Prowerb 24 - Nobonob Baibel

¹ Na nau hak danab dilagnu aib amen qe, oot elele ii dayom. Ao, na ag ele daaglagnu aib heme.

² Aɗinu? Ag laa guittak nau mauhnoak mattaglagnu maittak aotteb. Ao, mattiakppa ag laa uug mattaglagnu atteb.

³ Danab nug heeb, nug, nug baegppan ele ena daaglagnu amu, nug doyak dabmak ena ele daakkuoitte. Ao, danab nug, nug baegppan ele ag ɠagattag daaglagnu, nug diignu doyak tutukku ele daakkuoitte.

⁴ Danab nug laugppa en laa, danab kuɗum ii aɗatteb, en anttaknu enanag ele, nug en amu lakka mekkunu amu, nug doyak ena aɗa oikkuoitte.

⁵ Danab doyak dabmak ena ele, nug danab ɠagattag eɗidtte. Ao, laa doyak ena ele, nug danab ebehi ele eɗidtte.

⁶ Anam amunu, ban haenppa, ban daup ikki nug ulum nai danab doyak dabmak ena elenu ii awom dayeb, nug banppa aib ukkom. Ao, ban haenppa nug ulum nai ena kuɗum amu aokku dayeb, nug nuhig kekeɗ eɗadkku.

⁷ Danab nug Kayak dab-ii-maama ii dim lamidtte, nug am doyak dabmak ena elenu diig tutukku ii dootte; nug ikki danab dilag qagmak aben aab nuhig odppa daatte, nug appa nai laa madikkunu elele iitta.

⁸ Danab nug eheɗ hekkunu maittak aotte amu; laa ag nuhignu, nug keeke laa hekkunu lokkumakppa dabmaama maittak eheɗ awak danab daatte dooglag.

⁹ Danab ag Kayak dab-ii-maama hak hekkulagnu dabmetteb amu, ag hipunin hetteb; amu danab ag awa awa qettak danabnu oolagppa uuaknab dootteb.

¹⁰ Uug bette haenppa, na uug amu eɗidkkutnu tuɗidna ii hettem dayeb amu; nahip ɠagattag am okkai iitta laa ippunadtte.

¹¹ Laa ag laa eppelagppa ⌊diig iittappa⌋ mauhkkulagnu oitteb amu, na ag ehanadppe, ag aib mauhppig! Ao, laa ag laa eppelagppa ⌊diig iittappa⌋ mauhkkulagnu daatteb amu, na ag ehanadppe, ag aib padal meppig.

¹² Na ⌊hambuppuna⌋, “Ig amunu aɗitai laa ii doomut,” akkut dayeb; Kayak, Nug danab oh dilag dabmak anidtte, Nug nahip nai amu, am nai tutukku iitta iite dootte? Kayak, Nug na ehanitte, na bau daattem, Nug nahip hak iite dootte? Ao, Nug geha danab anen anen ag aɗi heppig, Nug amunu nob iite madakku?

¹³ O bekkal, uppuh leppu am ena amunu, na la! Ge, uppuh leppu teɗuppanu am lanak ubuhi ele.

¹⁴ Uppuh leppu ubuhi ele daatte, lanaknu am ena, amubia na doyak dabmak ena ele aokkut am ena. Na doyak dabmak ena ele aokkut dayeb amu, na butti aɗi ena daakkutnu dabmak aɗan oin daappe, laa nug heeb, ena daakkutnu dabmak aɗan oiyak amu, amuam ii iitta mema.

¹⁵ Na nau hak danab nug laa eheɗ hedakkunu meitta daatte bia, na aib genab tutukku hak danab, nug baekkudppa ele eheɗ hadakkutnu maadna daame; na nuhig keeke yab aokkutnu nug laug aib loppaɗme.

¹⁶ Aɗinu? Genab tutukku hak danab nug haen eblaih aɗit ele na qekkutai, amge nug eɗua ahakku; genab tutukku hak danab nug anam hette, amge nau hak danab ag uug naunab he, nauhtteb.

