Prowerb 7 - Nobonob Baibel

Ah gamu uuitta danab laa ele oittep, ah amunu nau aomanu dabmettak nai

¹ Da bekkal, na dahil nai dim lamitte! Ao, na dahil haknunab nai imu nahip dabmakppa meppe dayaɗ!

² Na dahil haknunab anak dabmedakkut dayeb amu, na bau daakkut; da na aɗi keeke ippunidttem amu, na amunu, “Am keeke enanag, meu ele,” doon, na amu dabmena, atogno!

³ Na danab laa nug keeke laa daug atimanu, nug muɗi keeke, nug eppeg doɗoppa qagatte, amubia na hanhan dahil ippunittak imu nahip dabmak anuqakppa meppe dayaɗ! Ao, danab laa nug keeke laa daug atimanu uɗugppa yaatte, amubia na dahil ippunittak, nahip dabmakppa meppe dayaɗ!

⁴ Na doyak dabmak ena elenu, “Na da appinal,” aon a! Ao, na diignu doyak tutukku amunu amu, na, “Da nug ele i tiinih laippu,” aon a!

⁵ Doyak dabmak ena ele, amu diignu doyak tutukku ele aa hepeɗ, na ah ewau pakkua gappai hette ele ii oimya; na ah nug gamu uuitta, eheɗ oiyaya, nug na ele niiglahnu nai ittag ele maditte amu, na nug ele ii oimya.

⁶ Da amu attemnu diig am, deɗ laa da laulnu gililppa ulah ibuppa ukke, neekki ukke,

⁷ amu da laa ag doyak ii awak ele anatten, da ag oolagppa laa anidmi. Ao, nid bau oolagppa da nid danab bau laa anidmi, Genab, da nid bau laa, nug doyak dabmak ena ele nuhigppa iitta ele anidmi.

⁸ Nug am ib laa, ah ewau pakkua gappai hette ib amuppa daatte amu, nid bau amu nug ib amu, ib nug oitteppa ele oɗatleppa gukkuitta ukkom. Ao, nug ib amu awa noono, ah amu laug gukkuitta ukke anidmi.

⁹ Ge, tuebnab, amahlak iitta mekkunu heehe, gatatu manakkunu heum, haen amu da nug anidmi.

¹⁰ Nug anam noono, ah nug anidkkunu doum. Nug ib baag ah dilag lamen takka, nid amu nuhig naippa eeɗeb, nug eheɗ heeb, nug ele niiglahnu matu lokkumakppa dab-nab-meum.

¹¹ Ah amu nug hanhan baag okkaippa nai mattiaya, gamu waappa dayak uua, nug laugppa ii daatte.

¹² ⌊Nug danab laa nug ele niiglahnu anidkkunu amu,⌋ nug haen laala ibppa oitte. Ao, haen laala nug danab ah ag qagmetteb abenppa oitte. Haen laala nug ib oɗatleppa daatte.

¹³ Nug anam aakku hette, amge tueb laa da laulnu gililppa ulah ibuppa ukken, neekki ukke anidmi amu, ah amu nug nid bau doyak dabmak ena ele iitta antta, nug nugatoppa ukka aɗa, ootuqittatta, uɗa nak iitta ele amegppa aum.

¹⁴ “Gemu da laippu dayaknu ofa hein malen, da teppu laa mana mettak amuppanu awe uɗien, uppa uma lakka memi daatte. ⌊Doppe goɗa laɗu!⌋ Ge, gemu da Kayak amegppa keeke genabnab hekkulnu nai ain qakken, keeke medakkulnu ami amu, gemu da dahil nai amu aakku hein malami.

¹⁵ Amunu da na anidkkulnu gumitten domi. Ao, da na anidkkulnu mattitten, da aakku anidmi!

¹⁶ Da linen lamen kaala iɗu iɗu ele, Isip heppig amu, da amu niiak aben dahilppa duqadmi daatteb.

¹⁷ Niiak aben dahil muttuɗig enanag okkunu amu, da mir kalu muttuɗig enanag, alo kalu muttuɗig enanag, sinamon kalu muttuɗig enanag ele niiak aben dahilppa gokkaɗmi.

¹⁸ Amunu doppe, i tuqan imu qiɗ heɗaɗa niipuɗ, wakkaɗaɗ! Ao, i anam niipuɗ, oonih huana gamag ahaɗ!

¹⁹ Aɗinu? Da gamul nug ippa ii daatte, nug laih umanab ukkom oitte.

²⁰ Ao, nug men doɗo kuɗum aɗa ele ukkom amunu, da doottem, nug paha ii uɗima. Ge, nug kalam kunum ba dayebeb, nug eɗua uɗikku,” awa aum.

²¹ Ah gamu uuitte, danab laa ele oittep ele nug dabmak eeɗak nai amu mattie, danab bau doyak dabmak ena ele iitta nug ah amu ele eheɗ hekkulahnu dim lamittom. Ao, ah nug danab amu nuhig nai ittag ele, nug amuppa nug oo eeɗom.

²² Ah amu nug nid bau amu amegppa anam mattie, pahanab nid amu nug ah amu dim lamittom. Nug dim lamittom, amu makau okkai ebehi ele mameg nug omale, qe mauhak abenppa tette, amubia nid amu nug makau okkai ebehi ele hette bia heum. Ao, nid bau nug heum amu, doɗ dia nug pelemppa tette, nug amubia heum.

²³ Dia nug pelemppa tette amu, pelem mameg nug latppa qe mauhtte. Ao, ai laa nug uhuippa no amu, uhui mameg nug qe mauhtte. Amubia nid bau amu, nug doyak dabmak ena ele iitta, nug hette, nug amuppa mauhkku, amge nug amu ii dabmette.

²⁴ Anam aakku amunu, o bekkalad, ag daulag human, da aɗi nai attem imu ag doon, elele metteg!

²⁵ Ag ah ewau pakkua gappai hette ele, ag nug dim lamidkkulagnu aibnab dabmeppig; ag nug oitte ele, ag ib amu aon aib goppig.

²⁶ Aɗinu? Nug he, danab kuɗum ag nug dim lamidna nauhppig. Genab, nug he, kuɗumnab ag nug dim lamidna mauhppig.

²⁷ Nug laug am mauhak moɗppa ukkaknu ib. Ao, amuam ib, danab nug amuppa ukka, nug mauhkku.