Prowerb 17 - Nobonob Baibel

¹ Lag laappa maɗoɗ dayeye, danab nug bret maha qaɗaiettomib latte, me nug maɗoɗppa daatte amunu, nuhignu am ena; amge lag laappa nug qak dayeye, danab nug ee hobul naɗi latte, me nug, nug qakppa daatte amunu, nuhignu am ena iitta.

² Maɗi nid laa doyak dabmak ena ele nug nuhig okkai bekka laa, kobol uɗa nak nau guittak ele hette amu, maɗi nid nug nid amunu gumak daakku; amu maɗi nid doyak dabmak ena ele, nuhig okkai nug bekkod nug aug madatta, nug nid amu ele laa medakku.

³ Danab nug gol, silwa ele aab aɗuppa me, huananab gakkaɗe, le me, dubuttid laa daatte dayeb amu, danab nug ehale ukke, golppa o silwappa ii daatte; amge Yawe Nug ma anttak danab metta ha, Nug ib amuppa danab ooppa nau daatte dayeb he, miag atitte.

⁴ Nau hak danab nug nai mattiak eheɗ dookkunu hette. Ao, hambuppuak danab nug laa heeb nauhkkunu nai dookkunu daug huma daatte.

⁵ Danab nug daɗek awa awa aqadtte amu, nug laa Nug danab amu hattom ele, nug nuhignu, “Keeke hamunab,” dootte; am aun nug uug naunab nau, danab laa nuhigppa bettenu gamag ahatte, nug genabnab genab bu mettak ii eɗidma.

⁶ Alalkad nid daatteb, ag am alalkad kaino dilag king haɗ bia daatteb; amu nid ag anilkad mamelkad dilagnu, “Ag binalag ele,” dootteb.

⁷ Danab nug Kayak dab-ii-maama ii dim lamidtte, nug nai ittag ele madikku dayeb amu, am ii mattilo bia maditte; anam amunu gumak danab laa nug hambuppuak nai madikku dayeb, genab, amuam nug iinab mattilo bia, nug maditte.

⁸ Danab laa nug lokkumakppa eheɗ haknu ehanittak laa mette, laa nug oɗe dim lamidtte; laa amu hette amu, nug attem attem hette, am enaib he bette ⌊bia dootte⌋.

⁹ Aun nug laanu hipunin daug atitte, nug oo mauhak kobol he, okkai mette; amge hipuninnu dimug ma mattiak, amuam layam otaɗtte.

¹⁰ Am danab nug laa diignu doyak tutukku ele daug batakku amu, laa amu nug ena oikkunu oo maittak okkai aokku; amge danab nug Kayak dab-ii-maama ii dim lamidtte ele amu, laa nug nug bu medakku dayeb, nug ena oikkunu oo maittak nakokib aokkutai.

¹¹ Eheɗ hak danab nug nai tappe nak hanhan hekkunu ib maditte; amge nug bu okkainab aokku.

¹² Bea anig laa, nug nakkud oh danab laa diia ukke, bea anig nug oppoɗi bak huana dootte ele, na bea anig amu gukkuidna ii wakkutoitte. Am nau; amge na danab Kayak dab-ii-maama ii dim lamidtte ele nug Kayak dab-ii-maama hak kobol haaha daatte uɗa tekkut dayeb, amuam naunab nau.

¹³ Danab laa nug layagnu ena hekku, layag nug eɗua, ena hak amunu kobol eheɗ laa hekku dayeb; laa eheɗ heum amu, nug, nug baekkudppa ele, ag hanhan eheɗ aqadkku.

¹⁴ Digma nug aittak haknu, amuam le ettakppa, le noa gokkunu oɗe hak daatte bia, nug aittak amu paha naɗi mekkunu daatte; diig amunu nug mehqak ukka naɗi memanu, paha heppeg iitta maɗ!

¹⁵ Hettoɗiakppa danab eheɗ heumnu, “Nug eheɗ ii heum,” anak daakkutai, o, laa nug eheɗ ii heumnu, “Nug eheɗ heum,” anak amu ele daakkutai; amge Yawe Nug hambuppuak anak aɗit amu ohnu ooppa uuaknab dootte.

¹⁶ Danab nug Kayak dab-ii-maama ii dim lamidtte ele, nug men doɗo aɗakkunu am meu iitta; amunu diig am, nug doyak dabmak ena ele aokkunu nakok laa ii dabmette.

¹⁷ Aun nug layam genab daatte amu, nug haen oh layagnu oo mauhak dootte; amu awakkud amakkud ele, ag uug haenppa nug ehanittak daaglagnu aakku daatteb.

¹⁸ Danab nug epeɗia ha dabmak ena awak kobol ii dootte ele, nug mudippan laa lon aotte, nug layag elele iitta daakku dayeb, nug lon amu eɗua daden mekkunu, nug genab haknu maditte. Ge, nug layag lon aotte ele, nug layag elele iitta daakku dayeb, nug layagnu lon daden mekkunu nuhig nai ɠagattag qeta maditte.

¹⁹ Aun nug aittaknu oo mauhtte, nug hipunin haknu ele oo mauhtte; aun nug dada nai maditte, nug na qekkunu hette.

²⁰ Danab nug eheɗ haknu nug tiigppa daatte, nug ena ii anidma. Ge, danab nug nai hambuppuak maditte, nug uug anidkku.

²¹ Am danab laa bekka nug Kayak dab-ii-maama ii dim lamidtte dayeb amu, nug mameg am guittak dookku; aun nug nid Kayak dab-ii-maama ii dim lamidtte mameg daatte amu, nug maɗoɗppan gamag ahak nakok laa iitta.

²² Ooppa gamag ahak doyak, amuam marasin ena bia; amge ooppa na qak doyak, amuam he, danab nug nau daatte, nug nauhkkunu hette.

²³ Nau hak danab nug lokkumakppa eheɗ haknu ehanittak aotte; nug hettoɗiak haenppa nai doya mala hettoɗia epeɗia elele mettak elele ii bemanu anam hette.

²⁴ Danab nug diignu doyak tutukku ele nug hanhan doyak dabmak ena ele aɗi ippunidtte, nug amu dabmetta autanab aotte; amge danab nug Kayak dab-ii-maama ii dim lamidtte ele, nug anam iitta, nug dabmak hamu hamu aotte.

²⁵ Bekka laa nug Kayak dab-ii-maama ii dim lamidtte ele nug mameg guittak medatte; nug anig ooppa mua okkainab, kahipan aoɗom bia ele he bette.

²⁶ Danab laa kobol eheɗ laa ii heum amu, ag nug eheɗ heum bia nob nau mettaglag dayeb, amuam kobol nau. Laa amu, danab okkai, ag dabmak oiyak ele tutukkuib dayaknu kobol hetteb amu, ag ag muɗippa mataɗakppa guittak okkai mettaglag dayeb, kobol amu ele am kobol nau.

²⁷ Danab nug doyak ena ele nug nai kuɗum ii maditte; danab nug diignu doyak tutukku ele, nug oppoɗi paha ii bette.

²⁸ Danab nug Kayak dab-ii-maama ii dim lamidtte ele nug nai mauhnoak ii maditte dayeb, danab ah ag ⌊dabmak genab iitta aon,⌋ nuhignu, “Nug am doyak dabmak ena ele,” atteb. Ao, danab nug Kayak dab-ii-maama ii dim lamidtte ele, nug nai mauhnoak ii maditte dayeb, danab ah ag ⌊dabmak genab iitta aon,⌋ nuhignu, “Nug oo maittak awaknu ehah awom daatte,” aon atteb.