Revelesen 11 - Nobonob Baibel

Kayaknu laa aɗi heehe anttomnu mattiak danab

¹ Aria, amu dimppa laa nug melemel maknu ad maha, hokkat bia meɗa, nug aum. “Na ahan, Kayaknu mettid lag amu qaɗab ele melemel maate! Danab ah appa ag Kayak noobppa dup nona binag metteb ele amu, na ag ele ebaqe!

² Amge na Kayaknu mettid lagnu haɗap, iitta aɗi ag aguppa oitteb amu, na haɗap amuppa melemel aib meme. Haɗap amuam melemel maknu dimittim dayaɗ! Aɗinu? Kayak Nug haɗap amu iitta aɗi ag amuppa daaglagnu otiom. Amu iitta aɗi ag Jerusalem, aab okkai amuam Kayaknu amu, ag aab amu kalam 42 eheɗ naunab hettaglag.

³ Anam amu, ⌊da Kayak,⌋ da appi, dahil laa aɗi heehe anttomnu mattiak danab aɗit, aa lamen heɗiag ele takkaya, deɗ 1,260 aa propet nai mehuqkkulah,” awa aum.

⁴ Ad olip aɗit, amu lam maknu balal aɗit ele, aa wan imu ohnu Naɗi, aa Nug noobppa daattep ele amu, aa danab aɗit imu ippunigttep.

⁵ Laala ag aa eheɗ haatkkulagnu heppeg amu, aab aɗu oɗelahppanu doa, ahilah kekeɗ amu ewatteb mauhkkulag. Ao, genab, danab nug eheɗ hatakkunu heeb amu, nug ib anamppa mauhkkuoitte.

⁶ Aa nai mehuqyaya, aa gu nemanu hepeɗ, hab qakkak daakkunu ɠagattag ele. Amu aa hepeɗ, le oh eɗun tiig daaglagnu, aa keeke nau kuɗum oh wanppanu danab ah aqaglagnu ele ɠagattag ele. Aa haen kuɗumtai, o iitta haen laippu laippuibtai anam hekkulahnu oolah dayeb amu, aa aakku hekkulahnu ɠagattag ele.

⁷ Aria, haen aa Kayak nai mehuqya malapeɗ amu doɗ dakkuɗ, nug moɗ oɗe noa ukka batak iitta eleppanu bette ele amu, nug beeb, aa ele ban hekkulag. Ag ban henana, nug eɗata, aqateb mauhkkulah.

⁸ Mauhpeɗ amu aa gaɗalah amu aab okkai okkainu ibppa niiglah. Piksa naippa laa ag aab amunu Sodom, Isip ele atteb. Aab amuppa danab ag Kayaknu laa aɗi heehe anttomnu mattiak danab aɗit dilah Naɗi ad emaitakppa atulppig.

⁹ Amu deɗ ewam maha ele amu danab ah beɗulag iɗu iɗu ohppanu, huu ohppanu, nai ohppanu amu wanppan wan ohppanu ag gaɗalti neegna akkulna daaglag, amu ag auntai laa aa boumatkkulagnu aib akkulag.

¹⁰ Danab wanppa daatteb ele amu, ag aa mauhpiɗnu, “Ena,” ana, ag oolag gamag ahebeb, ɗo hamu nug mettaglag. Aɗinu? Propet aɗit aa danab ah wanppa daatteb ele ⌊ag oolag eɗukkunu ahilah naippa, ahilah hakppa ele⌋ guittak okkai madapiɗ.

¹¹ Aria, ⌊da anidmippa amu⌋ deɗ ewam maha laa ele amu uue, Kayak Nug he, bauklel eɗua aa beɗulahppa no, aa eɗuya hippaidpiɗ. Danab ah ag aa anatna, ag baɗak eheɗ nau dooppig.

¹² Baɗaeg amu, laa aɗi heehe anttomnu mattiak danab aɗit amu aa hab aabnu baag laa nug baag okkaippa inam ewa a doopiɗ. “Aa attan ippa beiɗ!” Ana male amu aa lombigppa hab aabppa tepiɗ. Teeheh, ahilag kekeɗ amu ag aa teeheh anatppig.

¹³ Anam amu, haen amuppanab mim okkai laa ne, aab okkai amuppa lag 10 oolagppa laippu nauhom, lag 10 laa oolagppa laippu nauhom, amu aab okkai ohppa anamib beum. Amu danab 7,000 mim amuppa mauhppig. Laa oh bau daappig ele ag baɗak eheɗ nau dooppig. Baɗak eheɗ nau doon, ag Kayak binag amahlak oppiaawak ele medappig.

¹⁴ Amu engel nug tatam keeke eheɗnabnu gadon a, ewam batom amu, gadon amu oolagppa gadon ebqak aɗit amu aakku beya malapiɗ. Amge doyeg! Haen nakoknab laa ele amu gadon ebqak ewam amu aakku bekku.

Engel ebqak 7 nug trampet nuhig iwalom

¹⁵ Aria, engel ebqak 7 nug trampet nuhig iwale amu hab aab appa da laa baalag okkaippa inam aeg doomi. “Wan ohppan gumak uɗat aakku eɗua, ihinig Naɗi, amu laa Nug danab ah dilag Padal ii maknu ehanittak daakkunu tituanom, am Kristus, Nug ele eppelahppa daatte. Naɗi Nug hanhan uɗat amu hekku,” aon appig.

¹⁶ Anam aeg amu ikki danab 24 ag sia king ⌊anuqak⌋ talilidna, sia king ahilkadppa daatteb ele amu, ag laippun gatelag qaun ona, gomelna, iɗulag wanppa mena, ag dup nona, Kayak binag meppig.

¹⁷ Binag menana appig. “O Naɗi Kayak Nakka Ɠagattag Oh Ele, na gemu daattem, anukka ele daame. Na aakku ɠagattag okkai nahip oh eɗun aon, King daattem amunu, ig na amenppa, ‘Ena heme,’ aot attem.

¹⁸ Iitta aɗi ag nahipnu oo nauhak dooppig, amu na ag amunu bu aqakkutnu haen aakku beum. Anam amunu, na gemu mauhak aɗi epeɗiadkkutnu haen aakku beum. Gemu am ele nahip propet, ag nahipad maɗi nid amu, na ag nob ena madakkutnu haen. Anam amu, gemu am ele nahipad danab ah oppiaawak ele, amu danab oh ag nahipnu ebehilkad oh bodoetta le mette ele, na ag ele nob ena madakkutnu haen. Na danab amu ag onilag ele, onilag iitta ele, amu ag oh nob ena madakkut. Aria, gemu ele na danab ag wanppa tappe nak hena, wan heeg nauhtte ele amu, na heppe, ag nauhkkulagnu haen,” aon appig.

¹⁹ Ag anam aeg amu, Kayaknu mettid lag, hab aabppa daatte ele, laa nug od matule, tituanak nainu kunup amu miag atiom. Miag atie amu, amemɗi awewe, hakkaɗ diigppa qeeqe, hakkaɗ qa aɗeɗe ne, mim ne, ais doɗo okkainab ele neum.