Prowerb 6 - Nobonob Baibel

Aib Kayak ii dabmaama hak kobol heme

¹ O da bekkal, na nahip mudippan laa nug lon awewe, na nug lon aokkunu nahip keeke lonnu onig awak daakkunu nahip nai ɠagattag qettan mattime dayeb, ge, danab laa nug lon awewe, dimppa nug eɗua lon mameg men doɗo amu medakkunu elele iitta daakku dayeb, na medakkutnu genab hekkutnu mattime dayeb,

² na nahip mattiakppa doɗ pelemppa teum daatte bia daattem dayeb, ge, na nahip naippa, ai nug uhuippa noum daatte bia daattem dayeb,

³ na aakku nahip mudippan laa eppegppa aakku teme daattem amunu, o bekkal, na nug eppegppa daamnanu, na inam hekkut. Na nakka na onin qeppe neeb, na gona, nahip mudippan laippu, na nug ehanidkkutnu ame amu, nug lon amu eɗua daden ii mekku dayeb na hekkut, nug na nai amuppanu uhuqkkunu, na ii daye daye nug oɗ medakkut.

⁴ Na paha aib niime, ⌊na nai ame amu waappa daamnanu, tatam goppe, nahip mudippan laippu ele nai babaitteɗ⌋! Ao, na amen paha aib heppe amuhom. ⌊Na nahip mudippan laippu eppegppa daamnanu, tatam na goppe, nug ele nai babaittoya, dimppa na amen qamuhkkut⌋!

⁵ Doɗ gasel nug hikan danab antta, nug oola, huana qaietta ukke, hikan danab ii qette, na amubia he! O iitta, na ai nug danab uhui meeme antta, nug oola, hagagɗa gotte, amubia na nahip mudippan laippu eppegppanu ahan, oolna ukke!

⁶ Aun na bahin iittanab amu, na gona kakah anadna neekkadna daye! Ao, na neekkadna autna aon daanna amu, na doyak dabmak ena ele awe!

⁷ Kakah ag ahilag tolittak danab, o ikki danab, o gumak danab laa iitta,

⁸ amge ag ee awak haenppa, ag ee aon, teɗulagppa metteb. Ao, ag ee oɗuak haenppa ee aon, dimppa lakkulagnu ahilag teɗppa metteb.

⁹ Na danab bahin iittanab ele amu; haen gane laa ele ukkeb, na anam niinna daakkutnu uukkut? Ao, na haen ganeb niiakppanu ahakkut?

¹⁰ Na hanhan attem. “Da nakok laa ele niikkul hettem,” o, “Da abenppa ukken qein nakokib niikkul. Niie gad ii mepa”, o, “Da tuqan niimi, amge amun imu ele nakokib niikkul.” Na hanhan anam aakku attem.

¹¹ Na anam attem amunu, pahanab, yab danab nug laan keeke awe, laa nug keeke iitta daatte bia, na anam aakku pahanab daɗek daakkut. Ao, pahanab yab danab, nug lat keeke ele, nug danab laanu keeke awe, laa nug keeke iitta daatte, anambia na pahanab daɗek daakkut.

¹² Am danab nug aɗi keeke ena ii hette, nug nau hak danab daatte, nug aha oiyaya, nug nai diig ena iitta, uɗig uuak ele maditte.

¹³ Nug amegppa, eppegppa, baegppa ele danab buppualadtte.

¹⁴ Ao, nug ooppa hambuppuak dayeye, nug eheɗ hekkunu maittak aotte; nug danab ah oolagppa hanhan kaboliak daakkunu heehe, nug qak daatte.

¹⁵ Diig amunu uug naunab nuhigppa pahanab bekku. Ao, nug nauhak pahanab antta, padal meeb, babaittaknu ib laa ii daama.

¹⁶ Am keeke eblaih laippu ele, Yawe Nug amunu nau ninig ele dootte. Ge, Yawe Nug keeke eblaih aɗit elenu ooppa uuaknab dootte.

¹⁷ Keeke eblaih aɗit ele amuam inam: dada ha laa eɗittaknu dabmak awak kobol, nai hambuppuak mattiak kobol, danab ah eheɗ laa ii heeg, laa hamu aqe mauhak kobol,

¹⁸ kobol nau haknu maittak awak kobol, pahaettak kobol eheɗ haknu kobol,

¹⁹ hettoɗiakppa aɗi heehe anttomnu mattiak danab dayaya, nai hambuppua, ii daye daye mattiak kobol, amu laa nug he, awag amag ag nug qetteb, kobol amu ele.

