Prowerb 29 - Nobonob Baibel

¹ Danab nug oo eɗukkunu daug batak kuɗum awawa, hamu bia doyaya, nug oo eɗumanu dabmak nuhig ɠagattag eppe oitte, nug guittak okkai awa nauhkku; nauhaknu aɗi keeke bette amu, baoliaknu ib laa iitta.

² Genab tutukku hak danab kuɗum bena daaegeg amu, danab ah ag gamag ahak aotteb; nau hak danab ag gumak heegeg amu, danab ah ag oolag uug ele daye, aiqagatteb.

³ Danab nug doyak dabmak ena elenu oo mauhtte amu, nug mameg oo gamag ahak medatte; amge laa nug ib baag ah ele oitteb, nug nuhig en kakidtte.

⁴ King nug nai doya mala, hettoɗia, eppedia, elele mettak kobol dim lamidtte amu, nuhig wan am ɠagattag daatte; amge king nug lokkumakppa eheɗ haknu ehanittak wagai ma aotte, amuppa nug he, wan nuhig nauhtte.

⁵ Aun nug mudippan laippu oo eeɗaknu ittag nai maditte; nug nukka nuhignu pelem mette.

⁶ Eheɗ hak danab nug hipunin hette amu, hipunin amu ag pelem bia daaegeg, doɗ pelemppa tette bia, danab nug pelem amuppa tette; amge genab tutukku hak danab ag ahi ettanna, gamag ahak dootteb.

⁷ Genab tutukku hak danab ag, ag hettoɗiakppa epeɗiak danab ag daɗek danab dilagnu nai doya mala hettoɗia epeɗia elele mettak kobol dim lamidkkulagnu dabmena autna aotteb; amge nau hak danab ag, ag anam dab-ii-metteb.

⁸ Awa awa qettak danab ag aab okkai ooppa uug heeg bette; amge danab ag doyak dabmak ena ele, danab amu ag heeg, oo nauhak oug mette.

⁹ Danab nug doyak dabmak ena ele nug danab Kayak dab-ii-maama ii dim lamidtte ele hettoɗiakppa mette dayeb amu; danab nug Kayak dab-ii-maama ii dim lamidtte ele, nug nai mauhnoak huanak mattiaya, imak ele hekku. Mattiakppa meu ena ii bema.

¹⁰ Qe mauhak danab ag danab nug nuhig dabmak, oiyak ele am tutukkuib amu, ag nuhignu nau ninig ele dootteb; ag genab tutukku hak danab aqappeg mauhkkulagnu hetteb.

¹¹ Danab nug Kayak dab-ii-maama ii dim lamidtte ele, nug nuhig oo nauhak huan bemanu ib ii keldotte. Iitta. Nug oo nauhak bekkunu ib ooɗtte; amge danab nug doyak dabmak ena ele, nug nukka nuhig oiyak pehettak atognotte.

¹² Gumak danab laa nug hambuppuak danab dilag nai dootte dayeb amu, nuhig ehanittak anuqak danab oh ele ag aakku nau hak danab bena daaglag.

¹³ Keeke laippuib laa, daɗek danab, amu laa nug daɗek danab eheɗ hadatte ele, keeke amu aa oh tonat-tte; amuam Yawe Nug he, aa oh amelahppa neegtte.

¹⁴ King laa nug hettoɗiakppa daɗek dilagnu, doyak diig genabib dim lamidtte dayeb; nuhig king dayak am haen oh ɠagattag daakku.

¹⁵ Tolittak, bu mettak ele he, nid nug doyak dabmak ena ele daatte; amge nid nug tolittak, bu mettak ele ii aotte amu, nug he, anig nug uɗa nak nau guittak ele aotte.

¹⁶ Nau hak danab ag kuɗum bena, ena daan oinna, hipunin qeegeg, hipunin hak okkai mette; amge genab tutukku hak danab ag bau daanna, nau hak danab nena qeppeg anidkkulag.

¹⁷ Na bekkat tolidna, bu medakkut amu, na oot maɗoɗ ele daakkut; nug heeb, na nuhignu enanagnab dookkut.

¹⁸ Danab ah ag Kayak nainu ippunittak ii aotteb amu, ag beɗulag, ahilag dabmak ele ag aɗi hekkulagnu eeɗatteh, ag amu aakku hetteb; amge laa ag Kayaknu ɗo dim lamidna oitteb ele, ag itittak ena aoppig daatteb.

¹⁹ Danab nug nuhig maɗi nid naippaib nug tolidkkunu elele iitta; amunu diig am, maɗi nid nug daugppa nai dookku, me nug aɗitai laa ii hema.

²⁰ Danab nug Kayak dab-ii-maama ii dim lamidtte, amuam nau, amge laa nug nuhignu nug baolia, ena bekkunu dabmak aɗa oikkunu elele; amge danab nug tatam ii dabmewowa nai maditte amu, amuam kobol naunab, laa nug nuhignu nug baolia, ena bekkunu dabmak aɗa oikkunu am uug ele.

²¹ Danab nug maɗi nid nuhig nug nid nakokppa digma, nid atognotte amu; deɗ laa gog takppa nid nug nug bekka bekku.

²² Danab nug oo nauhak danab daatte, nug he, nug mehqak bette; danab nug paha oppoɗi be ameg kokoɗ ebatte amu, nug hipunin kuɗum hette.

²³ Danab nug dada hette, nuhig hak amu he, nug na qette; amge danab nug oo bodoettakppa daatte amu, nug binag aotte.

²⁴ Aun laa nug yab danab laa ehanitte yab hette, nug nugakka nuhig kekeɗ daatte; Nug hettoɗiakppa nai genab madikku dayeb, nug amunu bu aokku, me nug ii akku dayeb amu, Kayak Nug nug bu medakku.

²⁵ Danab dilagnu baɗittak am pelem bia daatte; amge aun nug Yawenu ooppa genab dootte, nug eleleib daakku.

²⁶ Danab kuɗum ag gumak danab nug ii helo bia me, nug ehanadkkunu hetteb; amge nai doya mala hettoɗia epeɗia elele mettak kobolnu amu, danab ah ag amu Yawe, nuhigppanu aotteb.

²⁷ Genab tutukku hak danab ag hambuppuak danab dilag ⌊kobolnu⌋ oolagppa uuaknab dootteb; nau hak danab ag genab tutukku hak danab dilag ⌊kobolnu⌋ oolagppa uuaknab dootteb.