Prowerb 5 - Nobonob Baibel

Danab ah ele, aa ewauib oiyeɗ

^1-2 O bekkal, na hanhan laanu neekkakppa nug dabmak eheɗ ii aomanu kobol aon oikkutnu, na nai doyak ele madikkutnu amu, na daut human, doyak dabmak ena elenu nai dahil aon doon, elele mette! Ao, na dahil nai meu unuqagnu, na nai amu doon autna awe!

³ Aɗinu? Am ah ewau pakkua gappai hette amu, nug nuhig nai mattiak am ee ubuhinab ele, lanaknu enanag bia daatte; amuppa nug danab hambuppuidtte. Ao, ah amunu nai am goɗen enanag, amubia daatte; amuppa nug danab eeɗtte.

⁴ Digmakppa danab nug anam ubuhi bia dookku, amge batakppa ah amunu hak am uud ad tiig mua ele bia. Ao, batakppa ah amunu hak am qep aeg laih laih ele, aeg oh am aegnab ele, am amubia daatte.

⁵ Ah amu nug mauhak ibuppa aakku daatte. Ao, ah amu, nug ippu am moɗ agappanab gotte.

⁶ Nug bauklel dayaknu ippu dab-ii-mette. Ao, ib nuhikkud amu kaliak, amge nug amu ii dootte.

⁷ Anam amunu, o da bekkalad, gemu ag dahil nai doyeg! Ag aibnab da nai madittem imu paɗappeg neum.

^8-10 O bekkalad, ag ahilag ɠagattag laa mattamnanu, ag laa nug laa guittak mettaknu uug ii dootte ele waappa daamnanu, ag ahilag en, ag en amu laa ag ii doyadtteb ele eppelagppa hamu mattamnanu, ag uɗat huanak henan en aona, ag en amu danab laa laulagppa memananu, ag ah ewau pakkua gappai hettenu ib oɗeppanu awaidna dayeg! Ao, ag aib nug laug od gukkuidna wappig.

¹¹ Na ah nug gamu uuitte, danab laa ele oittep ele niiglah amu, nahip bau dayak gog tak haenppa na geha beɗun hiɗeb, ebehin teeb, guittak okkainab doon daanna, na aiqagakkut.

¹² Am na geha akkut. “Laa ag da toliɗna, bu meɗaglagnu heppig amu, da uue autenab aomi! Ao, laa ag da daul batappig amu, daug batak ahilagnu doyak nakok laa aokkulnu, da uue autenab aomi!

¹³ Da dahilad ippunittak danab oɗelag iinab doomi. Ge, da ib ippunittak danab dahilad, ib ippuniɗppig, da ag oɗelag dookkulnu iinab hemi.

¹⁴ Da Kayaknu danab ah oolagppa dayeye, moɗ nauppa nein qein mauhkkulnu, da moɗ amu agappanab iikku daattem.” Na anam aon akkut.

¹⁵ O bekkal, na laa dilag tenkppanu le aib aon lame. Nahip-ppanu aakkuib aon la! Ao, na laa dilag le moɗppanu le aib aon lame. Nahip-ppan aakkuib aon la!

¹⁶ Le qepuɗia bak nahipnu le am hamu hamu ib digdigppa gokkaɗkku am enate? Ao, nahip le ugakka gotte ele am aab haɗap-ppa hamu gokkaɗkku am enate?

¹⁷ Amubia, na waat ele, aa aya oiyeɗ! Na aib ah laa ele oippig.

^18-19 Na dabmak imu aon, aɗan oiye! “Doɗ dia am doɗ neekkak nuhig enanag ele, danab anidtte am enanag dootte. Amubia ah dahil am ah iɗu tuqak, enanag, nug dahilnu oo mauhtte.” Na dabmak amu aon, aɗan oippeppe, nid yuɗ nug anig huh lanana, elele dootte, amubia na ah nahipnu eleleib dookkutnu ool daatte. Ge, ah nahip nug nahipnu oo mauhtte, diig amunu na nuhigib hanhan daan oikkutnu ool daatte. Na nug ele oiyya, nid menuglahnu ool daatte. Ao, na nahip ah, na nid bau daan aome amu, na nuhignu gamag ahak dookkutnu ool daatte.

²⁰ O bekkal, na ah ewau pakkua gappai hette amu, na nug eppegppa aib nome. Ao, na aib danab laa wau ele niipiɗ.

²¹ Aɗinu? Yawe Nug keeke oh danab laa hette am Nug anidtte. Ao, Nug danab aɗi hette ele amu tutukku hettoɗidtte.

²² Nau hak danabnu amu, nuhig eheɗ hak am pelem laa doɗ awom bia nug awom daatte. Ao, nuhig hipunin am danab muɗippa hippalak daatte, amubia nug hippalitte daatte.

²³ Nug tolittak aokkunu uua oiyaya, nukka nuhig oiyak ii atognoum amunu, nug mauhkku; nug dabmak tutukku ii awa, Kayak dab-ii-maama hak kobol amuib dim lamittom.