Prowerb 26 - Nobonob Baibel

¹ Sno, aam haenppa nekkunu ii daatte, ee aeg awak haenppa gu nekkunu am uug ele; amubia, danab ag Kayak dab-ii-menan ii dim lamidtteb ele, ag binalag aoglagnu am ena iitta.

² Danab laa nug eheɗ laa ii heum, me danab ag nug eheɗ laa awaknu anak waappa daakkunu akkulag dayeb, nai amuam meu ii oma; nai amuam ai naunau ag hagagaɗna laih laih gona, aben laippuppa ii daatteb, am amubia, nai amu danab amu, nuhigppa ii daama.

³ Hos, donki ele ag dabmak ii aotteb amunu, danab nug makkuɗaknu muɗippa hos ulum medatte, o iitta, donki ikki muɗippa qakka eeɗaɗa, ulum medatte; amubia, danab ag Kayak dab-ii-menan ii dim lamidtteb ele, ag buppa ulum aotteb.

^4-5 Haen na danab nug Kayak dab-ii-maama, ii dim lamidtte ele nug na ele nai mattiya amu; na nuhig hak, amuam Kayak dab-ii-maama hak kobol, na kobol amu dim lamidna, amubia mattimnanu, na ib amuppa oɗmak nuhig nai nob mak aib mettame; amge nug, “Da doyak dabmak ena ele danab,” dabmemanu, na nug Kayak dab-ii-maama hak kobol dim lamitta, nai maditte, na amu dabmena, amuppa oɗmak nuhig nai nob mak, na amu ena mette!

⁶ Na danab laa nug Kayak dab-ii-maama ii dim lamidtte ele, na nug nahip nai laa awa ukka, laa amegppa mattieb dookkunu eppegppa mekkut amu; kobol amuam na nakka baen laplap okkulatna, buɗiatppe gokkulah, o na le nau, danab qe mauhtte ele, na amu lakkut, na amubia hettem.

⁷ Danab nug Kayak dab-ii-maama ii dim lamidtte ele nug danab dilag oiyak ehanittaknu nai tutu maditte dayeb; nai amuam, danab baekuɗ laplap oh mauhak daaeheh, tappa oikkunu ii ehanidttep, amubia nai amu laa ii ehanidtte.

⁸ Danab nug men ketapolppa qagakku dayeb, amuam kaaka; amge laa nug laa Kayak dab-ii-maama ii dim lamidtte ele, nug nug binag mette amu, nug kaaka anambia hette.

⁹ Danab nug wain la, kaaka qe, uud keeke qaun ele aɗa, danab ah laa guittak madatte amu; kobol amubia danab nug Kayak dab-ii-maama ii dim lamidtte ele, nug danab dilag oiyak ehanittaknu nai tutu maditte dayeb amu, nug danab laa guittak madatte.

¹⁰ Danab nug laa Kayak dab-ii-maama ii dim lamidtte ele nug nuhig uɗat hekkunu onigppa e hette, o danab nug mauhnoak aun laa hamu oiyeye antta, nuhig uɗat hekkunu onigppa e hette amu; amuam laa nug lat hamu mauhnoak e, laa guittak medatte, nug amubia hette.

¹¹ Qai nug bahowa, nug eɗua awa latte; amubia, danab nug Kayak dab-ii-maama ii dim lamitte ele, nug Kayak dab-ii-maama hak kobol eɗua baubau hette.

¹² Danab nug Kayak dab-ii-maama ii dim lamidtte amu, amuam nau, amge laa nug nuhignu nug baolia, ena bekkunu dabmak aɗa oikkunu elele; amge danab nug nukka nuhignu, “Da doyak dabmak ena ele aɗe oittem,” anam dabmette amu, amuam kobol naunab, laa nug nuhignu nug baolia, ena bekkunu dabmak aɗa oikkunu am uug ele.

