Prowerb 25 - Nobonob Baibel

Solomonnu danab dilag oiyak ehanittaknu nai tutu laala ele

¹ Danab dilag oiyak ehanittaknu nai tutu laala ele Solomon yom amu, Juda dilag king Hesekaia, nuhig danab ag aon yaappig amu, nai amuam inam.

² Danab ag Kayaknu diig, nuhig hak oh ele dooglagnu elele iitta, amuppa danab ah ag Nug binag amahlak oppiaawak ele dootteb; king ag am danabib, ag keeke lokkumak daatte heeg, miag atitte amu, amuppa danab ah ag nug binag amahlak oppiaawak ele dootteb.

³ Danab auntai laa nug habppa taknu, o wan unuqag noaknu, nug amunu uma ukkak gane melemel mekkunu elele iitta; amubia danab auntai laa nug kingnu dabmak oh anidkkunu elele iitta.

⁴ Na heppe, dubuttid silwappa daatte iitta mekku dayeb; keeke silwappa hak danab nug awa, keeke anttaknu enanag hekkunu elele.

⁵ Na heppe, nau hak danab ag king uuidna, laih daappeg amu; nug genab tutukku hak kobol haaha, nuhig king daakkunu ehah am nug eppegppa ɠagattag daakku.

⁶ Na nakka king noobppa daanna, “Da am danab ena, onil, binal okkai ele,” aib dabmeme. Ao, na danab okkai oolagppa daakkutnu aib heme.

⁷ Aɗinu? King nug nukka na amenppa, “Lai, na gukkuiɗna uɗippe, da ele daagnih,” akku, amuam ena; amge king nug anuqak danab laa noobppa na onin qeeb neeb, na uɗan nekku, amuam ena iitta.

⁸ Na paha paha nai laa aon, hettoɗiakppa aib meme; na anam hekkut dayeb, dimppa nahip mudippan laippu nug heeb, nahip nai am hambuppuak, anam miag atieb amu, na attem hekkut?

⁹ Na, na nahip mudippan laippu ele aa ahilah nai bappaidkkulahnu hettep dayeb; aa madipiɗ ele amu, na nai aib heppe otalom.

¹⁰ Na laanu nai anam heppe otalkku dayeb, laa amu nug nahip mattiak amu doya heeb, na uɗan nekku; amu dimppa laa ag nahip kobol amunu doona, ag hanhan nahipnu ena ii doomna.

¹¹ Nai tutukku hanebppanab mattiak; amuam keeke gol, silwa eleppa hak, anttaknu enanag, amubia.

¹² Danab laa nug doyak dabmak ena ele, nug danab laa, nug dookkunu oo hette ele, nug nug daug batakku dayeb; amuam enanag, daulag bid golppa hak, o bala laa gol enanagppa hak bia.

¹³ Nai awa ukkak danab, laa ag nuhignu genab elele dooglagnu elele, nug uɗat nuhig ena amuppa, nuhig okkai, ag nug meeg gotte amu, nug ag ehanadtte; ehanittak amuam, danab nug deɗ laa gakkaɗak haen nauppa, nug le oug lawowa, ehanittak aotte, am amubia daatte.

¹⁴ Danab ag laa keeke mattaknu atteb, amge ag ii madatteb; ag am lombig aam haenppa gu wan le ii medatte, amubia hetteb.

¹⁵ Danab nug oo maɗoɗ ele dayak kobol dim lamidkku dayeb amu, nuhig okkai nug dabmak eɗukku bia; amu nai bodoettakppa mattiak amu, amuam heeb, dabmak ɠagattag eppom daatte baolikkunu elele.

¹⁶ Na uppuh leppu anidkkut dayeb, na aib huana lame; na huana lakkut dayeb amu, na bahakkut.

¹⁷ Na mudippan laippu laugppa aib ge iitta gome; na anam haen oh gokkut dayeb, nug nahipnu nau ninig ele dookku.

¹⁸ Na mudippan laippu, na nuhignu hambuppuak nai hettoɗiakppa madittem dayeb amu; buppuak amuam daɗib laa, o qep elab laa, o lat doɗo hawaɗ ele laa guittak mettalo, amubia guittak medatte.

¹⁹ Uug haenppa, danab nug nuhig nai dim ii lamidtte, na nuhignu ehanittak aokkutnu dabmekkut dayeb amu, amuam meu ena iitta; amuam danab nug aeg oɗaɗittak dayeye, amuppa ee damqekkunu hette, o danab nug baeg nau autaut oitte ele, amuppa tappa gokkunu hette amu, na amubia daakkut.

²⁰ Danab nug laa oo doyak okkai dootte amegppa oo gamag ahaknu ahi edakku dayeb, nug layag ii ehanidtte; amuam deɗ oug eleppa danab laa nug layagnu ulahnu lamen aɗitta aotte, o keeke nau laa nug ii helo, amge nug hette, am amubia daatte.

²¹ Nahip kekeɗ enug qeeb, na ee mette! Ao, nug le baag diieb, na nug le mette!

²² Na anam hekkut dayeb, nug oo eɗukkunu ehanidkkut; amu Yawe Nug na nob ena medakku.

²³ Gu haenppa gu genab nettebia; laa nug layagnu nai nau maditte amu, layag nug genab oo nauhtte.

²⁴ Danab nug lag laih laa, enanag iitta, aguppaib daatte dayeb, amuam nau iitta; amge danab nug lag meu ohppa wau ge iitta nai hak hette ele daattep dayeb, amuam nau.

²⁵ Baegppan laa, nug aab umanabppa daatte, nug ena daattenu nai uɗitte amu; amuam danab nug le baag diie, le oug latte, amubia daatte.

²⁶ Genab tutukku hak danab nug nuhig dabmak eɗue, nau hak danab dilag hak hette; amuam le qeppuɗia bakppan le laa heeg, muag ele daatte, o le moɗ dubuttid ele daatte, amubia daatte.

²⁷ Uppuh leppu huana lanaknu am ena iitta; amubia danab nug nukka laa ag nug binag mekkulagnu eeɗadkku am ena iitta.

²⁸ Danab nug nukka nug nuhig oiyak pehettak atognoak ii hette amu; amuam aab okkai laa aɗ loppaɗa, na qak daatte, amubia.