Prowerb 4 - Nobonob Baibel

¹ O bekkalad, da ag mamelag, ag dahil ippunittak nai doyeg! Ao, ag diignu doyak tutukku aoglagnu amu, ag daulag human, dahil nai doon, elele dabmetteg!

² Aɗinu? Keeke da ag amelagppa madittem imuam, tutukku, am genabnab. Ag aib dahil ippunittak uuppig.

³ Laa amu, da mamel laugppa, da nid nakok dayeye, okkai ii memi, da dakka da anilnu nid daami, haen amuppa,

⁴ da mamel nug da doyak meɗa ippuniɗa aum. “Na dahil, na nai imu na meut ohppa aɗe! Ge, na bauklel daakkutnu, na dahil haknunab nai aɗan daye!” awa aum.

⁵ Da mamel nug nai amu amelppa anana, nug aum. “Na doyak dabmak ena ele, aria diignu doyak tutukku ele aon oiye! Ge, na aib nai dahil imu daut atiom, o na aib dahil nai imunu dekkaɗna laih gome!” awa aum.

⁶ Amu na doyak dabmak ena ele aon oikkutnu aib uume! Aɗinu? Na ii uukkut dayeb, doyak dabmak ena ele ehanitteb, na ena oikkut. Ao, na doyak dabmak ena elenu oot mauhaɗ! Nug na gumittebeb oikkut.

⁷ Doyak dabmak ena ele am anuqak daatte; amunu na doyak dabmak ena ele awe! Ge, na diignu doyak tutukku aokkutnu na nahip keeke ohnab ekkutnu dayeb amu, na anam he! Aib uume!

⁸ Na doyak dabmak ena elenu keeke anuqak dookkut dayeb amu, doyak dabmak ena ele amu heeb, na onin okkai ele daakkut. Ao, na doyak dabmak ena elenu oot huana daakku dayeb amu, diig amunu doyak dabmak ena ele heeb, na binan ele daakkut.

⁹ Na anam hekkut dayeb amu, doyak dabmak ena ele ehanittak okkainab metteb, na danab okkai, igippa bala anttak ena ele daatte, na nug bia daakkut. Ao, na anam hekkut dayeb amu, doyak dabmak ena ele ehanittak okkainab metta heeb, na danab okkai, igippa haɗ enanagnab ele daatte, na nug bia daakkut.

¹⁰ Doye, o bekkal! Da nai attem imu, na aon aɗana oiye! Na anam hekkut amu, na maɗ maɗ bau daakkut.

¹¹ Da, na mamen, da na doyak dabmak ena ele ibuppa gokkutnu ulum medattem. Ao, da ib tutukku, amuppa omaitte gottem.

¹² Na da oɗel dim lamidkkut dayeb amu, na gonana, na uugppa ii wamana. Ao, na qaiqaɗ gonana, na ii taataɗ qettamna.

¹³ Keeke da na ippunidttem ele amu, na aɗan autna awe! Na aib agappe ukkom! Da ippunidttem ele amu, ippunittak amuam na ehanitteb bau daakkut amunu, na nahip dabmakppa mena, dabmettan autna awe!

¹⁴ Am na nau hak danab ib gotteb ele, na amuppa nakok laa aibnab gome! Ge, na ib laa, eheɗ hak danab ag amuppa oitteb amu, na amu qe-eɗidna wana, laih ukke!

¹⁵ Na ib amu oɗeppa aib wame. Na aib danab amu ippulag mattan gome. Ao, na ib amu dimettan, ib laa aon, mattan ukke!

¹⁶ Aɗinu? Nau hak danab ag eheɗ laa ii heppig dayeb amu, ag niiglagnu elele iitta daaeg ukke, ag eheɗ hewona niitteb. Ao, danab amu ag eheɗ ii heeg, danab laa ii na qeum dayeb amu, ag paha ii niimna.

¹⁷ Laa amu, danab amu, ahilag ee am nau hak kobol aakku. Ao, danab amu, ahilag le lanak am laa guittak nau mauhnoak mettak aakku.

¹⁸ Amu genab tutukku hak danab ippulag am digmakppa ena daatte, gamagppa enanag daatte, batakppa am enanagnab daatte; am aam haɗaedette, amahlak nakok nakok wanppa daye ukke, aam be, amahlak naɗi daatte, amubia daatte.

¹⁹ Anam, amge nau hak danab dilag ib amu gatatu naunab bia; aɗi keeke he, ag nena qetteb amu, ag ii dootteb.

²⁰ O bekkal, na daut human, da aɗi attem imu doon, elele mette! Na dahil nai doon autna awe!

²¹ Keeke da na amenppa madittem ele imu, am na heppe, nahip-ppa dayaɗ! Ao, na ootppa mena, aɗan oiye!

²² Aɗinu? Danab ag atognona dim lamidtteb ele, am ag bauklel madatte; nai amu he, danab nug beɗu oh ena daatte.

²³ Nahip bau dayak attem gokku amu, na oot unuqagnabppanu bette amunu, na oot unuqagnab dabmettan, aut autnanab awe!

²⁴ Na aib nai hambuppuak ame. Ge, na aib nai diig ena iitta uɗig wak ele mattime.

²⁵ Haen oh na noomppanab neegnana, kobol tutukku neekkitte! Ao, na gottemppaib neegnana, kobol enaib neekkitte!

²⁶ Heppe, na ippun tutukkuib dayaɗ! Ao, na ib ɠagattag daatte, amuppaib oiye!

²⁷ Na ib tutukku, amuib mattan oiye! Na aib naɗiap-ppa, o iitta, nanehppa gome. Na kobol eheɗ aib heme.