Prowerb 27 - Nobonob Baibel

¹ Na aib na nakka binan mena, “Da genabnab butti uɗat okkai inamnab iikku hekkul,” ame; amunu diig am, butti aɗi bekku amu, na ii doottem.

² Na aib na nakka binan humame; uuppe, laa nug na humittaɗ! Na uuppe, laa nug na humittaɗ; nakka nakka iitta!

³ Men ag uulkad ele, ihi ele nug uug ele, danab maokkunu am uug dootte; amge danab nug Kayak dab-ii-maama ii dim lamidtte ele nug he, uug bette amu, danab uug amu maokkunu am uug naunab dootte.

⁴ Danab nug oo nauhkku dayeb amu, nug laa guittak medakkutai. Ao, danab nug oppoɗi be ameg kokoɗ ebatte dayeb amu, nug laa guittak nau medakkutai; amge danab nug dahil doya laa aomanu doyak aɗa daakku dayeb, nug heeb, laa padal mekkunu elele.

⁵ Laa nug genab eheɗ heum haenppa, nug layag am laa noolagppa daug batakku, amuam nau iitta, am ena; amge laa nug laanu oo mauhak dootte, amge nug amu lokkuma ii ippunidtte, amuam nau.

⁶ Layapnu daug batakppanu guittak awak, amuam keeke genab, nai amunu na genab elele dookkutnu elele; amge kekeɗnu ootuqittak huanak, amuam keeke genab iitta.

⁷ Danab nug oo dittiak dootte, nug uppuh leppu, ⌊aɗitai ee laa ele⌋ lakkun uutte; amge danab nug enug qette amu, nug ee lanak baag ninig ele ubuhi bia doyaya latte.

⁸ Danab nug appag diig uua, yawaia oitte; nug am ai laa teɗ uuitta, aha hagagɗa mauhnoak oitte, nug amubia daatte.

⁹ Leppu muttuɗig ena, amu kalu danab ile muttuɗig enanag bette ele amu, keeke aɗit amu aa heeh, danab nug oo gamag ahatte; amubia danab layag nug ulum nai ena, atognoa medatte amu, nug amunu ele oo gamag ahatte.

¹⁰ Na layap aib daut atiom, na mamen layag ele aib daut atiom. Ao, uug naunab nahip-ppa beeb, na layap mudippan laippu, nug eheɗ doomanu na nug uun, na awan o amap uma daatte, na nug laugppa aib gome. Mudippan laippu miag daatte nug na ehanidkkunu elele; nug na baenadppa uma daatteb eɗattak ehanidkku.

¹¹ O bekkal, na doyak dabmak ena ele aɗan oikkut, amuppa na heppe, da ool gamag ahakku; na doyak dabmak ena ele aɗappe amu, da aun nug dahilnu, “Keeke hamunab,” dookku amu, da nuhig nai nob mekkulnu elele daakkul.

¹² Eheɗ bemanu dabmak awa dabmak amu dim lamittak danab nug uug bette antta, nug dekkaɗa, aben uug ii bekku ele, nug appa gotte; amge danab ag doyak ii awak ele, ag hettebib tuɗidna gonana, guittak aotteb.

¹³ Danab laa na nug ii doottem ele, nug nahipnu lon aokkunu heebeb, danab laa na doottem, nug lon amunu keeke lonnu onig awak daatte mekkunu ab amu, nug danab na ii doottemnu hette amunu, na nuhig en laa aon aɗappe, lon mameg lon eɗua daden meeb, eɗun mette! Ao, laa nug ib baag ahnu amu hekkunu heebeb, na nuhig keeke lonnu onig awak daakkunu awe!

¹⁴ Danab nug nuhig mudippan laippu buttuanab oqotti naɗi ele humidkku dayeb; nuhig mudippan laippu nug ena iinab dooma, nug nai amunu eheɗ laa awaknu anak waappa dayaknu nai bia dookku.

^15-16 Danab wau nug nai awa ona awa doak maditte, nug gu nak deɗppa le toɗotoɗoedatte bia hette; aun laa nug ah amu nug awa ona awa doak nai ii mattimanu hekku dayeb amu, nug ulah uukkunu hekku bia, o keeke goɗen oɗuittak daatte aɗakkunu hekku bia.

¹⁷ Danab laa nug aen maha laa awa, aen maha laa lahaɗtte bia; danab ag akka akka nug doyak medatteb.

¹⁸ Aun laa nug ad fig dabmetta atognotte, nug ad fig meu lakku; aun nug nuhig okkai dabmedatte, nug binag aokku.

¹⁹ Danab itotog leppa anidtte; amubia danab diig attemnab daatte, nuhig dabmakppanu ba, miag atitte.

²⁰ Mauhak am danab daalo, padal mak ele danab daalo, aɗit amuam baubau danab ah diilopnu doolop; amubia, danab ag keeke baubau aoglagnu oolag hette.

²¹ Danab nug gol, silwa ele aab aɗuppa me, huananab gakkaɗe, le me, dubuttid laa daatte dayeb amu, danab nug maute ukke, golppa o silwappa ii daatte; amge binag mak am ma anttak danab metta ha, ib amuppa danab ooppa nau daatte dayeb he, miag atitte

²² Danab nug ee aeg awa, ganuɗaknu masinppa me ukke, kalu daatte. Anam amge, na danab nug Kayak dab-ii-maama ii dim lamidtte ele, na nug anam bia eheɗ hedakkut dayeb amu; nug nuhig Kayak dab-ii-maama hak kobol ii uuma.

^23-24 En okkai am hanhan ii daama; king, nug buɗub ele, ag hanhan king ii daamna. Diig amunu na ⌊keeke ele daakkutnu, na⌋ nahip makau ag attem daatteb doon autna awe! Ao, na nahip sipsip atognona gumatte!

²⁵ Na gikkiɗah, doɗ dilag eenu otaɗna aoppe, gikkiɗah bau eɗua bekku; eɗua beeb, na qauko naunauppanu gikkiɗah amu ele otaɗna aon uɗin, ma lakka me!

²⁶ ⌊Ib amuppa na heppe, nahipad doɗ elele daappeg,⌋ na sipsip gaiɗ uɗilkadppanu lamen nahip haknu uɗilkad aona, na meeme laa dadennu maadppe aoppeg, na dad okkai laa daden mekkutnu elele.

²⁷ Laa amu, na anam hekkut dayeb, na meeme dilag huh huanak ele daappe, na, na baenadppa ele ag labeppeg, nahipad maɗi ah ag ele lakkulag.