Prowerb 31 - Nobonob Baibel

King Lemuelnu nai mattiak

¹ King Lemuelnu nai mattiak am inam. Nai imuam nai meunab ele. Nug anig, nug nai imu ippunittom.

² “O bekkal, da bekkal, da na menuidmi. O da bekkal, da na menuidkkulnu Kayak unuqitten, nuhignu keeke laa genabnab hekkulnu nai ain qakkai, Nug he menuidmi.

³ Na aib ah dim dim lamadnana, nahip ɠagattag kakidme! Ao, uɗat nahip hekkutnu yag bak iitta memanu, na ah ag heeg king nauhtteb amu, na ag ele aib oippig.

⁴ O Lemuel, king, ao king, ag wain huana aib lappig. Yo, gumak danab ag aib le ɠagattag lakkulagnu hik qak dooppig.

⁵ King ag le ɠagattag huana lakkulag dayeb amu, ag ɗo aɗi hekkulagnu ippunadtte, ag amu daulag atieb; ag nai doya mala hettoɗia epeɗia elele mettak kobol ii dim lamidna, ag danab ah, laa ag eheɗ hadatteb ele, ag amu dilag oh elele ii hettoɗiadna, elele ii ehanadkkulagtai.

⁶ Anam amge, danab ag mauhtteb, ⌊ag guittak tuɗidna doomnanu⌋ wain ⌊marasin daakkunu,⌋ madappe laig! Ao, na danab ag oolagppa uug nau dootteb, ⌊ag ehanadkkunu⌋ wain ⌊marasin daakkunu,⌋ madappe laig!

⁷ Danab amu ag anam lakkulag dayeb amu, ag ahilag guittak daulag atikku. Ao, ag anam lakkulag dayeb amu, ahilag daɗek naunab dayaknu uug okkai ii dabmemana.

⁸ Danab ah laa, okkai danab ag ag oɗelag dooglagnu uun dab-ii-madatteb ele amu, na amu dilagnu ehanadna, nai mattie! Ao, laa eheɗ hattak waappa daatteb, na amu dilagnu nai doya mala hettoɗia epeɗia elele mettak kobol dim lamidna mattie!

⁹ Na inam hekkutoitte: Hettoɗiakppa amu, na nai doya mala hettoɗia epeɗia elele mettak kobol dim lamidna mattie! Ao, hettoɗiakppa na daɗek danab amu laa ag keekenu tutu mak daatteb ele amu, na amu dilagnu nai doya mala hettoɗia epeɗia elele mettak kobol dim lamidna hee!” Lemuel anig nug nai amu nug ippunitte mattiom.

Wau ena laanu binag mak nai

¹⁰ Danab nug ah laa diig enanag, nug wau daakkunu mattia anidkkunu am uug ele; men rubi am keeke enanag, daden nob okkainab ele, amge ah diig enanag nug amu eɗitta aut auta aotte.

¹¹ Gamu nug wau amu, nug nuhignu genab elele dookkunu elele; gamu nug wau, nuhigppanu keeke ena kuɗumnab aɗa oitte.

¹² Ah diig enanag anam nug bau daatte, haen amu ohppa; nug gamu enaib hedatte, nuhigppa eheɗ laa ii hette.

¹³ Nug lamen haknu keeke, amuam wul, plaks ele, awa; nug yag bak doyaya, eppegppa lamen bappaitte.

¹⁴ Keeke laihnu awa dadennu mak danab ag heeg, danab ag uubppa yu qaɗeppa oinna, keeke aon uɗitteb; amubia ah diig enanag nug laugppa daatteb ele dilag ee, nug amu dad umanu awa uɗitte.

¹⁵ Nug haɗa-ii-edette aha, nug baekkudppa dilag ee babaittowa: nug maɗi ah nuhikkud dilag ee ele bappaidtte.

¹⁶ Ah diig enanag amu nug wan maha laanu dabmaama, uɗat medatte. Ao, nug men doɗo eppegppa uɗat haaha awom, amuppa nug grep dad eppaknu keeke daden ma, ebatte.

¹⁷ Nug nuhig uɗatnu yag bak doyaya hette; nug eppeg am uɗat nuhig hekkunu ɠagattag elele.

¹⁸ Nug aɗi keeke hette amu, nug keeke amu ena beum anidtte; nug uɗat he ukke, uudo, gatatu ele uɗat hette.

¹⁹ Nug koitaknu muɗi nukka eppegppa hette. Ao, nug lamen haknu muɗi nukka eppegppa hette.

²⁰ Daɗek danab nuhigppa ehanittak aoglagnu uɗitteb amu, nug ii lamadtte; danab keekenu tutu mak ele, nug ag ele ehanadtte.

²¹ Oug haenppa sno neene, nug laugppan oh dilagnu uug ii qette; amunu diig am, ag oh gakkaɗak aon daaglagnu lamen ena ena ele.

²² Nug nuhig niiak aben tonaknu lamen hatta; nug linen perpel, amu linen hakkab ele awa, amuppa nug nuhig lamen ha tagatte.

²³ Wan imunu ikki danab ag nug gamunu ena elele dootteb; gamu nug ikki danab laa amu, nug ag ele oh ikki danab dilag qagmak aben aab ahilag odppa daatte, ag amuppa qagmetteb.

²⁴ Nug linen lamen koitatta, dadennu me, laa ag daden meegeg; nug imuagppan matagiɗ lamenppa hak ele hatta, keeke laihnu awa dadennu mak danab ag aotteb.

²⁵ Nug am ah ɠagattag, binag ele; nug dimppa attem bekku, nug amunu baɗak ii dootte.

²⁶ Nug doyak dabmak ena ele nai mattiaya; nug oo metta ii uuak kobol dim lamittaknu ippunittak nai laa madatte.

²⁷ Nug, nug baegppan dabmadatta; haen nuhig ii kakidtte.

²⁸ Nid naunau nuhikkud ag nuhignu enaib maditteb; gamu ele nug anam mattiaya, binag ele mette.

²⁹ Ag atteb. “Ah kuɗum ag uɗat diig enanag hetteb; amge na ag oh eɗadttem,” aon atteb.

³⁰ Laa noolagppaib oo bodoette, enanag, maɗoɗ ele hak, amuam keeke genab iitta; iɗu tuqak ele am haen oh ii daama; amge ah aun nug Yawenu ebehi oh bodoetta le mette amu, nug binag aokkuoitte.

³¹ Nug nuhig hakppa, nuhig oiyakppa ele nob ena aokkunu daatte amunu, ag metteg! Ikki danab ag ahilag qagmak aben aab ahilag odppa daatte, ag appa daanna, ag ele nuhig haknu binag meig!