Prowerb 22 - Nobonob Baibel

¹ Danab nug en kuɗum aotte am nau iitta me, aun laa ag nuhignu, “Nug am danab onig ena ele,” atteb, nuhignu am enanag. Ao, danab nug silwa, o gol aotte am nau iitta me, danab aun laa ag nuhignu, “Nug am danab binag ena ele,” atteb, nuhignu am enanag.

² Enub danab, daɗek danab ele, ag oh keeke laippuppa, ag laippu daatteb; amuam Yawe Nug ag oh hattom.

³ Eheɗ bemanu dabmak awa dabmak amu dim lamittak danab nug uug bette antta, nug dekkaɗa, aben uug ii bekku ele, nug appa gotte; amge danab ag doyak ii awak ele, ag hettebib tuɗidna gonana, guittak aotteb.

⁴ Danab nug nukka onig qe nette, nug Yawenu ebehi oh bodoetta le mak ele dootte amu; nug en, binag, bau dayak ele aokkunu ib aakku matultte.

⁵ Ib laa, nau hak danab nug dim lamitta oitte amu, ib amuam ib uud keeke qaun ele, o ib laa pelem mak ele, am ib amubia daatte; amge laa nug nukka, nug nuhig oiyaknu dabmetta atognotte amu, nug nau hak danab dilag awaitta, uma daatte.

⁶ Na nid nakok nug attem ena daakkunu ippunitte! Amunu diig am, nug kaino maama, nug amu ii uuma.

⁷ Enub danab ag heeg, daɗek danab ag ahilag nai dim lamitteb; danab nug laa eppegppan lon aotte, nug danab amunu maɗi nid daatte.

⁸ Laa nug nau hette amu, nug uug anidkku; nug oppoɗi beebe, laa guittak madakkunu hette amu, Yawe Nug heeb, nug amu hekkunu elele iitta daakku.

⁹ Laa nug laa keeke mettaknu oo qak iitta danab, nug itittak ena aokku; amunu diig am, nug daɗek ee madatte.

¹⁰ Laa heeb, awa awa qettak danab qema, nug appa ii dayeb; nug mehqak, nai a ona a doak, onig he nauhak ele ii daama.

¹¹ Aun nug ooppa oppiak ele daakkunu ooppa anuqak dootte, nai mattiakppa nug oo bodoette enanag maɗoɗ ele hak kobol dim lamidtte amu; nug king layag daakku.

¹² Yawe Nug doyak ena atognotte; amge Nug laa nug Yawe ippunittom bia Nug dim lamidkkunu uua hette amu, Nug danab amunu nai he nauhtte.

¹³ ⌊Nug ukka, uɗat hemanu⌋ danab bahi iittanab nug atte. “Laion laa dimittim daatte, ⌊da dimittim goppi, iweb mauhkkul⌋”; o amu iitta dayeb, nug atte. “⌊Da dimittim goppi,⌋ laa iweb mauhkkul,” awa atte.

¹⁴ Ah gamu uuitta danab laa ele oittep amu, nuhig nai am moɗ laa umanab noa ukkak bia; aun nug heeb, Yawe oppoɗi beeb, nug amuppa nokku.

¹⁵ Nid naunau ag Kayak dab-ii-maama hak hetteb; amge na ag toliadna, bu madakkut dayeb, kobol amuam uma ukka daakku.

¹⁶ Laa nug en okkai aokkunu daɗek danab duttunatte, ag nuhig uɗat o hamu bia hetteb, o laa nug enub danab ag nuhignu oolag hekkunu keeke ahilag daakkunu madatte amu; aɗit amu oh aa goya, daɗek daaglah.

Danab doyak dabmak ena ele laa dilag nai

¹⁷ Na daut human, danab doyak dabmak ena ele dilag nai doye! Ao, da aɗi ippunidttem imu amu, na dabmettan autna awe!

¹⁸ Aɗinu? Keeke imu dabmak nahip-ppa daakku am ena. Ge, na hanhan imunu madikkutnu nahip dabmakppa babaittak daakku, am ena.

¹⁹ Da keeke imu gemu na, ge na ippunidttemnu diig am; na Yawenuib ootppa genab dookkutnu hettem.

²⁰ Da nai 30 nahipnu iite yaami? Nai amuam doyak enanu nai, ulum nai ele.

²¹ Aun laa oɗ meeb, na nob genab medakkutnu amu; da doyak diig genabib, nai ena ele iikku ippunidttem.

²² Na daɗek danab anadna, ag daɗek daatteb, diig amunu na aib eheɗ hattame; hettoɗiakppa ele, na daɗek ag ehanittak iitta ele, appa na ahilagppa eheɗ aib heme.

²³ Aɗinu? Yawe Nug daɗek ehanadkku; Nug danab ag daɗek eheɗ hadatteb ele, Nug ag eheɗ hadakku.

²⁴ Aib danab oppoɗilag paha paha bette ele layam batappig. Ao, na aib laa nug pahanab oo nauhtte, na nug ele daapiɗ.

²⁵ Na anam hekkut dayeb, na nuhig kobol aona, na pelemppa tekkut.

²⁶ Na laa lon aokkunu heebeb, nug ehanidkkutnu genab haknu mattiak aib heme. Ge, na nahip keeke lonnu onig awak daakkunu mekkutnu aib ame.

²⁷ Aɗinu? Layap nug nuhig lon eɗua daden mekkunu elele iitta daakku dayeb, na ele amu haknu men doɗo elele iitta daakkut dayeb, na niiak aben nahip-ppa niibppe, ag uɗin lamidppeg, niiak aben attannu ahappe, ag niiak balal amu aon gokkulag.

²⁸ Wannu tom epponak men, ig mamenkad aɗi anukka meppig amu; na aib men amu mautppe, laih waum.

²⁹ Danab nug nuhig uɗat hak doya autanab awom daatte, nug king toppa dayaya uɗat hekku; nug danab hamunu uɗat ii hema.