Prowerb 20 - Nobonob Baibel

¹ Wain huan lanak amu he, danab kaaka kobol heeg, danab laa ag eheɗ aon aon aqadtteb. Bia nug he, danab ag nug qetteb; aun aɗi ag le laeg, kaaka aqatte, eheɗ oitteb, ag danab doyak dabmak ena ele iitta.

² Kingnu oppoɗi bak amu laion baunu gayak bia; aun nug kingnu oo nauhak heeb bekku amu, nug mauhkku.

³ Danab nug laikkud ele nug mehqak ii hemanu hette ele, laa ag nuhignu ena doon, binag metteb; amge danab ag Kayak dab-ii-menan ii dim lamidtteb, ag am nai a ona, a doak paha hetteb.

⁴ Danab bahi iittanab ele nug haenppanab dad uɗat ii hette; amunu ee meu awak haenppa, nug ee meu laa ii anidtte.

⁵ Maittak danab oolag unuqagnab daatte, amuam keeke le unuqagnab daatte bia; amge danab nug diignu doyak tutukku ele, nug he, maittak amu miag atitte.

⁶ Danab kuɗumnab ag lailkad dilagnu, “Da ahilagnu oo mauhaknab doottem,” aon atteb; amge auntai laa nug oo metta ii uuak kobol genab dim lamidtte?

⁷ Genab tutukku hak danab nug oiyaya, nug Kayaknu neekkakppa danab ooppa kaliak laa iitta ele daatte; nug ena anam heehe, nug bekkod aɗekkud ele nug dim lamidtteb amu, ag itittak ena aotteb.

⁸ King nug epeɗiak hekkunu sia king nuhigppa daatte haenppa; nug neekka auta awe ukke, aɗi am eheɗ, aɗi am ena anidtte.

⁹ Aun nug, “Da hei, da ool oppiak ele daatte,” akkunu elele? Ge, aun nug, “Da dubuttid iitta, hipunin ele iitta,” akkunu elele?

¹⁰ Uug doyaknu keeke skelppa uɗat mattak pehettak iitta, aria elab doyaknu melemel pehettak iitta; keeke aɗit amu ohnu Yawe Nug ooppa uuaknab dootte.

¹¹ Nid nakok amu, nug diig attemu, nug aɗi hette amuppa nug epponak he anidttem; nug kobol oppiak ele, kobol genab tutukku ele dim lamidttetai, na nug aɗi hettep-ppa diig anidkkut.

¹² Ig nai doyaknu daunig ele, amu keeke anattaknu amenig ele; amge Yawe Nug aɗit amu oh haatom.

¹³ Na daɗek daamnanu, na niiaknu aib oot mauhom; amge na amen obatak ele daan, uɗat hekkut dayeb amu, na ee lanaknu kuɗum ele daakkut.

¹⁴ Laa keeke daden mette ele amu, nug keeke laa aokkunu haaha, nug amunu keeke mameg amegppa, “Imuam nau, ena iitta,” a, keeke mameg nug nob honap me aotte; amge laa daden mette ele nug anam ha, daden mewowa aha ugakka, nukka onig humaama, laa amelagppa, “Da keeke ena imu men doɗo honap-ppa daden memi,” awa atte.

¹⁵ Gol daatte, amu men laa onig rubi, daden nob okkainab ele, ag ele huanak daatteb; amge nai mattiak doyak ena ele, amuam nakoknab aakkuib daatte.

¹⁶ Danab laa na nug ii doottem ele, nug nahip-ppanu lon aokkunu heebeb, danab laa na doottem, nug lon amunu keeke lonnu onig awak daatte mekkunu ab amu, nug danab na ii doottemnu hette amunu, na nuhig en laa aon aɗappe, lon mameg lon eɗua daden meeb, eɗun mette! Ao, laa nug ib baag ahnu amu hekkunu heebeb, na nuhig keeke lonnu onig awak daakkunu awe!

¹⁷ Danab nug hambuppuak kobolppa en awa, ee ena lanana, enanag dookkutai; amge gog takppa amu, danab nug ihi latte, amubia nug eheɗ nau awa dookku.

¹⁸ Na ulum nai awona, na aɗi hekkutnu maittak awe! Ao, na banppa gokkut dayeb amu, na ulum nai awona ukke!

¹⁹ Laa dimug nai maditte amu, nug nai ii mattimanu daatte ele aakku maditte; amunu danab aun nug nai ge iitta maditte ele, nuhignu awaidna daye!

²⁰ Danab nug anig, o mameg ele nug eheɗ laa awaknu anak waappa daakkunu akku dayeb amu; nuhig bau dayak am laa lam gatatuppa qauhom bia iitta mekku.

²¹ Laa nug nid bau dayaya, kalu mettak iitta haenppa mameg eppegppa aug aokku dayeb amu; gog takppa aug amu nug ii ehanidma.

²² Laa nug na eheɗ heidkku dayeb amu, na nug amegppa, “Da nob medakkul!” aib ame; na Yawe Nug na ehanitteb, na uug amuppa ii daamnanu ameg me!

²³ Uug doyaknu keeke skelppa uɗat mattak pehettak iitta amu, Yawe Nug amunu ooppa uuaknab dootte. Yo, danab nug skelnu keeke uug pehettak he ii bette, nug amuppa uɗat hette amu, Yawe Nug amunu oo ena ii daatte.

²⁴ Yawe Nug danab ɠagattag dilag oiyak atognotte; amunu laa nug nukka, nug attem ha, nuhig oiyak atognokku?

²⁵ Danab nug dabmak pehettak ii awawa, keeke Kayaknu daakkunu tituana medatte; amu dimppa nug genabnab hekkunu nai anan qakkak nug mattiom ele, nug nai amunu dabmak pehettak aokku amu, amuam nug pelemppa tette bia hette.

²⁶ King doyak dabmak ena ele nug aun aɗi ag nau hak danab daatteb hettoɗia anadtte; nug anatta mala, nug bu aakku madatte.

²⁷ Yawe Nug danab oo unuqag anidtte. Ge, Nug nuhig dabmak oh atognoak anidtte.

²⁸ King nug oo mauhaknab kobol, oo metta ii uuak kobol ele dim lamidtte dayeb, kobol aɗit amu heeh, nug abenabppa enaib daatte; oo mauhaknab kobolppa nuhig king dayak ii uɗaltte.

²⁹ Nid bau ag ahilag ɠagattagppa binalag aotteb; danab kaino ag ikkilag umimi bakppa amu aotteb.

³⁰ Ihi qaɗaietta heehe, keeke nau noa gotte; amubia danab nug eheɗ ha, nug amunu guittak awe, baula hemanu dabmak nug oo unuqagppanu noa gotte.