Revelesen 12 - Nobonob Baibel

Ah laa mat naɗinab ele

¹ Epponak keeke okkai laa habppa tula be, danab ah anidna dabmak okkai aoppig; amuam ah laa, nug nuhig lamen am aam daye, kalam nug baeg waappa dayom. Nuhig haɗ, amuppa hoɗopai 12 daatteb amu, haɗ amu nug igippa dayom.

² Nug oo ele daya, nid aokkunu heehe, beɗu guitte, aiqakkom.

³ Anam amu, epponak keeke laa habppa tula be, danab ah anidna dabmak okkai aoppig; amuam mat naɗinab kokoɗ ele, nug ikki eblaih aɗit ele, qeqeɗi amu eblaih laih ele. Nug ikkiudppa king haɗ eblaih aɗit ele daappig.

⁴ Nug boobppa hoɗopai habppanu ameg laippu amu oh tatatte, wanppa nena qeeg, ameg aɗitnu amu daappig. Daaegeg amu mat amu nug ah nid aokkunu heum ele noobppa hibaitta, ah nid aweb lakkunu meitta dayom.

⁵ Dayeye, ah amu nug nid danab menuom. Nid danab amu Nug kingnu qakun aenppa hak ele, Nug qakun amuppa danab ah atognoadkku. Ah nug nid amu menue amu laa laippun awa, Kayak toppa nuhig sia kingppa meum.

⁶ Meum amu, ah nug oola, wan meu waknu nakokib eleleppa, aben Kayak Nug nuhignu babaittomppa ag deɗ 1,260 atognonana, ee medappeg lanana daakkunu ukkom.

⁷ Ukke amu, ban hab aabppa neum. Engel okkai onig Maikel, nug nuhikkud engel ele ag mat naɗinab, nuhikkud engel ele ban heppig.

⁸ Ag ban henana, mat naɗinab amu nuhikkud daup ele ag ban eɗidkkulagnu ɠagattag iitta amunu ag tuɗidna, hab aabppa daaglagnu elele iitta.

⁹ Amunu ⌊Maikel, nuhikkud engel ele⌋ ag nug maoeg wanppa noum. Mat naɗinab amu nug anukkanu, nug onig laa am Satan, onig laa am Dewel. Nug wanppanu danab ah oh hambuppualadtte ele. Ag nug maoeg wanppa noum, nuhikkud daup oh ele buɗiatteg wanppa noppig.

¹⁰ Buɗiatteg noeg amu, da hab aab appa baag oqotti okkai laa inam aawo doomi. “Gemu ihinig Kayak Nug he, nuhig Padal ii maknu ehanittak kobol, nuhig ɠagattag, nuhig ɗo maɗoɗ, amu laa Nug tituanom, am Kristus, Nug okkai daakkunu ehah ele miag atieg ippunikkom. Aɗinu? Laa nug ig lainkad amun tuqan ele Kayak noobppa hettoɗiakppa maadttom ele amu, hab daup ag aakku nug maoeg wanppa noum.

¹¹ Ig lainkad ag Sipsip Nag tiigppa, amu doyak diig genabib mehuqttebppa ele ɠagattag aon, ban eɗidna, kekeɗ amu eɗidppig. Ag wanppa enaib, bau daaglagnu amu ii dabmeppig. Iitta. Ag beɗulag maoeg ukke, bau daaglagnu anuqak ii doon, Jesus onignu mauhmananu dabmak ii aon oippig.

¹² Amunu hab, amu hab aab ele, amu ag laa aguppa daatteb ele, ag maɗoɗppan gamag ahak doyeg! Amge wan amu yu ele ahilahnu gadonnab gadon! Aɗinu? Mat naɗinab onig Satan, nug aakku ahilagppa noum. Nug oppoɗi bak huana ele. Aɗinu? Nug dootte, nuhig haen am tutu,” awa aum.

¹³ Aria, mat naɗinab ag nug maoeg wanppa neum ele, nug amu doyowa, nug ah nid danab awom ele amu lamittom.

¹⁴ Amge Kayak Nug ai igel haug aɗit ele ah amu nug hagagaɗa, mat naɗinab uuitta, wan meu waknu nakokib eleleppa, aben Kayak Nug ah amunu babaittom daatteppa ukkeb, maɗ ewam kalam 6 ele ag nug atognonana, ee medappeg lanana daakkunu ukkom.

¹⁵ Kayak haug amu ah mette, mat naɗinab nug oɗeppanu le okkai keleb, ui bia ugakka, ah amu awa heeb mauhkkunu heum,

¹⁶ amge wan nug ah ehanitta, nug oɗe aahe, le mat naɗinab oɗeppanu amu wan ooppa ukkom.

¹⁷ Anam daye amu, mat naɗinab nug oppoɗi huana be, danab ah ag Kayaknu ɗo dim lamidnana, nuhignu nai mehuqnana, Jesus dim lamidtteb ele amu, mat naɗinab nug ag ele ban hekkulagnu ukkom.

¹⁸ Aakku mat naɗinab nug ukka, yu ihippa hibaitta dayom.