Revelesen 1 - Nobonob Baibel

Digmaknu nai

¹ Kayak Nug Jesus Kristus Nug nuhikkud maɗi nid, ag aɗi keeke bekkunu daatte ippunadkkunu Jesus ippunittom. Ippunitte, Jesus he, nuhig engel laa Jon amu ippunitteb, nug amu bukppa yaakkunu uɗiom.

² Uɗia ippunitte amu Jon keeke oh anttom ele amu, iikku bukppa yom daatte. Kayak aɗi keeke Jesus ippunitte, Jesus Kristus engel amegppa a, engel Jon ippunittom ele amu iikku yom.

³ Danab aun aɗi ag Kayaknu nai, keeke dimppa bekkunu imu ebqena dim lamidtteb, o aun aɗi ag nai imu daulagppa doona dim lamidtteb ele amu, ag itittak ena aoppig daatteb. Aɗinu? Haen Kayak Nug heeb, keeke oh buk imuppa yaak daatteb, ag bekkulag am miag doum daatte.

Jon nug humittak nai Kristen tamaniak eblaih aɗit ele dilag yom

^4-5 Da Jon, da Kristen tamaniak eblaih aɗit ele Asia wanppa daatteb ele, da ahilagnu iikku yaattem. Kayak Nug gemu daatte, anukka dayom, dimppa uɗikkunu ele daatte, Nug, amu nuhig Ouɗi, kobol ena oh nuhigppa ambak daatte, Nug Kayaknu sia king noobppa daatte, amu Jesus Kristus, Nug keeke imu ohnu aɗi anttomnu mattiak danab dayaya, oo metta ii uuak kobol dim lamitta ippunikke anidttem, Nug danab mauhppig ele dilag eɗua hibaittak danab anuqak, wanppanu king oh dilag okkai ele daatte amu, ewam amu oh ag ahilag ehanittak okkai hamu mettak, ahilag maɗoɗ ele amu, ag danab ag tamaniak eblaih aɗit ele ooppa daatteb, ahilagppa daaglahnu ool daatte. Kristus, Nug ihinignu oo mauhe, Nug tiigppa ihinig hipunin oh uhuqom,

⁶ Nug ig Nug Mameg, nuhig Kayak ele, ig nuhig ɗo maɗoɗppan mana mettak danab meikkom amu, binag amahlak oppiaawak ele, ɠagattag oh ele nuhigppa hanhan alet ele dayaɗ! Genab.

⁷ Antteg! Nug eɗua lombigppa nekku. Danab oh ag Nug anidkkulag. Yo, danab ag Nug qetti banppa atulppig ele, ag ele Nug anidkkulag. Amu wan ohppan danab ag Nug anidna, ag nuhignu mahiak okkai hekkulag. Ao, keeke amu anam bekku. Genab.

⁸ Naɗi Kayak Nug inam atte. “Da haen oh daattem; da gemu daattem, anukka daami, dimppa uɗikkulnu ele daattem. Da Dakka Ɠagattag Oh Ele,” awa atte.

Jon nug Danab Bekkalag tuleglegppa anttom

⁹ Da Jon, da ag lailag, da ag ele ig oh Jesus nuhigppa laippu daat, uug mua ele imu maottem. Da Kayaknu ɗo maɗoɗ ooppa, amunu uɗat haknu, ag ele daattem. Ig oh Jesus ig hekkunignu atte amu, ig nuhig ɠagattag aot daatta, ig tuɗidta, uug doyaya eɗittaknuib dabmak awak kobol dim lamidttem. Da Kayak nai mattimi da Jesus Kristusnu oolppa genab doottemnu ami, amunu ag da nud laa onig Patmos, amuppa meiɗppig.

¹⁰ Mettidppa amu Kayak Ouɗinu ɠagattag dahilppa ambe, da baag okkai laa trampet oqotti bia da dimulppa mattieye doomi.

¹¹ Baag amu nug inam aum. “Na keeke oh anidna amu, na buk itoɗiakppa yona meppe, Kristen tamaniak eblaih aɗit ele onilag Epesus, Smerna, Pergamum, Taiataira, Sardis, Piladelpia amu Laodisia ele, ahilagppa ukkaɗ!” awa aum.

¹² Nug anam aawo, da danab nai amelppa aum ele anidkkulnu eɗuen neegmi. Da eɗuen amu lam maknu balal golppa hak eblaih aɗit ele daaegeg anadmi.

¹³ Anam andette amu da laa, nug danab bia, lam maknu balal amu oh oolagppa hibaitta dayeye anidmi. Nug lamen elab ukka baegppa batak takkowa, lamen golppa hak momoppa qakkom.

¹⁴ Nug ikki uɗug amu hakkabnab, Nug ameg amu aab ewa diditte amubia.

¹⁵ Nug baeg amu kapa laa onig bras amu aon, aab aɗuppa manaeg ewa, le ma oug me, lamenppa o keeke laappa oppina aoeg, aam ye amahaltte amubia. Aria, nug baag oqotti amu le buɗuɗu kuɗum oqotti otteb amubia doomi.

¹⁶ Nug eppeg naɗiap-ppa amu hoɗoppai eblaih aɗit ele aɗalattom. Qep elab aeg laih laih aeg ele amu, nug oɗeppanu dimittim doum. Nug iɗu amu aam ɠagattagnab naana amahaltte amubia amahalom.

¹⁷ Da Nug anam anttena, mauhak bia Nug baegppa nein qemi. Amge Nug eppeg naɗiap da qaɗelppa ma dayeye, Nug da amelppa aum. “Na aib baɗame. Da hanhan daattem; anuqakppa, batakppa ele da daattem.

¹⁸ Da am laa bauklel hanhannu ele daattem. Da mauhmi, amge antte! Da bau daattem; gemu, hanhan ele. Amu danab mauhppig ele, da ahilag okkai daakkulnu onil ele.

¹⁹ Amunu keeke na anidme, keeke gemu daatteb, amu keeke aɗi dimppa bekkulagnu ele amu oh buk itoɗiakppa ye!

²⁰ Na da eppel naɗiap-ppa hoɗoppai eblaih aɗit ele anidme, lam maknu balal eblaih aɗit ele, ele anidme amu, amunu diig am inam. Hoɗoppai eblaih aɗit ele am Kristen tamaniak eblaih aɗit ele, amu dilag ikki danab. Lam maknu balal eblaih aɗit, amuam Kristen tamaniak eblaih aɗit amu aakku,” awa aum.