Revelesen 13 - Nobonob Baibel

Doɗ dakkuɗ laa yuppanu beum

¹ Anam daye amu, da doɗ dakkuɗ laa qeqeɗi eblaih laih ele, ikki eblaih aɗit ele, nug qeqeɗiudppa haɗ eblaih laih ele daappig amu, da nug yuppanu beebe anidmi. Nug ikkiudppa amu, onilag laala yaak ele. Onilag amuam Kayaknu dabittak nai.

² Doɗ dakkuɗ anidmi ele amuam doɗ laa onig lepad bia; nug baeg amu bea baeg bia, amu nug oɗe amu laion oɗe bia. Mat naɗinab amu nug nuhig ɠagattag doɗ dakkuɗ amu metta, nug nuhig sia king ele metta, amu nug gumaknu ehah okkainab ele mettom.

³ Doɗ dakkuɗ amu nug ikki laippuppa am mauhaknu ihi ele, amge ikki amuppanu ihi amu qaɗaietta ena dayom. Ena daye, wanppanu danab oh anidna ottaina dabmak kuɗum aona, dim lamidppig.

⁴ Mat naɗinab nug doɗ dakkuɗ ehanitta gumaknu ehah mettom amunu, danab ag mat naɗinab noobppa dup nona binag mena, ag doɗ dakkuɗ amu ele noobppa dup nona binag mena, ag inam akka akka nug oɗ medappig. “Aun nug doɗ dakkuɗ imubia? Aun nug nug ele ban hekkulahnu elele?” aon appig.

⁵ Kayak Nug nuhig oo ii neum amunu, doɗ dakkuɗ nug dada nai mattiaya, nug Kayaknu dabittak nai ele mattiom. Nug ele gumak uɗat kalam 42 hekkunu elele dayom.

⁶ Nug oɗe aaha, Kayaknu dabittak nai mattia, Kayak onignu, aben Nug daattenu, amu Kayaknu daup, hab aabppa daatteb ele, nug amu oh dilagnu baeg qak nai mattiom.

⁷ Nug anam heehe, Kayak Nug nuhig ib oo ii neum amunu, nug ban digme, Kayaknu danab ah oppiaawak ele, nug ag ele ban hena, nug ag eɗatta, tabatte noppig. Noeg, nug danab ah huu ohppanu, beɗulag iɗu iɗu ohppanu, nai ohppanu amu wanppan wan ohppanu ele dilag king daakkunu gumaknu ehah awom.

⁸ Danab ag wanppa daatteb ele amu, ag oh nug noobppa dup nona binag menana unuqidkkulag. Yo, danab ah oh, ag onilag Sipsip Nag mauhom ele amu nuhig buk laa, onig Bauklel Awe Onig Yaaknu Buk, buk amuppa ii yaak amu, ag oh doɗ dakkuɗ noobppa dup nona binag mekkulag. Sipsip Nag mauhom ele amu, Kayak Nug anukkanab, wan digma heum haenppa, Nug anam mauhkkunu dabmeum.

⁹ Danab nug daug ele dayeb amu, nug nai imu doyaɗ!

¹⁰ Am aun nug maniguittakppa gokkunu daatte amu, appa gokku. Aun laa nug qep elabppa mauhkkunu daatte amu, nug qep elabppa mauhkku. Kobol amuam Kayaknu danab ah oppiaawak ele, ag tuɗidna uug doyaya eɗittaknuib dabmak awak kobol dim lamidna, ag oo metta ii uuak kobol ele tuɗidna anamib hekkulagoitte ippunigtte

Doɗ dakkuɗ laa wanppanu beum

¹¹ Aria, da doɗ dakkuɗ laa anidmi; nug wan ooppanu beebe anidmi. Nug am qeqeɗi aɗit ele, qeqeɗi amuam sipsip nag qeqeɗi bia, amge nug mat naɗinab nai maditteb bia nai mattiom.

¹² Doɗ dakkuɗ wanppanu beum ele, nug doɗ dakkuɗ tatamnu amu, nug nuhig gumaknu ehah oh awom. Awa, nug doɗ dakkuɗ tatamnu abenab awa, nuhig gumaknu ehahppa doɗ dakkuɗ tatam ehanidkkunu uɗat heum. Nug he, wanppan danab ah oh ele ag doɗ dakkuɗ tatamnu, nug anukka igippa mauhkkunu ihi awom, amge qaɗaiettom ele amu, ag nug noobppa dup nona binag meppig.

¹³ Doɗ dakkuɗ gehanu amu, nug epponak keeke danab haknu elele iitta okkai okkai heum. Uɗat laa amu inam. Nug danab ah noolagppa he, aab aɗu habppanu wanppa neum.

¹⁴ Kayak nug doɗ dakkuɗ geha ahom ele amu, Nug nuhig ib oo ii neum amunu, nug uɗat digdig amu, amuppa doɗ dakkuɗ tatamnu amu ehanitta heum. Amu kobol amuppa wanppanu danab ah hambuppualattom. Nug danab amelagppa inam aum. “Ag doɗ dakkuɗ anukka qep elabppa yaak awom, amge ii mauhom, nug bau dayom, ag nug dottog hoina, binag meig!” awa aum.

¹⁵ Nug anam a, Kayak Nug doɗ dakkuɗ geha ahom, Nug nuhig ib oo ii neum amunu, nug doɗ dakkuɗ dottog amu ouɗi mette, dottog amu nai madikkunu elele dayom. Nug anam he, doɗ dakkuɗ dottog nug haknunab nai ana, nug danab aun nug nug noobppa dup noa binag mekkunu uukku dayeb amu, laa ag danab amu qeppeg mauhkkunu aum.

¹⁶ Aria, doɗ dakkuɗ gehanu amu nug laa ag epponak keeke laa danab ah oh, danab hamu amu danab onilag ele, danab enulag ele, danab daɗek ele, danab begbeg maɗi nid iitta, amu danab ag begbeg maɗi nid ele, ag danab ah amu oh eppelkad naɗiap-ppa o uɗalkadppa mekkulagnu haknunab nai aum.

¹⁷ Anam dayom, amu aun laa nug epponak keeke doɗ dakkuɗ onig o nug onignu leta ebqak nuhigppa ii dayom amu, danab amu nug danab dilagppa keeke daden mekkunu, nug keeke laa meeb, danab nuhignu daden mekkulagnu am elele iitta.

¹⁸ Nai amunu amu, nai iikku am danab ah nai amunu doyak mattaknu nai. Doɗ dakkuɗnu ebqak am danab dilag ebqak amunu, laa nug nai diig tutukku doyak ele, nug doɗ dakkuɗnu ebqaknu ebqaɗ! Doɗ dakkuɗnu ebqak am 666.