¹⁷ Haen nahip kekeɗ nug na qeeb, na oot gamag aib ahom. Ao, haen nug taataɗ qetteb, na nakka nahip oiyak atognonana, oot aib gamag ahom.

¹⁸ Na gaman aheb amu, Yawe Nug antta, nug ena ii dooma; Nug ena ii doya eɗua heeb, kekeɗ bu mettak ii aweb, ⌊na aokkut⌋.

¹⁹ Eheɗ hak danab ag ena daaglagtai; amge ag anam daatteb dayeb, na “Attemnab ag anam daatteb?” na dabmak amu tuqa ii awa oiyak aib heme! Ge, nau hak danab, ag ena daaglagtai; amge ag anam daatteb dayeb, na amu dilagnu aib amen qeeb oot elele ii dayom.

²⁰ Aɗinu? Eheɗ hak danab ag butti aɗi ena bekkulagnu dabmak aɗan oiglagnu ib laa iitta. Ao, nau hak danab ag danab nug lam he qauhtte, ag anambia qauhak daaglag.

²¹ O bekkal, na Yawenu, kingnu ele ebehin oh bodoetta le maɗ! Na nai tappe nak danab ele laippu aib tamanin daame.

²² Aɗinu? Yawe, king ele aa hepeɗ, nauhak pahanab nai tappe nak danab dilagppa uɗikku; amu auntai laa nug Yawe, king ele, aa danab ah amu bu gane mattaglahnu dootte.

Doyak dabmak ena elenu nai laala

²³ Nai imu ele am danab ag doyak dabmak ena ele, ahilag nai laa. Hettoɗiakppa, laanu diig iittappa ena doya, laanu diig iittappa eheɗ doyak kobol dim lamittaknu amuam ena iitta.

²⁴ Epeɗiak danab nug laa eheɗ heumnu, “Nug eheɗ laa ii heum,” atte amu; wan atu ohppan danab ag epeɗiak danab amunu, nug eheɗ laa awaknu anak waappa daakkunu akkulag. Ao, danab amunu wanppan wan ohppan danab ag, “Nug eheɗ nau heum,” akkulag.

²⁵ Amge epeɗiak danab nug laa eheɗ heumnu, “Nug eheɗ heum,” atte amu, nuhignu am ena. Ao, nug itittak ena aokku.

²⁶ Nai nob mak genab, amuam layam genabnab dayaknu at aakku.

²⁷ Na lag hak ii digmak daanna, tatam na nahip dad hena, ee eppe!

²⁸ Mudippan laippu layap nug keeke eheɗ laa ii heum dayeb, hettoɗiakppa, “Nug eheɗ heum,” aib ame; na aibnab hambuppume.

²⁹ Na laanu, “Nug dahilppa heum bia da nuhigppa hekkul,” aib ame. Ao, na, “Nug dahilppa aɗi heum amu, da nob mekkul,” na anam aib ame.

³⁰ Da danab bahi iittanab ele, da nuhig dad eɗitten gomi. Ge, da danab nug epeɗia ha dabmak ena awak kobol ii dootte ele, da nuhig grep dad qe-eɗitten gomi.

³¹ Da dad amu eɗitten ugekke, uud keeke qaun ele aben ohppa bak daaegeg anidmi; wan amu ohppa uɗ bak dayom; amu men aɗ am loppaɗa, na qak dayeye anidmi.

³² Da antten amu, da aɗi anidminu dabmak ena laa aokkulnu dabmein; aakku da ippunittak ena laa anidmi.

³³ Amuam laa nug inam atte. “Da nakok laa ele niikkul hettem”, o, “Da abenppa ukken qein nakokib niikkul. Niie gad ii mepa”, o, “Da tuqan niimi, amge amun imu ele nakokib niikkul.” Nug anam atte

³⁴ amunu, pahanab, yab danab nug laan keeke awe, laa nug keeke iitta daatte bia, na anam aakku pahanab daɗek daakkut. Ao, pahanab yab danab, nug lat keeke ele, nug danab laanu keeke awe, laa nug keeke iitta daatte, anambia na pahanab daɗek daakkut.