¹³ ⌊Nug ukka, uɗat hemanu⌋ danab bahi iittanab nug, “Laion nau laa dimittim ibppa daatte, da dimittim goppi, iweb mauhkkul,” awa atte. Ao, danab bahi iittanab nug, “Laion naunab laa dimittim ib manppa oitte, ⌊da dimittim goppi, iweb mauhkul,⌋” awa atte.

¹⁴ Od ii qakkak ele ona doawa daatte; amubia danab bahi iittanab nug niiak aben nuhigppa niiaya, eɗeɗiak ge iitta hette.

¹⁵ Danab nug bahi iittanab, nug nuhig ee huɗubppa yaatte; amge nug bahi yaak okkai doya, huma awa, oɗeppa nakok laa iinab inama!

¹⁶ Danab bahi iittanab nug, “Da doyak dabmak ena ele aɗe oittem,” nug anam dootte; amu nuhig dabmakppa nug oɗmaknu nai nob mettenu amu, nuhig nob mak amu danab eblaih aɗit ele, ag laan neekkakppa, dabmak eheɗ laa ii aomanu kobol dim lamidtteb ele amu, nug nuhig dabmakppa nuhig oɗmaknu nob am ahilag oh eɗidtte.

¹⁷ Danab nug qai daug laplap aɗalat-tte, amuam ena iitta; amubia, danab nug ugakka, laa dilag nug mehqak amu ooppa nokku, amuam ele ena iitta.

^18-19 Kaaka danab nug lat doɗo danab qe mauhtte, o lat doɗo eotte ele, nug amu ekku dayeb, amuam naunab; amubia, danab nug mudippan laippu hambuppuittowa, nug, “Da qiɗ nai aakkuib mattimi,” akku dayeb, amuam ele naunab.

²⁰ Aab ewewe, aab iitta me, aab aɗu qauhtte; amubia, laa nug dimug nai ii maditte dayeb amu, nug mehqak iitta mette.

²¹ Aab o hamad aab aɗuppa eokkunu aabppa metteb; amubia, nug mehqak danab nug nug qak digmette.

²² Laa dilag dimug nai mattiaknu amu, danab ag nai amunu eenu miti enanag bia dootteb; ag enanag doon, toppua ukkaeg, oolag unuqagnab noeg, ⌊nauhak bette⌋.

²³ Wa, hinai, nippud, kap keeke, gau laittak ele am anttaknu enanag, amge ooppa aɗi daatte danab ah ii ippunadtte; amubia, danab laa nug ooppa nau daatte ele, nug nai ena madikku, amge nug danab ena iitta.

²⁴ Danab nug laa guittak medakkunu hette amu, nug aɗi nai maditte, amuppa nug am danab ena dooglagnu hekkutai; amge nug ooppa, nug hambuppua, kobol nau hekkunu maittak aotte.

²⁵ Ge, danab amu nug nai enanag madikkutai; amge diig amunu na nuhignu aib ootppa genab doome. Aɗinu? Nug ooppa kobol nau kuɗumnab, Kayak Nug kobol amunu ooppa uuaknab dootte amu, nug amu hekkunu dabmette.

²⁶ Nug heeb, danab ah ootot aqeb, ag nug kobol nau hekkunu maittak aotte amu, ag oolag ii maidkkutai; amge haen adekkuppa, nug nau hette am genab miag atieb, danab ah oh anidkkulag.

²⁷ Danab nug laa guittak medakkunu moɗ pelem buutte amu, nug nukka moɗ amuppa noa qekku; danab nug laa guittak medakkunu men naɗi kudkud metteb, laa toppa nokku dayeb amu, men amu kudkud metta, eɗua nuhigppa nokku.

²⁸ Danab nug laa dilagnu hambuppak nai mattiaya, guittak madatte amu, nug amu dilag nau ninig ele dootte; amu laa nug laanu oo eeɗaknu ittag nai maditte amu, laa amu nug nai amunu ena doya aotte dayeb, nug padal mette.