Prowerb 21 - Nobonob Baibel

¹ King nug Yawe eppegppa daatte, amuam lenag bia. Ao, Nug le ippu adeppa gokkunu he, le gotte bia, Nug kingnu dabmak attem bekkunu he bette.

² Keeke oh danab nug hette amu, nuhig dabmakppa am tutukkuib; amge Yawe Nug danab nug aɗi diignu nug keeke hette amu, nug amu atognoa neekkitta auta aotte.

³ Danab nug Yawenu mana mettak hekku dayeb amu, amuam ena; amge danab nug kobol tutukku, amu nai doya mala hettoɗia epeɗia elele mettak kobol ele hette amu, amuam Yawenu neekkakppa enanag.

⁴ Dada ha laa eɗittaknu dabmak awak, dada hak kobol ele; nau hak danab ag amu henana, ag aakku hipunin hetteb.

⁵ Danab nug yagbak doya uɗat haaha, maittak tutukku awowa, nug keekenu elelenab daakku; amge danab nug maittak tutukku ii awowa, keeke paha paha hette amu, nug daɗek daakku.

⁶ En okkainab, danab nug hambuppuakppa awom ele, en amuam paha iitta ma, guittak ele en mameg medatte; en amu, doɗ pelemppa ta guittak aotte, amubia en mameg guittak medatte.

⁷ Nau hak danab ag laa guittak nau mauhnoak madatte amunu, ag nob nau aoglagoitte; amunu diig am, ag kobol tutukku haknu uutteb.

⁸ Danab ag beɗulagppa aab ele, ag kobol hambuppuak dim lamidna oitteb; amge danab ag eheɗ laa ii heppig ele, ag genab tutukku hak kobol dim lamidna oitteb.

⁹ Danab nug lag laih laa, enanag iitta, aguppaib daatte dayeb, amuam nau iitta; amge danab nug lag meu ohppa wau ge iitta nai hak hette ele daattep dayeb, amuam nau.

¹⁰ Nau hak danab nug eheɗ hekkunu oo huana daatte; nug mudippan laippu laanu iinab oo gai-iitta doya oo metta ehanidtte.

¹¹ Haen awa awa qettak danab nug bu aotte amu, danab nug doyak ii awak ele, ag doyak dabmak ena ele aotteb; haen danab doyak dabmak ena ele ippunittak aotte amu, nug amuppa doyak ena aotte.

¹² Kayak, Nug am genab tutukku haknu diig, Nug aɗi keeke nau hak danab laulagppa bette amu, Nug dootte; amu Nug nau hak danab he nauhtteb.

¹³ Daɗek danab ag laa ehanadkkunu oɗ medappeg, nug ahilag nai ii dookku dayeb amu; haen nug ehanittak aokkunu oɗmak heeb, auntai laa nuhig unuqittak ele ii dooma.

¹⁴ Laa oo nauhak dootte dayeb, keeke nuhig daakkunu lokkumakppa nug mettak amu, amuam he, oo nauhak bodoedatte. Ao, laa oppoɗi bak dootte dayeb, keeke nuhig daakkunu lamen waappa ma, awa ukka, nug mettak amu, amuam he, oppoɗi bak okkai aakku oug mette.

¹⁵ Haen ikki danab ag nai doya mala hettoɗia epeɗia elele mettak kobol dim lamidtteb amu, genab tutukku hak danab ag gamalag ahatte; amge laa ag eheɗ hetteb ele, ag baɗak eheɗ nau dootteb.

¹⁶ Danab nug diignu doyak tutukku ii dim lamidtte; nug danab ag mauhppig, nug amu dilagnu ele daaglagnu hette.

¹⁷ Aun laa nug oo hak nuhignu anuqak dootte, nug daɗek daakku. Ao, aun nug wain, ee ittag elenu oo huana hette, nug enub ele ii daama.

¹⁸ Nau hak danab ag genab tutukku hak danab guittak mattaglagnu hetteb amu, guittak amu eɗua awa, ahilagppa bekku. Ge, danab ag Kayak ippunattom bia Nug dim lamidkkulagnu uun hetteb, ahilagppa anam bekku.

¹⁹ Atu taɗakppa dayaknu amu nau iitta; amge ah nug nai a ona, a doak ah, nug paha paha oo nauhtte, nug ele dayaknu amu, amuam nau.

²⁰ Danab doyak dabmak ena ele, ag ee ena keeke ag laulagppa meeg daatte; amge danab nug Kayak dab-ii-maama ii dim lamidtte ele, nug ee keeke nug aotte ele, nug paha he iitta mette.

²¹ Aun laa nug genab tutukku hak kobol, oo mauhaknab kobol ele dim lamidtte; nug bau dayak, keekenu elelenab dayak, aria binag okkai ele aɗalatta oitte.

²² Danab doyak dabmak ena ele nug aab okkai laa, ban hak danab ɠagattag aguppa daatteb amu, nug appa banelag gotte; nug ukka, ban haknu aben ɠagattag ahilag, ag amuppa ena daaglagnu oolagppa genab dootteb, nug amu loppaɗtte.

²³ Danab nug aɗi nai madittenu dabmetta auta aotte; nug uug naunab nuhigppa bemanu aakku hette.

²⁴ Danab nug dada danab, beɗuppa tak danab ele amu, nug onig am Awa Awa Qettak Danab; beɗuppa tak kobol nuhig am bodok iitta.

²⁵ Danab bahi iittanab nug niikkunu oo huana hette amunu, nug padal mekku; amunu diig am, nug uɗat hekkunu uua hette.

²⁶ Danab bahi iittanab nug hanhan keeke baubaunu oo huana hette; amge genab tutukku hak danab ag oo qak iittappa laa keeke madatteb.

²⁷ Nau hak danab ag doɗ manan, Kayak mettaglagnu heegeg anatta, Nug ooppa uuaknab dootte. Nug amunu uuaknab dootte amunu, genabnab genab ag ɗo hamuib dim lamidna, eheɗ hekkulagnu dabmena, mana mettak hekkulag amu, Nug amunu ooppa uuaknab okkai dootte.

²⁸ Danab nug hettoɗiakppa nai hambuppuak maditte, nug mauhkku; amge danab nug nai diig genabnab maditte, nug nai tuɗitta mattieb ukkeb, gogppa tekku.

²⁹ Nau hak danab ag oɗe dim lamidmananu, ag ahilag dabmak am ɠagattag eppak daatte; amge genab tutukku hak danab ag aɗi hetteb amu, ag dabmettan autna aotteb.

³⁰ Doyak dabmak ena ele laa, o diignu doyak tutukku laa, o maittak awak laa; amu oh oolagppanu Yawe eɗidkkunu elele iitta.

³¹ Danab ag hosppa daanna ban hetteb ele, ag hos banppa gokkulagnu bappaladtteb; amge ban eɗittaknu, amuam Yawe, nuhigppaib daatte.