Prowerb 2 - Nobonob Baibel

Doyak dabmak ena elenu nob ena

¹ O da bekkal, na dahil nai aon autna aokkut dayeb, na dahil haknunab nai aon, ootppanab mekkut dayeb,

² na doyak dabmak ena elenu dabmena autna aokkut dayeb, na diignu doyak tutukku aokkutnu wagai mekkut dayeb,

³ na dabmak meu unuqagnu, na amunu gaakkut dayeb, na diignu doyak tutukku aokkutnu huana gaakkut dayeb,

⁴ na silwa mattin anidkkutnu wagai mettem bia, na amu oh aokkutnu hekkut dayeb, ao, na en okkai lokkumak daatte mattin anidkkutnu wagai mettem bia, na amu oh aokkutnu hekkut dayeb,

⁵ na geha ib amuppa Yawenu ebehi oh bodoetta le mekkunu kobolnu diignu doyak tutukku aokkut. Ao, na ib amuppa Kayaknu doyak mattin anidkkut.

⁶ Aɗinu? Yawe Nug doyak dabmak ena ele megatte. Ao, Nug oɗeppa ig doyak, amu diignu doyak tutukku ele aottem.

⁷ Amu Yawe Nug danab ah ag genab tutukku hak danab daatteb ele ehanatte, ahilkad kekeɗ eɗadtteb. Ao, Nug aun aɗi ag nuhig neekkakppa danab ooppa kaliak laa iitta ele oitteb ehanatta, ahilag guppiɗ daatte.

⁸ Nug danab ah ag nai doya mala hettoɗia epeɗia elele mettak kobol dim lamidna oitteb ele, Nug ag ehanatta, ena daaglagnu dabmadatte. Ao, nug danab ah ag nuhignu oo metta ii uuak kobol dim lamidtteb ele, Nug ag ena daaglagnu dabmadatte.

⁹ Yawe amu hette amunu, ⌊na nuhigppa doyak dabmak ena aokkut dayeb,⌋ na geha kobol tutukku, nai doya mala hettoɗia epeɗia elele mettak kobol ele dookkut. Na geha aɗi ib am ena, na amu dookkut.

¹⁰ Aɗinu? Doyak dabmak ena ele na ootppa daakku. Ge, doyak am nahip-ppa ambak dayebeb, na maɗoɗppan gamag ahak okkai dookkut.

¹¹ Amu laanu neekkakppa nug dabmak eheɗ ii aomanu kobol am heeb, danab guppiɗ dimugppa daya, ena daatte bia, na ena daakkut. Ao, diignu doyak tutukku am na eheɗ aomnanu nahip guppiɗ bia daakku.

¹² Doyak dabmak ena ele ehanitteb, na nau hak danab eppelagppa ii daamna. Ao, na danab ag eheɗ haknu ag tiilagppa daatte amu, na danab amu eppelagppa ii daamna.

¹³ Danab amu ag ib ena tutukku, ag amuppa oiyaknu uutteb; ag ib gatatu eleppa oitteb.

¹⁴ Danab amu ag eheɗ hekkulagnu enanagnab dootteb. Ao, ag eheɗ haknu tiigppa dayak kobol dim lamidna, eheɗ haknu gamag ahak dootteb.

¹⁵ Ib ag oittebppa am kaliak, am tutukku iitta. Ao, ahilag hak unuqagppa amu, appa kaliak daatte, am tutukku iitta.

¹⁶ Doyak dabmak ena ele am ehanitteb, na ah ewau pakkua gappai hette amu, na nug ele kobol nau amu ii hemaya. Ao, doyak dabmak ena ele am ehanitteb, na danab laa wau nug hambuppua, na ele niiglahnu nai ittag, ubuhi ele amenppa madikku amu, na nuhig nai dim lamidna, kobol eheɗ amu ii hemana.

¹⁷ Am ah amu nug nid ahin dayaya, laa nug gamu daakkunu awom amu uuom. Ao, nug Kayak noobppa nug gamu wau daakkunu nug tituana nai qakkak heum amu, nug nai amu dimug ma, hamu bia doya, anam oitte.

¹⁸ Nug laug am mauhak ib oɗeppanab daatte! Ao, ah amu ippu am, laa mauhppig ele, ag daattebppa gotte amunu,

¹⁹ aun laa nug ah amu ele niittep, nug tatam ena oiyom, nug amubia baula ii oima; nug eɗua, bau enanag daakkunu ib laa iitta.

²⁰ Anam amunu, na doyak dabmak ena ele aɗan oina, na danab ena dilag ippulagppa oiye! Ao, genab tutukku hak danab ibppa oitteb, na ib amuppaib oina daye!

²¹ Aɗinu? Genab tutukku hak danab ag ahilag wanppa daaglag. Ge, Kayaknu neekkakppa danab oolagppa kaliak laa iitta ele, ag wan amuppa daaglag.

²² Anam, amge nau hak danab dilagnu amu, Kayak Nug heeb, ag Israel oolagppanu geɗittak daaglag. Ao, laa ag Yawe ippuanattom bia Nug dim lamidkkulagnu uun hetteb ele amu, Kayak Nug heeb, ag Israel oolagppa iinab daamna.