Prowerb 8 - Nobonob Baibel

Doyak Dabmak Ena Elenu ewak

¹ ⌊Ah doyak ele nug danab ah dooglagnu baag eleleppa nai maditte, amubia⌋ Doyak Dabmak Ena Ele nug nai ette. Ao, ⌊ah doyak ele nug danab ah dooglagnu baag eleleppa nai maditte, amubia⌋ Diignu Doyak Tutukku nug nai ette.

² Nug ib daugppa wan hume takppa hibaitta daatte; O, nug ib oɗatleppa, appa hibaitta daatte.

³ Iitta amu, nug aab okkainu aɗ od guguittak, appa hibaittom daatte; O nug aab okkainu aɗ odppa daatte. Dayaya, nug inam ette.

⁴ “O danab ah, da ahilagnu ettem. Ao, da danab ah oh dilagnu inam ettem.

⁵ Ag laa ag doyak ii awak ele amu, ag ⌊dahilppanu⌋ eheɗ bemanu dabmak awa dabmak amu dim lamittak kobol doon aon oiyeg! Ao, ag laa ag dabmak tutukku iittappa keeke hetteb ele, ag diignu doyak tutukku aweg!

⁶ Da keeke meu ele madittem amunu, doyeg! Ao, da nai tutukku, da amuib madittem.

⁷ Aɗinu? Da nai genab aakkuib madittem. Ge, da hambuppuak nai madikkulnu oolppa uuaknab doottem.

⁸ Keeke oh da madittem am nai doya mala hettoɗia epeɗia elele mettak kobol dim lamidtte. Ao, da nai madittem amu, laa am kaliak iitta, o laa am nai eheɗ tutukku iitta, am ele iitta.

⁹ Danab ah ag diignu doyak tutukku ele, ag da nai attem am tutukku anam dootteb. Ao, danab ah ag doyak ena ele, ag da nai attem am nai enaib anidtteb.

^10-11 Doyak dabmak ena ele am men laa onig rubi, daden nob okkainab ele, am amu eɗidtte. Aɗi keeke laa na aokkutnu oot huan daatte ele amu, keeke amu doyak dabmak ena ele ii eɗidtte amunu, na dahil ippunittak nai aokkutnu anuqak doon, silwa aokkutnu am anuqak aib doome. Ao, na doyak ena aokkutnu anuqak doon, na gol enanag aokkutnu anuqak aib doome.

¹² Am da, Doyak Dabmak Ena Ele, da laa, amuam Eheɗ Bemanu Dabmak Awa Dabmak Amu Dim Lamittak, da nug ele i lag laippuppa daattep. Da doyak ena, amu laanu neekkakppa nug dabmak eheɗ ii aomanu kobol ele aɗalat-ttem.

¹³ Aun laa nug Yawenu ebehi oh bodoetta le mette amu, nug eheɗ haknu kobolnu nau ninig ele dootte. Da, Doyak Dabmak Ena Ele, da dada kobol, beɗuppa tak kobol, eheɗ hak kobol, amu nai eheɗ tutukku iitta mattiak ele, da kobol amu ohnu nau ninig ele doottem.

¹⁴ Danab ulum nai ena mettak, aria epeɗia ha dabmak ena awak ele dahilppa daattep. Ge, diignu doyak tutukku, amu ɠagattag ele dahilppa daattep.

¹⁵ Da, Doyak Dabmak Ena Ele, da king ag dahil nai dootteb ele ehanatti, ag danab ah gumadtteb. Ao, gumak danab okkai ag dahil nai dootteb ele amu, ag nai doya mala hettoɗia epeɗia elele mettak dim lamittaknu ɗo metteb.

¹⁶ Da king tiigppan danab ehanattitti, ag danab ah ahilkad gumadtteb. Ao, da anuqak danab, amu epeɗiak danab ag genab tutukku hak danab daatteb amu, da ag oh ehanadttem, ag wan gumatteb.

