Prowerb 28 - Nobonob Baibel

¹ Nau hak danab ag auntai laa ii lamattegeg, haen amuppa ele ag baɗan, oolna gotteb; amge genab tutukku hak danab ag laion bau bia, ag ɠagattag daatteb.

² Wan laappan danab ah ag nai tappe nak danab ah daatteb dayeb amu, wan amuppa gumak danab laa ba, na qe, laa ahatte; amge wan laappan danab okkai nug doyak dabmak ena ele, diignu doyak tutukku ele amu, wan amu ɠagattag daatte.

³ Danab okkai laa nug daɗek danab ah eheɗ hadatte amu; nug am gu huananab naan he, datta keh keeke iitta metteb, nug amubia daatte.

⁴ Laa ag Kayaknu ɗo dim lamittaknu uutteb, ag nau hak danab onilag okkai madatteb; amge aun aɗi ag Kayaknu ɗo dabmettan dim lamidtteb ele, ag nau hak danab eheɗ hemanu wagai metteb.

⁵ Eheɗ hak danab ag nai doya mala hettoɗia epeɗia elele mettak kobol diig tutukku ii dootteb; amge danab ag Yawe antta, Nug dim lamidkkulagnu Nug maditteb, ag nai doya mala hettoɗia epeɗia elele mettak kobol diig tutukkunab dootteb.

⁶ Laa daɗek danab daatte, amge nug Kayaknu neekkakppa danab ooppa kaliak laa iitta ele daatte, amuam enanag; amge laa nug danab enub ele, me nug danab nug eheɗ haknu tiigppa daatte, amuam naunab.

⁷ Nid nug Kayaknu ɗo doya, dim lamidtte, nug am doyak dabmak ena ele aɗatte; amge nid nug laa ag oolagppa dubuttid huanak ele, nug ag ele layam daatteb, nug mameg uɗa nak nau guittak ele medatte.

⁸ Laa ag lonnu intres, ag amuppa enulag okkai tuɗidna aotteb amu; Kayak Nug heeb, ahilag en am laa ag daɗek ehanadtteb ele, ahilag daakku.

⁹ Aun nug Kayaknu ɗo dim lamidkkunu uua hette amu; Kayak Nug nuhig unuqittaknu am ooppa uuaknab dootte.

¹⁰ Laa nug genab tutukku hak danab ah, ag eheɗ hekkulagnu eeɗadtte ele, nug nuhig pelemppa tekku; amge Kayak Nug danab ag nuhig neekkakppa danab oolagppa kaliak laa iitta ele daatteb amu, Nug ag aug ena madakku.

¹¹ Danab enub ele nug nukka nuhignu, “Da am doyak dabmak ena ele,” anam dabmekkutai; amge daɗek danab, diignu doyak tutukku ele, nug enub danab nug anam ele iitta anidtte.

¹² Haen genab tutukku hak danab ag okkai danab betteb amu, danab ah oh ag gamag ahak aotteb; amge haen nau hak danab ag gumak aben aotteb amu, danab ah ag wana lokkumtteb.

¹³ Aun nug hipunin nuhig tonatte, nug ena ii daama; amge aun nug hipunin nuhig miagib mattia dimadatte amu, Kayak Nug danab amunu oo gai-iitta doyaya, oo metta, ehanidtte.

¹⁴ Danab aun nug hanhan Yawenu ebehi oh bodoetta le mette, nug itittak ena awom daatte; amge aun nug kobol ena hemanu dabmak nuhig ɠagattag ebatte, nug am uugppa notte.

¹⁵ Nau hak danab laa nug danab ah ag ɠagattag iitta ele gumadtte dayeb; amuam laion, o bea enug qak doya, doɗ laa qa lakkunu hette, am amubia aakku.

¹⁶ Okkai danab aun nug epeɗia ha dabmak ena awak kobol ii dootte ele, nug nuhikkud danab ah eheɗ hadatte; amge laa nug men doɗo ib eheɗppa awaknu nau ninig ele dootte amu, nug am haen elabnab okkai daakku.

¹⁷ Danab nug laa qe mauhtte amu, nug moɗppa nokkunu oola gotte; auntai laa nug nuhig haknu nob aomanu aib ehanittom.

¹⁸ Laa nug Kayaknu neekkakppa danab ooppa kaliak laa iitta ele amu, Kayak he, nug padal ii mette; amge laa nug eheɗ haknu nug tiigppa daatte ele, nug pahanab na qekku.

¹⁹ Aun laa nug dad uɗat nuhig pehettak hette ele, nug ee elelenab ele daakku; amge laa nug dabmak hamu hamu dim lamitta oitte amu, nug daɗek daakku.

²⁰ Danab laa nug oo metta ii uuak kobol haahaib daatte, nug itittak ena kuɗum aokku; amge laa ag enulag okkai ele daaglagnu hik aqe oitteb, ag am bu aoglag.

²¹ Laanu diig iittappa ena doya, laanu diig iittappa eheɗ doyak kobol am ena iitta; amge epeɗiak danab laala ag lokkumakppa eheɗ haknu ehanittak huppu nakoknab aona, ag kobol eheɗ aakku hetteb.

²² Danab nug, nug ehanittak uua, nukka nuhignuib dabmette, nug enub okkai aokkunu hik qette; amge nug ii dootte, uma iitta nug daɗek daakku.

²³ Danab laa nug laa eheɗ heumnu daug batakku dayeb, danab ah ag danab nug daug batak heum ele, ag gog takppa nuhignu oolag elele daakku; amge danab nug oo eeɗaknu ittag nai maditte ele, ag nuhignu oolag elele ii daama.

²⁴ Aun laa nug mameg o anignu keeke yab awa, “Imu eheɗ iitta,” akku; nug am laa keeke he nauhtte layag daatte.

²⁵ Baubau awaknu hik qak danab nug he, nug mehqak ahatte; amge aun nug Yawenu ooppa genab dootte, nug ena daakku.

²⁶ Aun nug, “Da dakka dahil oiyak, dabmak, keeke oh atognokkulnu elele,” anana, amunu ooppa genab dootte ele, danab amu nug Kayak dab-ii-maama ii dim lamidtte ele; amge aun nug doyak dabmak ena ele dim lamidtte, Kayak Nug heeb, nug elele daakku.

²⁷ Aun nug daɗek keeke madatte, nug bau dayaknu keekenu tutu ii mema; amge danab ag laa nug laa daɗek daaegeg, ii ehanadtte amu, nug eheɗ laa awaknu anak waappa daakku.

²⁸ Haen nau hak danab ag gumak aben aotteb amu, danab ag wana, lokkumtteb; amge haen nau hak danab ag nauheg amu, genab tutukku hak danab ag eleleib daatteb.