Prowerb 19 - Nobonob Baibel

¹ Danab nug Kayaknu neekkakppa danab ooppa kaliak laa iitta ele daatte, me nug daɗek daatte dayeb, nug Kayaknu neekkakppa am danab ena amunu, nuhignu am nau iitta; amge danab nug Kayak dab-ii-maama ii dim lamidtte, nug nai eheɗ, tutukku iitta maditte dayeb, nug Kayaknu neekkakppa nau hette amunu, nuhignu am nau.

² Doyak ena iitta eleppa keeke laa haknu yag-nab-bak doyak am ena iitta; o iitta, dab-ii-menana, keeke paha henana, ib apiɗittak, amu ele ena iitta.

³ Danab nug Kayak dab-ii-maama hak kobol dim lamidtte, amuppa nug he, nuhig bau dayak nauhtte; amge nug, “Yawe Nug eheɗ he, da dahil dayak nau iguppa daattem,” awa atte.

⁴ Danab nug keeke kuɗum ele daatte amu, nug laikkud kuɗum ele; amge daɗek danab nug laikkud ag nug uuidna gotteb.

⁵ Hettoɗiakppa laa aɗi heehe anttomnu mattiak danab daatte, nug hambubukku dayeb amu, nug bu aokku. Ao, danab nug hettoɗiakppa nai genab iitta madikku dayeb amu, nug guittak iitta ele gokkunu elele iitta.

⁶ Danab kuɗum ag danab okkai nug ahilagnu ena dookkunu, ag kobol digdig hetteb. Ao, danab oh ag laa nug keeke kuɗum awa, laa ahilag daakkunu hamu madattenu, “Da am nug layag daattem,” atteb.

⁷ Daɗek danab tiig laippu, ag nug guhuɗidtteb dayeb, laa ag nug laikkud, amge tiig laippu iitta, ag guhuɗidna autna aotteb. Ge, diig amunu daɗek danab nug ag ele laippu daaglagnu, oo doyakppa ag oɗ madakku, amge iitta, ag nuhig nai dooglagnu ii hemana.

⁸ Aun nug doyak dabmak ena ele aotte, nug nukka nug ehanidtte. Ao, laa nug diignu doyak tutukkunu oo huana hette, nug ena daatte.

⁹ Danab nug hettoɗiakppa laa aɗi heehe anttomnu mattiak danab daatte, nug nai hambuppuak akku dayeb am, nug bu aokku. Ao, danab nug hettoɗiakppa nai genab ii akku dayeb amu, nug mauhkku.

¹⁰ Danab nug Kayak dab-ii-maama ii dim lamidtte ele nug enub huana ele daakku dayeb amu, ⌊nug nau bekku amunu,⌋ amuam ena iitta; anam amunu begbeg maɗi nid nug anuqak danab eɗatta, ahilag okkai daakku dayeb amu, ⌊nug uɗat amu ii doya, naunab hekku amunu,⌋ amuam ena iittanab.

¹¹ Danab nug doyak dabmak ena ele daatte amu, doyak dabmak ena amuppa nug oo maɗoɗ ele dayak danab daatte; haen danab laa nuhigppa eheɗ he, nug eheɗ hak amu uhuqa medatte, kobol amunu danab ah ag nug binag metteb.

¹² Kingnu oppoɗi be ameg kokoɗ eppak am laion baunu gayak bia; amge ena doyak nuhig am gikkiɗahppa baito daatte bia.

¹³ Danab bekka laa nug Kayak dab-ii-maama ii dim lamidtte amu, nug mameg he nauhtte; amu danab wau nug nai awa ona awa doak maditte, nug am le giɗo ii daaloppa toɗotoɗoedatte bia hette.

¹⁴ Lag, en laa ele amu, amuam anig mameg ele aulah keeke; amge danab wau, ah amu nug eheɗ bemanu dabmak awa dabmak amu dim lamittak ah daatte dayeb, Yawe Nug ah amu epeɗia, danab amu mettom.

¹⁵ Danab bahilag iitta ele, ag niiak huana hetteb; danab ag uɗat laa ii hetteb, ag am enug daaglag.

¹⁶ Aun laa nug Yawenu ippunittak nai doya dim lamidtte ele, nug nukka nug bauklel nuhig dabma auta aotte; amge aun nug Yawe oɗe ii dim lamidtte, nug mauhkku.

¹⁷ Aun nug daɗek ehanadtte, amuppa nug Yawe keeke lon mettom bia hette; Yawe Nug nug heumnu nob ena eɗua medakku.

¹⁸ Na bekkat tolidna bu mette! Aɗinu? Amuppa na nug ena bekkunu dabmak aɗan oikkutnu elele; na nug tolidna, bu mettak ii hekkut amu, na nug mauhkkunu ibppa mettem.

¹⁹ Danab nug paha paha oppoɗi beebe, eheɗ hettenu amu, na uuppe bu awaɗ; amunu diig am, na nug bu aomanu ehanidkkut dayeb amu, na eɗun nug baubau ehanidkkutnu daakkut!

²⁰ Na ulum nai ena doon aon, ippunittak nai ena ele aon aɗakkut dayeb; gog takppa na doyak dabmak ena ele daakkut.

²¹ Danab ag keeke laala haknu maittak digdig kuɗum aotteb; amge Yawe Nug aɗi bekkunu oo daatte ele amu, gog takppa amuib aakku bette.

²² Danab ag laa ag haen enappa, nauppa ele ag ahilagnu oo mauhaknab kobol dim lamidkkulagnu oolag daatte; na daɗek mak daakkut, amuam uugnab iitta, amge na hambuppuak danab daakkut, amuam nau.

²³ Yawenu ebehi oh bodoetta le mak am omaitteb bauklel daakkut; aun nug Yawenu ebehi oh bodoetta le mak dootte, nug maɗoɗppa daatte, nug Kayak eppegppan bu mettakppa ii daama.

²⁴ Danab nug bahi iittanab, nug nuhig ee huɗubppa yaatte; amge nug bahi iittanab amunu, nug huma awa, oɗeppa nakok laa iinab inama!

²⁵ Na awa awa qettak danab bu eheɗ medakkut dayeb amu, laa doyak ii awak ele ag anidnana, ag eheɗ bemanu dabmak awa dabmak amu dim lamittaknu kobol doon aoglag; na danab diignu doyak tutukku ele daug batakkut dayeb amu, nug doyak ena, okkai ele aokku.

²⁶ Aun nug mameg eheɗ heta, anig lakkanu lamidtte amu; nid amu, nug am uɗa nak, aria uɗa nak nau guittak ele awa, nukka nuhigppa dotte.

²⁷ Nid dahil, na ippunittak nai ena dookkutnu aib uume; na uukkut amu, na doyak ena aome ele am daut atikku.

²⁸ Aɗi heehe anttomnu mattiak danab, nug hettoɗiakppa hambuppuak nai maditte, kobol amuppa nug nai doya mala hettoɗia epeɗia elele mettak kobol awa awa qedatte; amu nau hak danab ag eheɗ hekkulagnu oolag huana hette.

²⁹ Danab ah ag awa awa qettak nai maditteb, ag bu aoglag. Ao, danab ag Kayak dab-ii-menan ii dim lamidtteb ele, ag bu ɠagattag aoglag.