¹⁷ Amu aun laa ag dahilnu oolag mauhtte amu, da ahilagnu ool mauhtte; am laa ag da aniɗna dim lamiɗkkulagnu mattiɗtteb, ag da aniɗtteb.

¹⁸ En okkai, binag, en haen elab daatte, genab tutukku hak kobol ele da eppelppa, ⌊da laa ag dahil nai dim lamidtteb ele, da ag madakkulnu aakku⌋ daatteb.

¹⁹ Da am ad meu otte bia, amge meu dahil amu gol enanag eɗittak. Ao, da am ad meu otte bia, amge da meu ottem ele am silwa enanag eɗittak.

²⁰ Da, Doyak Dabmak Ena Ele, da hanhan genab tutukku hak kobol aakkuib hettem; da hanhan nai doya mala hettoɗia epeɗia elele mettak kobol hettem.

²¹ Da laa ag dahilnu oolag mauhtte ele, da en okkai madattem; da hei, ahilag en maknu oo anen anen am ambetteb.

²² Yawe Nug da tatam heiɗom; Nug keeke laa oh ii hattom haenppa, da heiɗom.

²³ Ge, Yawe Nug da digmakppa heiɗom; Nug wan ii heum haenppa, da heiɗom.

²⁴ Nug yu ii heum haenppa, Nug ah nid menutte bia da heiɗe bemi. Ao, Nug le qeppuɗin betteb ii hattom haenppa, da heiɗom.

²⁵ Nug qauko okkai abenppa ii maatta, Nug da heiɗom. Ge, Nug qauko nakok ii hattom haenppa, Nug ah nid menutte bia da heiɗe bemi.

²⁶ Nug wan, wanppan dad okkai ele ii hak haenppa, Nug da heiɗom. Ao, Nug wanppan gappud ii heum haenppa, Nug da heiɗom.

²⁷ Nug amu oh ii heum haenppa da heiɗom, amu haen Nug hab ha, abenppa meum amu, haen amuppa da Nug ele daamuɗ. Ao, danab nug neekke, umanab ukke, hab nug na, yu aɗe anidttem umu, haen Nug amu heum amu, haen amuppa da Nug ele daamuɗ.

²⁸ Haen Yawe Nug lombig attan meum amu, da Nug ele daamuɗ. Ao, haen Nug le qeppuɗia bak, yu unuqagnab, appa daatteb hattom amu, da nug ele daamuɗ.

²⁹ Haen Nug yu tom metta, yu nug tom ii eɗidmanu aum amu, da Nug ele daamuɗ. Ao, haen Nug wan ukku babaittatta dayom amu, da Nug ele daamuɗ.

³⁰ Nug keeke oh hattette amu, da Doyak Dabmak Ena Ele, da Nug heqoppa danab uɗat laala haknu doyak okkai ele dayeye ehanidmi. Deɗ oh da Nug ele daagnihnu enanagnab doyeye, da Nug ele daagnihnu ool gamag okkai ahe daamuɗ.

³¹ Nug keeke oh heumnu da ool gamag ahehe, da danab ah dilagnu ele enanagnab doomi.

³² Anam amu, aria, O da bekkalad, ag dahil nai doyeg; laa ag da ippul tappan oitteb amu, ag itittak ena aon malappig daatteb.

³³ Ag dahil ippunittak nai imu doona, ag doyak dabmak ena ele dim lamitteg; ag aib oolagppa uuak dooppig!

³⁴ Ag da laulppa deɗ anen anen ohppa uɗin, dahil nai doyeg; Ag anam hena amu, ag itittak ena aoglag.

³⁵ Aɗinu? Aun laa nug da mattiɗa aniɗtte amu, nug aakku bau dayak andette, Yawe Nug nuhignu ena dootte.

³⁶ Amge laa nug da ii mattiɗa aniɗtte amu, nug aakku nukka nuhignu eheɗ hette. Ao, laa oh ag dahilnu nau ninig ele dootteb amu, ag aakku mauhkkulagnu ib oɗeppanab daatteb.” Doyak Dabmak Ena Ele nug anam aakku ette.