Prowerb 18 - Nobonob Baibel

¹ Danab nug laa oh ele nug mehqak hette, nug nukka nug oo hette amuib aokkun wagai mette; nug epeɗia ha dabmak ena awak oh dimedatta, tappe nette.

² Danab nug Kayak dab-ii-maama ii dim lamidtte ele nug diignu doyak tutukku aokkunu oo ittag ii qette; diig amunu nug danab ah oh nukka nuhig dabmak amuib amelagppa madikkunu enanagnab dootte.

³ Nau hak kobol daakku dayeb amu, laanu, “Keeke hamunab,” doyak kobol ele daakku; uɗa nak daakku dayeb amu, uɗa nak nau guittak ele, am ele bekku.

⁴ Danab ⌊doyak dabmak ena ele,⌋ nuhig nai am ⌊meu kuɗumnab ele,⌋ le unuqagnab, amuppa le huanak daatte, amubia. Ao, danab doyak dabmak ena elenu nai am lenag laa wan ooppanu qeppuɗia baabaib ugakka daatte bia.

⁵ Hettoɗiakppa, epeɗiak danab nug nau hak danab dilag ena doya diig iittappa ehanadkku, amuam kobol nau; ele amu, hettoɗiakppa epeɗiak danab nug danab eheɗ laa ii heum, nug nuhig nai bappaidkkunu nug nai doya mala hettoɗia epeɗia elele mettak kobol ii dim lamidkku dayeb amu, amu ele am kobol nau.

⁶ Danab nug Kayak dab-ii-maama ii dim lamitte ele nug he, laa nug ele naippa nug mehqak hetteb. Ao, nug oɗeppa aɗi atte amu he, danab ah ag nug makkuɗkkulagnu hetteb.

⁷ Danab nug Kayak dab-ii-maama ii dim lamidtte ele nai atte amu, nai amu he, nug na qette. Ao, danab nug Kayak dab-ii-maama ii dim lamidtte ele nug nai atte, nai amu he, nug mauhaknu pelemppa tette.

⁸ Laa dilag dimug nai mattiaknu amu, danab ag nai amunu eenu miti enanag bia dootteb; ag enanag doon, toppua ukkaeg, oolag unuqagnab noeg, ⌊nauhak bette⌋.

⁹ Am laa nug nuhig uɗat mauhnoak, pehettak ii hette amu; nug am laa, nug keeke he nauhtte, nug nid amu amag bia aakku daatte.

¹⁰ Yawe Nug am lag attan ta ukkak menppa hak, ɠagattag ele, Nug amubia daatte; genab tutukku hak danab ag nuhigppa qaiettan gona, ag bau daatteb.

¹¹ Danab ah enulag ele ag ahilkad keekenu, “Imuam ihinig aab ɠagattag aɗ ele,” atteb; ag keeke amunu am aab okkainu aɗ naɗi itak dayeye, laa ag aɗ amu tena letana nokkulagnu elele iitta, ag anambia dootteb.

¹² Dada hak danab ag nena qekkulag; amge danab nug nukka nug onig qe nette ele, nug binag aokku.

¹³ Danab nug dab-ii-mettowa, nai nob mette amu; danab amu nug Kayak dab-ii-maama hak hette, nug uɗa nak kobol hette.

¹⁴ Oɗe danab nug, “Kayak ehaniɗeb, eɗue bau ahakkul,” dootte dayeb amu, nug anam doyeb ukkeb ukkeb, oɗe amu iitta mekkunu ameg mak hekkunu elele; amge oɗe danab nug ooppa na qak dootte, nug, “Eɗua bau ahakkulnu elele iitta,” dootte dayeb amu, nuhignu am gadonnab, nug ehanittak adeppanu aokku?

¹⁵ Danab nug oo maittak awaknu ehah awom daatte, nug doyak ena aotte. Ge, danab ag doyak dabmak ena ele, ag doyak ena aoglagnu neegtteb.

¹⁶ Am na danab okkai anidkkutnu gona, nug ena dookkunu na keeke nuhig daakkunu hamu mettaknu aon gokkut; keeke amuam heeb, na nug gumidna gokkut.

¹⁷ Danab nug tatam aɗi aɗi anttomnu maditte amu, laala ag doon, “Nug tutukku maditte,” atteb; amge ukke ukke, laa doa, nug danab amu oɗmak mette, ag, “Imu genabtai, o iittatai mattiom?” atteb.

¹⁸ Om ena yaakppa nai hak am babaittak daatte. Ao, om ena yaak am he, danab ɠagattag dilag nug qak aakku iitta mette.

¹⁹ Na aɗi heppe, na awan, o amap nug oo nauhkku dayeb amu, na eɗun nug ele laippu daaglahnu am uug naunab nau, danab nug aab ooppa aben aɗ ɠagattagnab ele eɗidkkunu uug bia. Ao, na laa ele nug qeyaya daaglah dayeb amu, na eɗun heppe, eheɗ hak amu iitta mekkunu am uug naunab nau, aab aɗ ɠagattagnab ele, aab amunu manak qaknu keeke heeb aoɗkkunu uug bia.

²⁰ Danab ag aɗi nai maditteb, amuppa ag nob aotteb. Ao, ag nai attem maditteb, amuppa ag nob aoglag.

²¹ Na aɗi nai madittem, amuppa na meu aottem. Na amuppa bau daakkut, o mauhkkut. O iitta, laa nai amuppa bau daakku, o mauhkku; danab ag nai dabmettanna maditteb, ag amuppa nob ena aoglag.

²² Danab nug ah aotte, nug en okkainab, wannu en laa oh eɗattak aotte; Yawe Nug nuhig daakkunu mette awom.

²³ Daɗek danab nug laa nug nuhignu oo gai-iitta doya oo metta ehanidkkunu oo doyakppa unuqidtte; amge enub danab nug baag ɠagattagppa nob mette.

²⁴ Danab laikkud ag nug ele gaɗappaib layam batappig, ag heppeg, nug na qa nauhkkunu elele; amge layag laa, nug am laikkud laa oh eɗattak, nug nug laikkud dabmatta auta autanab aotte.