Danab ah ele, aa ewauib oiyeɗ

²⁰ O da bekkal, da na mamen, da na amenppa haknunab imu attem amu, na dim lamitte; aib tippalme! Ao, na anin doyak ippunittom amu, na aib uume!

²¹ Na nai i auɗ doome ele amu, na hanhan amunu dabmenana oiye! Ge, danab nug keeke laanu dabmekkunu ha, kaleleppa amunu at qakka, baagppa pale daatte, amubia nai i auɗ doome, nai amu hanhan nahip dabmakppa daakkunu dautppa dayaɗ!

²² Haen na adeppa adeppa oikkut amu, ihinih nai am ulum medakku. Ao, haen na niikkut amu, nai amu na atognoidkku. Ge, haen na eɗun ahakkut amu, nai amu na aɗi aɗi hekkutnu ippunidkku.

²³ Aɗinu? Haknunab anak ihinihppan imu, ag am lam laa bia. Ao, ihinih ippunittak imuam amahlak laa. Amu anak ihinih na tolitta, daut batebeb, na aokkut amu, amuam na bauklel daakkutnu ippu aakku.

²⁴ Na anin, da ele, ihinih nai imuam na ah nug mauhnoak danab laa ele niitteb, na nug ele niimyanu doyak medatte. Ao, nai imuam na ehanitteb, ah ewau pakkua gappai hette amu, na nuhig nai ittag ele ii doomnanu doyak medatte.

²⁵ Nug ah iɗu tuqaknab ele, amge na amu anidna, nug ele niiglahnu beɗunppan eeɗak, na amunu aib dabmena, nug dim lamidme! Ao, nug na neekkittatta, amegppa beɗun eeɗkku, amge na nuhig dabmak amu aib dim lamidme.

²⁶ Aɗinu? Na ib baag ah ele niiglah dayeb, Kayaknu neekkakppa am ena iitta, me na amu hekkut dayeb, na bret kunum laippuib amu haknu ah amu medakkut, amge, na ah ewau pakkua gappai hette ele niiglah dayeb amu, na mauhkkutnu oittem.

²⁷ Danab nug aab ottag awa, tuɗippa meeb, lamen nuhig iite eoma?

²⁸ Danab nug aab ottag attan oiyebeb, baeg iite guittak aoma?

²⁹ Amubia, danab aun laa nug danab laa wau ele niiglah amu, nug guittak aokku; nug geha amunu nob nau aokku.

³⁰ Am danab laa nug enug qeebeb, mauhkkunu oiyaya, diig amunu nug ee lakkunu yab aokku dayeb amu, danab ag nuhignu ena iinab doyak ii doomna.

³¹ Ag nuhignu anam ii doomna, amge ag nug anam heebeb anidkkulag dayeb amu, epeɗiak danab ag heppeg, yab danab nug aɗi keeke awom amu, nug keeke amunu daden maknu nob, aria nob amubianab eblaih laippu ele laa ele eɗua, keeke mameg medakkunu akkulag. Yab danab nug nob amu mekkunu nug keeke nuhig oh meeb, laa daden metteb, keeke mameg medakku dayeb amu, anamib hekku. Nug iinab tippalma.

³² Anam aakku yab danab nuhigppa bette, amge danab nug ewau pakkua he laa wau ele gappai hettep amu, nug epeɗia ha dabmak ena awak kobol ii dootte ele; nug nukka nug ha, nug padal mette.

^33-34 Danab laa nug danab laa wau ele niiglah dayeb amu, ah amu gamu nug ahnu, dahilib doya laa aomanu doyak aɗa daakku. Nug anam daya, nug danab heum amunu oppoɗi beeb, ameg kokoɗ ebakku. Anam aakku amunu, ah gamu nug danab nug wau ele niipiɗ, nug nob mettakppa nuhignu oo gai-iitta doya oo metta ehanidkkunu iinab dabmema amunu, danab nug danab laa wau ele niittep, nug guittak naunab awa doyaya, uɗa nak nau guittak ele awa dookku. Nug amunu hanhan uɗa nak dookku.

³⁵ Ah gamu nug kobol nau amunu daden nob ii aoma. Na daden nob tak gane mekkut amu, amuppa ele na nuhig dabmak elele medakkutnu am elele iitta.