Prowerb 30 - Nobonob Baibel

Doyak danab Agurnu nai mattiak

¹ Imuam Jake bekka Agur, nug nai mattiom. Nai imuam nai meunab ele. Agur nug nai imu Ithiel, Ukal ele amelahppa mattiom.

² “Da doɗ bia daattem. Laa ag ele doɗ bia daatteb, amge da anam daye aute autenab aottem. Laa ag danab daan, diignu doyak tutukku aɗan oitteb, amge da amubia ii aɗattem.

³ Da am doyak dabmak ena ele ii aomi; da Kayak Oppiaawak Elenu doyak ele ii aomi daattem.

⁴ Aun nug hab aabppa tewowa, eɗua neum ele? Aun nug ulah awa, eppegppa aɗom? Aun nug yu, lamen nuhigppa hautom? Aun nug wan imu oh heum? Laa amu heum am onig aun? Nug bekka ele am onig aun? Na doottem amunu, ⌊da ele dookkulnu,⌋ na appe doyei!

⁵ Keeke oh Kayak Nug atte am genabib; Nug laa, ag Nug ahilag padal mak eɗitteb ena dayaknu ehanittak daakkunu nuhigppa dotteb amu, Nug ahilag guppiɗ daatte.

⁶ Nug aɗi atte amu, na aib tuɗidna, laa ele ame; na amu hekkut dayeb amu, Nug na daut bata, na am hambuppuak danab daattem ippunidkku.

⁷ O Yawe, na keeke aɗit meɗakkutnu unuqidttem. Ao, da ii mauhen, wan imuppa bau daattem, haen imuppa na meɗakkutnu oɗ medattem.

⁸ Keeke aɗit amuam iikku. Na heppe da nai hambuppuak nakok laa aibnab aib mattimi; amu laa am, na heppe, da aib enub o daɗek danab daami. Da anam ii daakkulnu, da deɗ anen anen bau dayaknu keeke, amuam ee, le keeke, da anamib aokkulnu oɗ medattem.

⁹ Da enub, o daɗek danab dayak uuttemnu diig am, da enub danab daakkul dayeb, da na dimetten, ‘Yawe am aun?’ akkultai. O iitta, da daɗek danab daakkul dayeb, da keeke yab awen, amuppa da na, dahil Kayak, da na onin heppi, laa dilag neekkakppa ena iitta daakkutai.

¹⁰ Aib laan maɗi nidnu onig nauhkkunu nai nau nuhig okkai amegppa mattime; na anam hekkut dayeb amu, maɗi nid nug na eheɗ laa awaknu anak waappa daakkutnu ab, na uug anidkkut.

¹¹ Laa ag mamelkad eheɗ laa awaknu anak waappa daaglagnu anana; ag anilkad ele ii itadtteb.

¹² Laa amu, ag akka, ag ahilagnu, ag oolagppa oppiak ele daatteb dabmetteb; amge ag ihak iitta, ag dubuttid nau ele.

¹³ Ag amu, ag am danab ag dada hena laa eɗattaknu dabmak aon dabmena autnanab aotteb; ag danab laanu, ‘I oonihppa, na am elele iitta,’ ag anamnab dootteb.

¹⁴ Ag doɗ laa ag aelkad qep elab aeg hawaɗ ele bia, ag amubia daatteb. Ao, ag doɗ laa nug hippegppa qep qataqak daatteb, ag amubia daatteb. Ag doɗ nau amu ag lailkad aqaeg mauhtteb bia, ag daɗek danab eheɗ hadappeg, ag wanppa ii daamnanu hetteb. Ao, doɗ nau amu ag lailkad aqaeg mauhtteb bia, ag laa ag keekenu tutu mak daatteb eheɗ hadappeg, ag danab ah oolagppa baula ii daamnanu hetteb.

