Revelesen 10 - Nobonob Baibel

Engel am buk itoɗiak nakok ele

¹ Keeke amu ba male, nakok dimppa amu da engel ebehi ele laa, nug hab aabppanu neene anidmi. Nug beɗu lombig hautak, di apinak igippa taliliak ele. Nug iɗu amu aamnu amahlak bia, nug baekuɗ amu lag keeke ewa male, biidod akka eona daaegeg anadttem, amubia.

² Nug buk itoɗiak nakok uhuqak ele eppegppa aɗe dayom. Dayeye amu nug baeg naɗiap amu tikkaɗa, yu qaɗeppa tappowa, naneh amu wan qaɗeppa tappa hibaitta,

³ nug laionnu gayak bia baag okkaippa eum. Nug anam e amu, hakkaɗ eblaih aɗit ele ag baalkadppa nai madippig.

⁴ Amu haen hakkaɗ eblaih aɗit ele amu ag nai madippig amu, nai ag appig amu da yaakkulnu hemi, amge hab aabnu baag laa hakkaɗ eblaih aɗit nai madippignu amu inam a doomi. “Na hakkaɗ eblaih aɗit ele nai madippig amunu amu, na dabmakppaib aɗe! Aib yaame!” awa aum.

⁵ Anam a amu engel nug wanppa, yu qaɗeppa ele hibaitta dayeye anidmi, nug eppeg naɗiap hab aab eppona huma,

⁶ nug laa bauklel hanhan daatte, Nug hab heum amu habnu keeke oh ele hattom, Nug wan heum amu wanppanu keeke oh ele hattom, Nug yu heum amu yuppanu keeke oh hattom niitteb ele amu, Nug onigppa nuhig nai ɠagattag qetta aum. “Haen baula ii tuɗidma.

⁷ Iitta. Haen engel ebqak 7 nug trampet nuhig iwaleb amu, Kayaknu nai lokkumak niiom, Nug nuhig maɗi nid propet, Nug ag amelagppa aum ele amu, haen amuppa nai amuam meu okku,” awa aum.

⁸ Anam a amu, da hab aabppanu baag laa tatam doomi ele am baula da amelppa nai mattieye doomi. Nug aum. “Na wana, buk itoɗiak nakok, uhuqom ele amu, na engel nug wan, yu ele tappata hibaittom daatte, na nug eppegppanu awe!” awa aum.

⁹ Awa a amu da wain, engel nug buk itoɗiak nakok, uhuqak ele aɗom amu meɗakkunu oɗ mettami. Oɗ mettai amu, nug da amelppa aum. “Aon laa! Na ootppa amu mua ob dookkut, amge na oɗenppa amu uppuh leppu bia ubuhi ob dookkut,” awa aum.

¹⁰ Nug anam a amu da buk itoɗiak nakok uhuqak ele engel eppegppanu aɗitte lami. Oɗelppa amu uppuh leppu bia ubuhi oum, amge da lain malai, da oolppa amu mua oum.

¹¹ Mua o amu nug da amelppa aum. “Na baula eɗun, propet nai huu kuɗumppa, wanppan wan kuɗumppa, danab ah ag nailag piɗe piɗe kuɗumppa, king kuɗum dilagppa ele madikkutoitte,” awa aum.