¹⁵ Baubau awaknu hik qak kobol am nid gani ele. Aɗit oh am, ‘Da meɗe! Da meɗe!’ ge iitta ettep. Keeke ewam laa, ag, ‘Dahilnu elele,’ iinab atteb; ewam am iitta, keeke waɗele, ag anam bia dootteb. Amuam inam:

¹⁶ Laa am mauhak aben, Laa am ah mattoi, nid ii menuak ele, Laa am wan qaɗaiettak, gu elele ii aotte, Aria, laa am aab dittiak huanaknab hette ele.

¹⁷ Laa nug mameg awa awa qedatte; anig oɗe dim lamidkkunu, ‘Am keeke hamunab,’ dootte amu, alɗal nug ameg oolnu noakppa ya lakku. Ao, kaub ag nug beɗu lakkulag.

¹⁸ Keeke ewam laa da dabmein doyadkkulnu elele iitta; ewam am iitta, keeke waɗele da dabmein, diignu doyak tutukku dookkulnu elele iitta. Amuam inam:

¹⁹ Laa am ai igel, nug attem ha, hab waappa hagagɗa oitte, Laa am mat attem ha, men attan oitte, Laa am uub attem ha, yu qaɗeppa oitte, Aria, laa am danab ah aa attem heya, laippu bettep.

²⁰ Imuam ah ewau pakkua gappai hette, nuhig kobol iikku. Nug kobol nau ha, hamunab doya; nug, ‘Da eheɗ laa ii hemi,’ awa atte.

²¹ Keeke uug ele ewam laa wanppa bena heeg, wan uɗaltte; ewam am iitta, keeke waɗele wanppa bena heeg, wan am uug amu maokkunu elele iitta. Amuam inam:

²² Laa am maɗi nid laa nug king abenab awa, king bette, Laa am danab nug Kayak dab-ii-maama ii dim lamidtte ele, nug ee elelenab laum daatte,

²³ Laa am ah nug ooppa muaib doyaya, danab aotte, Aria laa am maɗi ah nug nuhig okkai abenab awa daatte.

²⁴ Wanppa keeke waɗele ag keeke nakok daatteb, me ag doyak dabmak ena okkai ele daatteb. Keeke amuam inam:

²⁵ Kakah, ag doɗ ɠagattag iitta, me ag haenppa ahilag ee qagmetteb.

²⁶ Doɗ laa onig koni, ag am ɠagattag iitta, me ag teɗulag baippa, aben men eleppa hetteb.

²⁷ Tap-lokus, ag ahilag king laa iitta, me ag oh huu mena gotteb.

²⁸ Aria, tikkun, ⌊am doɗ nakokib, am gai-iitta,⌋ danab ag eppelagppa aɗualadkkulag, me tikkun ag danab dilag king, ag ahilkad lag enanagnabppa daatteb.

²⁹ Keeke ewam laa, tappa ukkak ahilkad am anttaknu enanag; ewam am iitta, keeke waɗele ag anam aakku tappan gotteb. Amuam inam:

³⁰ Laa am laion, nug doɗ laa oh oolagppa ebehi ele, nug keeke laa baɗatta ii ooltte,

³¹ Laa am matuk dawai, matuk anig neekkittegeg oitte, Laa am meeme dawai, Aria, laa am king laa, nug nuhikkud ban daup talilidna daaegeg oitte ele.

^32-33 Makau huh teppu ele tappiɗppa mena kopippa keeke huana kabolinna daakkut dayeb amu, keeke onig bata bekku; danab laa noob itoɗikkut dayeb amu, noob tiig nekku, amubia, laa nug aɗi heeb, laa nug oo nauhkku amu, nug mehqak aakku bekku. Anam amunu, na danab nug Kayak dab-ii-maama ii dim lamidtte ele bia hena, na nakka na binan okkai meme dayeb; o na kobol nau hekkutnu maittak aome dayeb; na pahanab uukkut. Aib tuɗidna heme!” Amuam Agur, nuhig nai aakku.